އިންޑިޔާގެ ފޮޓޯޖަރނަލިސް ދާނިޝް ސިއްދީޤީގެ މަރާއި ގުޅިގެން އޭނާގެ އާއިލާއިން ތާލިބާން އާއި ދެކޮޅަށް ކޯޓަށް ހިނގައްޖެ

ޕުލިޓްޒަރ ޕްރައިޒް ހާސިލްކޮށްފައިވާ އިންޑިޔާގެ ފޮޓޯ ޖަރނަލިސް ދާނިޝް ސިއްދީޤީގެ މަރާއި ގުޅިގެން އޭނާގެ އާއިލާއިން ތާލިބާން ޖަމާއަތާއި ދެކޮޅަށް ކޯޓަށް ހިނގައްޖެއެވެ.

އުމުރުން 38 އަހަރުގެ ދާނިސް މަރުވެފައިވަނީ 2021 ވަނަ އަހަރު ތާލިބާން ޖަމާއަތުން އަފްޢާނިސްތާން ހިސޯރު ކުރުމަށް ހިންގި ހަރަކާތްތައް ގެނެސްދޭން އުޅުމުގެ ތެރޭގައެވެ. އޭނާގެ މަންމައާއި ބައްޕަ މިހާރުވަނީ ތާލިބާންގެ އިސް 6 ލީޑަރަކާއި ދެކޮޅަށް އިންޓަރނޭޝަނަލް ކްރިމިނަލް ކޯޓަށް މައްސަލަ ވައްދާފައެވެ.

ދާނިޝްގެ އާއިލާއިން ތުހުމަތުކުރާ ގޮތުގައި ތާލިބާން ހަނގުރާމަވެރިންވަނީ އޭނާ ހައްޔަރުކޮށްގެން ގެންގޮސް ނުހަނު އަނިޔާދީ މަރާލާފައެވެ. އެއީ އިންޑިޔާ ރައްޔިތަކަށް ވާތީކަމަށާއި ޖަރނަލިސްޓަކަށް ވާތީކަމަށް ދާނިޝްގެ އާއިލާއިން ތުހުމަތުކުރެއެވެ.

2021 ވަނަ އަހަރުގެ ޖުލައިމަހު ހިނގި މިހާދިސާއަށްފަހު ފުރަތަމަ ރިޕޯޓްތައް ބުނެފައިވަނީ އޭނާ މަރުވީ ދެފަރާތުގެ ދެމެދުގައި ބަދަލުކުރެވުނު ހަމަލާތަކުގައި ވަޒަން އަރައިގެން ކަމަށެވެ. ނަމަވެސް ފަހުން ރޮއިޓަރސްއިން ރިޕޯޓް ކޮށްފައިވާ ގޮތުގައި ބަޑީގެ ވަޒަން އެރުމަށްފަހު އޭނާ ދަމާފަ މިސްކިތަކަށް ވެއްދި އެވެ. އަދި އެއަށްފަހު ކަންތައް ވީގޮތެއް ނޭނގޭ ކަމަށް ރޮއިޓަރސް ބުނެފައިވެއެވެ.

ދާނިޝް ސިއްދީޤީގެ ހަށިގަނޑު ރެޑްކްރޮސްއާއި ހަވާލު ކުރެވުނުއިރު ވަނީ ވަރަށް ބޮޑަށް އަނިޔާކުރުމުގެ އިތުރުން ބަރުވެހިކަލެއްގެ ދަށުކޮށްފައިކަމުގައި އާއިލާއިން ތުހުމަތުކުރެއެވެ. އަދި ބަޑީގެ 12 ވަޒަން އޭނާގެ ހަށިގަނޑަށް އަރާފައި ހުރިކަމުގައިވެސް އާއިލާއިން ބުނެއެވެ.

ރޮއިޓަރސްގެ އިންޑިޔާގައި ހުންނަ ޗީފް ފޮޓޮގްރާފަރުގެ ވަޒީފާގައި ހުރި ދާނިޝް ސިއްދީޤީ އަށް ޕުލިޓްޒަރ ޕްރައިޒް ލިބިފައިވަނީ އިންޑިޔާގައި ކޮވިޑް ބަލީގެ ހާލަތު ޕީކަށް އަރައިގެން ދިޔައިރު މަރުވިމީހުން އަންދަމުން ދިޔަގޮތް ދައްކާދީ އޭނަ ނެގި ފޮޓޯތަކަށެވެ.

ކޯޓަށް ދިޔަ ނަަމަވެސް އެމީހުންގެ ދަރިފުޅު އެނބުރި ނާންނާނެކަން އެނގޭކަމަށާއި ނަމަވެސް އިންސާފު ލިބޭނެކަމުގެ އުންމީދުގައި އެކަން ކުރީކަމުގައި ދާނިޝް ސިއްދީޤީގެ އާއިލާއިން ބުނެއެވެ.