ސިންގްހަމްއަކީ ދިވެހިންނަށް އައު ނަމަކަށް ނުވާނެއެވެ. ހިންދީ ފިލްމަށް ލޯބި ކުރާ ބަޔަކު ދިރިއުޅޭ މި މުޖުތަމައުގައި ސިންގްހަމްއޭ ބުނުމުން ނޭނގޭ މީހަކު މަދުވާނޭ ބުންޏަސް ދޮގަކަށް ނުވާނެއެވެ. ރާއްޖޭގެ އިތުރުން ދުނިޔޭގެ އެކި ހިސާބުތަކުގައި މަގުބޫލުވެގެންދިޔަ ސިންގްހަމްއަކީ މިފަހުން ބޮލީވުޑް އިންޑަސްޓްރީގައި އެންމެ ހިޓް ލިބުނު އެއް ފިލްމެވެ. މި ފިލްމަކީ ޗައްތަރަޕަތީ ޝިވާޖީ މަހަރާޖާ މަރާތާ ސިފައިންގެ ފައުޖުގައި އުޅުނު ތޫނުފިލި ލީޑަރެއް ކަމަށްވާ ތަންހާޖީ މަލުސޭރްގެ ހަޔާތަށް ބިނާކޮށް ހެދި ފިލްމެއް ކަމަށްވާއިރު، މިފިލްމުގެ ލީޑުގެ ރޯލުން ފެނިގެންދިޔަ އަޖޭ ދޭވްގަންގެ މަގުބޫލުކަން އިތުރުވެގެން ދިޔައެވެ. ނަމަވެސް މިފަހަރު ދައްކަން މިއުޅެނީ ސިންގްހަމްގެ ފިލްމުގެ ވާހަކައެއް ނޫނެއެވެ. ސިންގްހަމްގެ ގޮތުގައި ސިފަކުރަމުންދާ ދިވެހިންގެ ފުލުހުންގެ ޚިދުމަތުގައި މަސައްކަތް ކުރަމުންދާ ފަހުލަވާނެއްގެ ވާހަކައެވެ.
އަންގާރަ ދުވަހުގެ ވަގުތެއްގައި ވަގުކަލޭގެ އަތުލުމަށްޓަކައި ފުލުހެއް ކުރި ބުރަ މަސައްކަތް ދައްކުވައިދޭ ވީޑިއޯއެއް މުޅި ސޯޝަލް މީޑިއާގައި ވަނީ ވަކި ހިއްޕާލާފައެވެ. ގިނަ ބަޔަކު ފުލުހުންގެ މީހާއަށް ތައުރީފު ކުރަމުންދާއިރު، އެއީ ދިވެހިންގެ ސިންގްހަމް ކަމަށް ބައެއް މީހުން ސިފަކޮށްފައިވެއެވެ. ފުލުހުންގެ ޚިދުމަތުން ފެންނަން ބޭނުންވަނީ މިފަދަ ހިތްވަރުގަދަ މަސައްކަތް ކުރާ ފުލުހުން ކަމަށް ބައެއް މީހުން ބުނެފައިވެއެވެ. މިހާރު ވެސް ސީން ބަލަން ބޭނުންވެ، އެކްޝަން ނުނގާ ތިބޭ ފުލުހުން މުއައްސަސާގައި އުޅޭ ކަމަށް ބައެއް މީހުން ތުހުމަތުކޮށްފައިވެއެވެ. ނަމަވެސް މި ވީޑިއޯއާއެކު ފުލުހުންނާއި މެދު އާއްމު ރައްޔިތުން ދެކޭ ދެކުން ބަދަލުވެ އިތުބާރު ބޮޑުވާނެ ކަމަށް ބައެއް މީހުން ބުނެފައިވެއެވެ.
މި ވީޑިއޯއިން ފެންނަނީ މީހަކު ވަރަށް ބާރަށް ދުވެފައި އަންނަ ތަނެވެ. އޭނާގެ ފަހަތުން ފުލުހަކު އާދެއެވެ. ފުލުހުންގެ މީހާ، އެމީހާއާއި އަރާ ހަމަކުރަނިކޮށް ގެއަކަށް އެމީހާ ވަދެއެވެ. ސިނޑިން ވެސް ވަރަށް ބާރަށް ދުވެފައި އަރައެވެ. އެކަމަކު ފުލުހުންގެ މީހާ ވެސް ހުއްޓުމެއް ނެތި ސިނޑިމަތިން ދުވެފައި އަރައެވެ. ވަރުބަލިވި ނަމަވެސް ފުލުހުންގެ މީހާ ހުއްޓެނީ އެމީހާ އަތުލައި ގަތުމަށްފަހުއެވެ. ވައްކަން ކުރި ކަމަށް ތުހުމަތުވާ މިހާ ޓީޝާޓުގެ ގިރުވާނުގައި ހިފައި އަނެއްކާ ސިޑިން ތިރިއަށް ގެންދެއެވެ. އަދި އޭރު ދެ މީހުން ވެސް ތިބީ އިންތިހާއަށް ވަރުބަލިވެފައިކަން އެނގެއެވެ. އަދި އެންމެ ތިރީ ފްލޯއިން ފުލުހުންގެ މީހާ ފޯނެއް ނަގާތަން ފެނެއެވެ. މިއީ ވައްކަން ކުރި ކަމަށް ތުހުމަތު ކުރެވޭ އެމީހާ އެތަނަށް އެއްލާލި ފޯނުކަމަށް ބެލެވެއެވެ.
ވައިރަލްވަމުންދާ މި ވީޑިއޯއާއި ގުޅިގެން ފުލުހުން ބުނީ އެއީ 21 މާޗް ވީ ހޯމަ ދުވަހުގެ މެންދުރު ޗާންދަނީމަގުގައި ފުލުހުން ޕެޓްރޯލް ކުރަމުން ދަނިކޮށް ހިނގި ހާދިސާއެއް ކަމަށެވެ. އަދި ވަގަށް ނަގާފައިވާ ކަމަށް ބެލެވޭ ފޮށިގަނޑެއް ހިފައިގެން އުޅުނު ދިވެހި ފިރިހެނެއް ގާތު މަޑުކުރަން ބުނުމުން، އެކަމަށް ދެކޮޅު ހަދައި ދުވެ ފިލަން އުޅުމުން ހިފެހެއްޓި މަންޒަރު ކަމަށް ފުލުހުން ބުނެއެވެ.
ފުލުހުން ބުނީ އެ މީހާ ހައްޔަރުކޮށްފައިވާ ކަމަށާއި މައްސަލަ އިތުރަށް ތަހުގީގު ކުރަމުންދާ ކަމަށެވެ.
މި ހާދިސާއާއި ގުޅިގެން އެކި މީހުންގެ ޝުއޫރުތައް ބަންޑުން ކުރަމުންދާއިރު، ފުލުހުންގެ އެމީހާގެ ޒިންމާ އަދާކުރުމަށް ކުރާ މަސައްކަތް ވަރަށް ސާފުކޮށް ފެނެއެވެ. ތައުރީފް ވެސް ހައްގެވެ. ވަގުންގެ ފަހަތުން ދުވެ، މީހުން އަތުލައި ގަތުމަކީ އައު ކަމަކަށްނުވި ނަމަވެސް މިފަހަރު ވައިރަލްވި މި ވީޑިއޯ ވަރަށް ތަފާތު ކަމަށް ވެސް ބައެއް މީހުން ބުނެފައިވެއެވެ. އެއީ މާލޭގައި ވައްކަމުގެ ތުހުމަތުކުރެވުނު މީހެއްގެ ފަހަތުން ފުލުހަކު ދުވެ، އަތުލައިގަތް މުޅި މަންޒަރު އާއްމު ރައްޔިތުންނަށް ފެނިގެންދަނީ މަދު ފަހަރެއްގައި ކަމަށްވާތީއެވެ. އެހެންކަމުން އާއްމުންނަށް މި ފެނިގެން މިދިޔަ ފުލުހުންގެ މީހާއަކީ ދިވެހި ފުލުހުންގެ ޚިދުމަތުގައި ހުރި ސިންގްހަމް ކަމަށް ސިފަކޮށްފައިވެއެވެ. އަދި 1:49 ސިކުންތުގެ ވީޑިއޯއިން އެކަނި ފުލުހުން ކުރަމުންދާ ބުރަ މަސައްކަތް ހިތަށް ތަސައްވުރު ނުކުރެވޭނެ ކަމަށް ވެސް ބައެއް މީހުން ބުނެފައިވެއެވެ.
