މުއައްސަސާތަކުން ކަންކަން އިންތިޒާމް ކުރާއިރު ނަމާދަށް އިސްކަން ދިނުމަށް ޚުތުބާގައި ގޮވާލައިފި
25 މާރިޗު 2022 | ހުކުރު 10:02ނަމާދަކީ ކަނޑައެޅިފައިވާ ވަގުތުތަކެއްގައި އަދާކުރުމަށް މުއުމިނުންގެ މައްޗަށް ފަރުޟު ކުރައްވާފައިވާ އަޅުކަމެއް
އިސްލާމީ މަރުކަޒުގައި ހުކުރު ނަމާދުކުރުމަށް ޖަމާއަތް ހަދައިގެން
ނަމާދު އަޅާ މީހުން ގިނަ ކަމަށާއި، މުއައްސަސާތަކުން ކަންކަން އިންތިޒާމް ކުރާއިރު ނަމާދަށް އިސްކަން ދިނުމަށް ހުކުރު ޚުތުބާގައި ގޮވާލައިފިއެވެ.
''ނަމާދަކީ ދީނުގެ ތަނބެވެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ ނަމާދަކީ ކަނޑައެޅިފައިވާ ވަގުތުތަކެއްގައި އަދާކުރުމަށް މުއުމިނުންގެ މައްޗަށް ފަރުޟު ކުރައްވާފައިވާ އަޅުކަމެއް ކަމަށެވެ. ހަނގުރާމައިގެ ޙާލަތުގައްޔާއި، ބިރުވެރިކަމުގެ ޙާލަތްތަކުގައިވެސް ނަމާދުކުރުމަށް އަންގަވާފައިވާއިރު، ބަލިމަޑުކަމުގެ ހާލަތުގައިވެސް ނަމާދު އަޅައިގެން ނުވެއެވެ. ނަމަވެސް މިއަދު ފެންނަނީ މިއާ ހިލާފު މަންޒަރެއްކަން ފާހަގަކޮށް ޚުތުބާގައި ބުނީ ބައެއް މީހުން ބައްޔެއްވާއިރަށް ނަމާދު ދޫކޮށްލާ ކަމަށެވެ. އެފަދަ މީހުންނަށް ނަމާދު ކުރުން ވެފައިވަނީ އުފުލަން ޖެހިފައިވާ ބޮޑު ބުރައެއްގެ ގޮތުގައި ކަމަށް ޚުތުބާގައި ފާހަގަކޮށްފައިވެއެވެ.
ޚުތުބާގައި ބުނީ ނަމާދަކީ މުއުމިނުތަކުންގެ މައްޗަށް ވަގުތު ކަނޑައެޅިގެން އޮތް ފަރުޟެއް ކަމުގައިވާއިރު، ޝައިޠާނާ މުސްލިމުން ނަމާދާއި ދުރުކުރުމަށްޓަކައި ވަރަށް ގިނަ ޙީލަތްތަކާއި މަކަރުތައް ހަދާ ކަމަށެވެ. ޝައިޠާނާއަށް ވެގެންވާނަމަ މުސްލިމުން ނަމާދާއި މުޅިން ދުރުކުރެވޭތޯ ބަލާނެ ކަމަށާއި، އާދަކޮށް ނަމާދު ކުރާ މީހަކުނަމަ، އޭނާ ބައެއް ނަމާދުތަކާއި ދުރުހެލި ކުރެވޭތޯ ބަލާނެ ކަމަށް ޚުތުބާގައި ބުނެފައިވެއެވެ. މުސްލިމުންގެ ހާލަތަށް އިޝާރަތްކޮށް ޚުތުބާގައި ބުނީ މިހާރަށް ބަލާއިރު، ގިނަ ބަޔެއްގެ ނަމާދުގެ ތިލަފަތް ވަނީ ލުއިވެފައިވާ ކަމަށެވެ. ނަމާދަށް ވުރެ އެހެނިހެން ކަންކަމަށް އިސްކަންދޭ ކަމަށެވެ.
އެގޮތުން ނަމާދުގެ ވަގުތުތަކާއި ދިމާކޮށް، ދުނިޔަވީ އަމަލުތައް ރާވައި، ހިންގާތަން ފެންނަ ކަމަށާއި، ބަންގި ގޮވުމުން ފިހާރަތަކާއި، ސައިހޮޓާތައް ލައްޕަން ގަވާއިދުތައް އަމުރު ކުރާތީ އެތަންތަން ލެއްޕިއަސް އެ ތަންތަނުގެ ތެރޭގައި، ގިނަބަޔަކު ނަމާދަށް ނުގޮސް ތިބޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މިއަދު މިސްކިތްތައް ވަރަށް ގިނަ ކަމަށާއި، ބާޒާރުމަތީގައްޔާއި، ކުޅިވަރު ދަނޑުތައް ކައިރީގައްޔާއި، އަތިރިމައްޗާއި ކައިރި ހިސާބުގައި، މިސްކިތްތައް އެބަހުރި ކަމަށެވެ. މަގުތައްވަނީ އަލިވެ، ހިނގާބިނގާ އުޅޭމީހުންނަށް މިސްކިތަށް ދިޔުމަށް އަމާންވެފައިވާ ކަމަށާއި، ނަމާދު ވަގުތުތަކުގައި މިސްކިތްތަކުގެ ތާޅަފިލިތަކާއި، ރޭޑިއޯއާއި ޓީވީތަކުން ބަންގި ގޮވައި ނަމާދު ކުރުމަށް ހަނދާންކޮށްދޭ ކަމަށް ޚުތުބާގައި ބުނެފައިވެއެވެ. ނަމަވެސް ނަމާދު އަޅާ މީހުން މަދެއް ނޫންކަން ޚުތުބާގައި ފާހަގަކުރިއެވެ.
ޚުތުބާގައި ބުނީ އިދާރާތަކުން ހިންގާ ކުޅިވަރާއި، އެހެނިހެން ހަރަކާތްތައް އިންތިޒާމު ކުރުމުގައި، ނަމާދު ވަގުތުތަކަށް ފަރުވާތެރިވެ، އެހަރަކާތްތަކުގެ ބައިވެރިންނަށް ނަމާދު ކުރެވޭނެ ގޮތަށް އިންތިޒާމު ކުރުމަށް ޚާއްސަ ސަމާލުކަމެއް ދޭން ޖެހޭ ކަމަށެވެ. އަދި ދަރިން ތަރުބިޔަތު ކުރުމުގައި، ނަމާދަށް ފަރުވާތެރިވުމަށް ހާނުވައިގެން ތަރުބިޔަތު ދިނުމަކީ، ވަރަށް މުހިއްމު ކަމެއް ކަމަށާއި، އިސްލާމީ ގައުމެއްގައި މުސްލިމް ދަރިންތަކެއް މިސްކިތްތަކުން ބަންގި ގޮވައި، ނަމާދު ކުރެވޭ ވަގުތުގައި، ނަމާދު ނުކޮށް ކުޅިވަރު ކުޅުމުގައި، ގެންގުޅުމަކީ، އެކުދިންގެ ތަރުބިޔަތަށް ނުބައި އަސަރުތަކެއް ކުރާނެކަމުގެ އިންޒާރު ވެސް ޚުތުބާގައި ދީފައިވެއެވެ.
އެހެންކަމުން ދުނިޔެއާއި އާޚިރަތުގެ ކާމިޔާބީ ހާސިލްކުރުމަށް ހުރިހާ ކަމަކުން ވެސް ނަމާދު އިސްކޮށް، ނަމާދު ކުރާ ބައެއްގެ ގޮތުގައި ދެމިތިބުމަށް ޚުތުބާގައި ނަސޭހަތްތެރިވެފައިވެއެވެ.
