ޕޮގްބާގެ ގެއަށް ވަގުން ވަދެއްޖެ، ގެންދިޔައީ ވޯލްޑްކަޕްގެ ރަން މެޑަލް!

ޕޮގްބާގެ ގެއަށް ވަގުން ވަދެ, އޭނާގެ ވޯލްޑްކަޕް ރަން މެޑަލް ވަގަށް ގެންގޮސްފިއެވެ. މިދިޔަ ހަފްތާގައި އޭނާގެ ގެއަށް ވަގުން ވަތްއިރު ގޭގައި ތިބީ ޕޮގްބާގެ ދެދަރިންނާއި, ދެދަރިން ބެލުމަށް ހަވާލުވެ ހުރި މީހާއެވެ. އެކަމަކު އެމީހުންގެ ހާލަތު ރަނގަޅުކަމަށް ޕޮގްބާއާއި ހަވާލާދީ މީޑިޔާތަކުން ވަނީ ރިޕޯޓްކޮށްފައެވެ. އެކަމަކު ދަރިންނާއި, ދަރިންނާއި ހަވާލުވެ ހުރި މީހާވެސް ހުރީ ޝޮކެއްގައިކަމަށް ޕޮގްބާ ބުނެފައިވެއެވެ.

ވަގުން ގެންދިޔައީ ވޯލްޑްކަޕްގެ ރަން މެޑަލްގެ އިތުރުން ޕޮގްބާގެ މަންމަގެ ގަހަނާތަކެވެ. 2018 ވަނަ އަހަރު ކޮރޭޝިޔާ ބަލިކޮށް, ފްރާންސް ވޯލްޑްކަޕް ކާމިޔާބުކުރިއިރު ޕޮގްބާ މުހިއްމު ދައުރެއް އަދާކުރިއެވެ.

މެންޗެސްޓަރ ޔުނައިޓެޑްގެ މިޑްފީލްޑަރު އެކްލަބާއެކު ހަދާފައިވާ އެއްބަސްވުން މިހިނގާ ސީޒަންގެ ނިޔަލަށް ހަމަވާނެއެވެ. 2016 ވަނަ އަހަރު ޕޮގްބާ ޔުވެންޓަސް ދޫކޮށް ޔުނައިޓެޑާއި ގުޅުނީ 89 މިލިއަން ޕައުންޑަށެވެ. މިވަގުތު ޕޮގްބާ ހުރީ ޤައުމީ ޓީމާއެކުއެވެ. އެއީ އައިވަރީ ކޯސްޓްގެ އިތުރުން ސައުތްއެފްރިކާ އާއި ދެކޮޅަށް ކުޅޭ ރަހުމަތްތެރިކަމުގެ މެޗަށެވެ.