ރަޝިޔާގެ ރައީސް ވްލަޑްމިއަރ ޕުޓިން އަވަހާރަކޮށްލުމަށް މަގުފަހިވާގޮތަށް ލިޔުމެއް ލިޔުނުކަމަށް ވިދާޅުވެ އިޓަލީގެ ނޫހެއްކަމުގައިވާ ލަ ސްޓަމްޕާ އާ ދެކޮޅަށް ދައުވާކުރައްވާނެކަމަށް އިޓަލީއަށް ރަޝިޔާއިން ކަނޑައަޅުއްވާފައި ހުންނަވާ ސަފީރު ސަރްގޭ ރަޒޯވް ވިދާޅުވެއްޖެއެވެ.

ދައުވާގެ މައްސަލަ ހުށަހެޅުއްވުމަށްފަހު ޕްރޮސެކިޔުޓަރ ޖެނެރަލް އޮފީހުގެ ބޭރުގައި ހުންނަވައި ސަރްގޭ ވިދާޅުވީ, މިއީ ނޫސްވެރިކަމުގެ އުސޫލުތަކާއި ޚިލާފަށް ލިޔެފައިވާ ލިޔުމެއްކަމަށެވެ.

މާޗް 22 ވަނަ ދުވަހު "ލަ ސްޓަމްޕާ"ގައި ޝާއިއުކޮށްފައިވާ ލިޔުމެއްގެ ސުރުޚީގައި ބުނެފައިވަނީ "އޮތް ހަމައެކަނި ގޮތަކީ ވެރިމީހާ މަރާލުންކަމަށްވާނަމަ"އެވެ. ލިޔުމުގައި މައިގަނޑު ގޮތެއްގައި ބުނެފައިވަނީ ރަޝިޔާއިން ޔޫކްރެއިނަށް ދެމުންދާ ހަމަލާތައް ހުއްޓާލުމަށް ނުކުޅެދިއްޖެކަމަށްވާނަމަ ދެން އެކަމަށް އޮތް ހަމައެކަނި ހައްލަކަށް ރައީސް މަރާލުން ކަމަށް ވެދާނެކަމަށެވެ.

ތަރުޖަމާނެއް މެދުވެރިކުރައްވައި ނޫސްވެރިންނާ ވާހަކަދައްކަވަމުން ސަރްގޭ ވިދާޅުވީ, ނޫސްވަނީ ކުށަކަށް އަރައިގެންފައިކަމަށެވެ. ނަމަވެސް ލަ ސްޓަމްޕާގެ އެޑިޓަރ މަސިމޯ ގިއާނިން ވަނީ ސަފީރުގެ ތުހުމަތުތައް ދޮގުކުރައްވާފައެވެ.

ގިއާނިން ވިދާޅުވީ އެލިޔުން ނިންމާލުމުން ބުނެފައިވަނީ މައްސަލައެއް ހައްލުކުރުމަށް ވެރި މީހާ މަރާލުމަކީ ހައްލެއްކަމަށް ވާނީ ވަރަށް މަދު ފަހަރެއްގައިކަމަށާއި އެކަމުގެ ސަބަބުން ހާލަތު އިތުރަށް ގޯސްވާނީކަމަށެވެ.

ޕުޓިން ވިދާޅުވެފައިވަނީ ރަޝިޔާއިން ޔޫކްރެއިންގައި ހިންގަމުންދަނީ އަސްކަރީ އޮޕަރޭޝަނެއްކަމަށެވެ.

ސަރްގޭ ވަނީ އިޓަލީން ޔޫކްރެއިނަށް ހަތިޔާރު ފޮނުވުމަށް ނިންމި ނިންމުމާ ދެކޮޅަށް ވާހަކަދައްކަވާފައެވެ. ސަރްގޭ ވިދާޅުވީ އިޓަލީން ފޮނުވާ ހަތިޔާރު ރަޝިޔާގެ އާންމުން މެރުމަށް ބޭނުންކުރެވޭނެކަމަށެވެ.

އިޓަލީއާއި ރަޝިޔާއާ ދެމެދު ގާތްގުޅުމެއް އޮވެއެވެ.