ރާއްޖޭގެ ކޮވިޑް-19ގެ ޕޮޒިޓިވިޓީ ރޭޓް މިހާރު އެންމެ މަތީގައި ހުރީ އަތޮޅުތެރޭގައި ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން އާންމުކޮށްފައިވާ "އަތޮޅުތެރޭގެ ޕޮޒިޓިވިޓީ ރޭޓް"ގެ ތަފާސްހިސާބުތަކަށް ބަލާއިރު، ރޭޓް މަތިވާން ފަށާފައިވަނީ 2022 ވަނަ އަހަރުގެ ޖެނުއަރީ މަހުގެ ތެރޭގައެވެ. އެގޮތުން ފެބްރުއަރީ 2ން 22ށް ޕޮޒިޓިވިޓީ ރޭޓް ހުރީ 50 އިންސައްތާގައެވެ. 23 ފެބްރުއަރީން 01 މާޗަށް 45 އިންސައްތާގައި ޕޮޒިޓިވިޓީ ރޭޓް ހުރުމަށްފަހު, 2 މާޗުން 8 މާޗަށް 44 އިންސައްތައަށް ވަނީ ދަށަށްގޮސްފައެވެ.

މީގެއިތުރުން ޕޮޒިޓިވިޓީ ރޭޓް 9 މާޗުން 15 މާޗަށް 37 އިންސައްތައަށް ވަނީ ދަށަށް ގޮސްފައެވެ. އަދި 16 މާޗުން 22 މާޗަށް ޕޮޒިޓިވިޓީ ރޭޓް ވަނީ 38 އިންސައްތައަށް މަތިވެފައެވެ.

މާލެ ސަރަހައްދުގެ ޕޮޒިޓިވިޓީ ރޭޓަށް ބަލާއިރު، މަތިވާން ފަށާފައިވަނީ 2022 ވަނަ އަހަރުގެ ޖެނުއަރީ މަހުގެ 12ން ފެށިގެންނެވެ. އެގޮތުން ޖެނުއަރީ 12ން 18ށް 18 އިންސައްތާގައި ހުރުމަށްފަހު ޖެނުއަރީ 19ން 25ށް ރޭޓް ވަނީ 41 އިންސައްތައަށް މަތިވެފައެވެ. 26 ޖެނުއަރީން 1 ފެބްރުއަރީއަށް 45 އިންސައްތާގައި ޕޮޒިޓިވިޓީ ރޭޓް ހުރުމަށްފަހު 2 ފެބްރުއަރީން 8 ފެބްރުއަރީއަށް 33 އިންސައްތައަށް ވަނީ ދަށްވެފައެވެ. އަދި މިހާރު ރޭޓް ދަށްވަމުންދާއިރު، 2 މާޗުން 8 މާޗަށް ޕޮޒިޓިވިޓީ ރޭޓް ހުރީ 8 އިންސައްތާގައެވެ.

މީގެއިތުރުން ޕޮޒިޓިވިޓީ ރޭޓް 9 މާޗުން 15 މާޗަށް 7 އިންސައްތައަށް ވަނީ ދަށަށް ގޮސްފައެވެ. އަދި 16 މާޗުން 22 މާޗަށް ޕޮޒިޓިވިޓީ ރޭޓް ވަނީ 4 އިންސައްތައަށް ދަށްވެފައެވެ.

މީގެއިތުރުން މުޅި ރާއްޖޭގެ ޕޮޒިޓިވިޓީ ރޭޓް 2 މާޗުން 8 މާޗަށް ހުރީ 18 އިންސައްތާގައި ކަމަށް އެޗްޕީއޭއިން ބުނެއެވެ. އެޗްޕީއޭއިން އާއްމުކޮށްފައިވާ ތަފާސްހިސާބުތަކަށް ބަލާއިރު، ޕޮޒިޓިވިޓީ ރޭޓް މަތިވެފައިވަނީ ޖެނުއަރީ މަހުގެ 26ން ފެބްރުއަރީ 1ށެވެ. އެއީ 36 އިންސައްތައެވެ. އޭގެ ފަހުން ރޭޓް ދަށްވާން ވަނީ ފަށާފައެވެ. އަދި 23 ފެބްރުއަރީން ފެށިގެން 8 މާޗުގެ ނިޔަލަށް ޕޮޒިޓިވިޓީ ރޭޓް ވަނީ 18 އިންސައްތާގައި ހިފެހެއްޓިފައެވެ. އަދި 9 މާޗުން 15 މާޗަށް ރޭޓް 15 އިންސައްތާގައި ހުރިއިރު 16 މާޗުން 22 މާޗަށް ރޭޓް ވަނީ 11ށް ދަށްވެފައެވެ.

ރާއްޖޭގެ ކޮވިޑްގެ ހާލަތާ ގުޅޭގޮތުން އެޗްޕީއޭއިން ބުނީ 14 މާޗުން 26 މާޗަށް ޖުމްލަ 2342 މީހުން ޕޮޒިޓިވްވެފައިވާ ކަމަށެވެ. އެއީ މާލެ ސަރަހައްދުން 184 މީހުންނާއި، އަތޮޅުތެރެއިން 1938 މީހުން ކަމަށެވެ. އަދި އެ މުއްދަތުގައި ބަލީގައި އެކަކު ނިޔާވެފައިވާއިރު ނިޔާވި މީހުންގެ ޖުމްލަ އަދަދު ވަނީ 298ށް އަރާފައެވެ.