ހައްވާ އީޝަލް ރިޔާޒު: ބެޑްމިންޓަންގެ ފުރަތަމަ ޕެރަލިމްޕިކް މެޑަލް ރާއްޖެއަށް ހޯދައިދިނުމުގެ އުއްމީދުގައި

ހައްވާ އީޝަލް ރިޔާޒުއަކީ ކުޅިވަރު އާއިލާއަށް މިހާރު ފަރިތަ ނަމެކެވެ. އީޝަލްގެ މަސައްކަތާއި, އޭނާގެ މައިންބަފައިންގެ ސަޕޯޓްގެ ސަބަބުންނެވެ. ކުޅިވަރުގައި ކުރިއަށްދާން ގަދައަޅާ ކުރާ ހިތްވަރުގެ ސަބަބުންނެވެ. އެންމެ ފަހުން ނިމުނު މޯލްޑިވްސް ސްޕޯރޓްސް އެވޯޑްސް 2022 ގައިވެސް އީޝަލްގެ ނަން ގުގުމާލިއެވެ. އެއީ ފުރަތަމަ ފަހަރަށް ރާއްޖޭގައި ސްޕެޝަލް އޮލިމްޕިކްސްގެ ހަރަކާތަށް ސަމާލުކަން ދީގެން ދިން އެވޯޑްގައި އޭނާގެ ނަން އިވުމުންނެވެ.

ސްޕެޝަލީ އޭބަލްސްޑް އެންމެ މޮޅު އަންހެން އެތްލީޓްގެ ގޮތުގައި 500 އަށްވުރެ ގިނަ މީހުން ހާޒިރުވެތިބި ހަފްލާގައި އިވިގެންދިޔައީ އީޝަލްގެ ނަމެވެ. އެކަމަކު އެކަންވީ އީޝަލްއަށް ސަޕްރައިޒަކަށެވެ.

އީޝަލް ފުރިހަމައަށް ޤަބޫލުކުރަނީ މިއެވޯޑަކީ އޭނާ އިތުރަށް މޯޓިވޭޓްވާނެ އެވޯޑެއްކަމަށެވެ. އަދި އޭނާފަދަ ސްޕެޝަލް ކެޓަގަރީތަކުގައި ވާދަކުރާ އެހެން އެތްލީޓުންނަށްވެސް ލިބޭނެ ހިތްވަރެއްކަމަށެވެ. އެއެވޯޑް ހޯދަން އޭނާއާ އޭނާފަދަ އެހެން އެތްލީޓުންވެސް މަސައްކަތްކުރާނެކަން އީޝަލް ފާހަގަކުރިއެވެ.

ސްޕެޝަލީ އޭބަލްޑް އެންމެ މޮޅު އެތްލީޓް ހޮވަން ފެށުން އަދި އެއެވޯޑް އީޝަލްއަށް ލިބުމަކީ އީޝަލްގެ "ޑްރީމް" ހާޞިލްކުރަންވެސް ލިބުނު އިތުރު ބާރެކެވެ. އޭނާގެ އަޒުމެއް އެބައޮތެވެ. މަސައްކަތްކުރަނީ އުއްމީދަކާއެކުއެވެ.

އެހުވަފެން ހާޞިލްކުރަން މަސައްކަތްކުރާއިރު އީޝަލްއަށް އޮތް ހިތްހަމަޖެހުމަކީ ފުރުޞަތުތައް ލިބުމެވެ. އޭނާ ކުޅެން ފެށިއިރަށްވުރެސް މިހާރު ލިބޭ ފުރުޞަތުތައް ގިނައެވެ. އަދި އޭނާ ކުރިއަށްދަނީ ގިނަ ބައެއްގެ އެހީތެރިކަމާއެކުއެވެ. މޯލްޑިވްސް ޕްރަލިމްޕިކްސް ކޮމިޓީއާއި, ބެޑްމިންޓަން އެސޯސިއޭޝަންގެ އެހީތެރިކަން ލިބެއެވެ. ކޯޗުންގެ ސަޕޯރޓް ވަކިން ފާހަގަކުރިއެވެ. އެކަމަކު އިތުރު ސަޕޯޓާ އެހީ އީޝަލް ބޭނުންވެއެވެ. ޓްރެއިނިންގއަށް ބޭނުންވާ އިތުރު ވަޞީލަތްތަކަށް އިތުރު ސަޕޯޓެއް ލިބޭނަމަ ކުރިއަށް ދިއުމަށް އީޝަލްއަށް އެއީ އިތުރު ބާރެކެވެ.

ޖިމްއަށް އަހަރެއްގެ މައްޗަށް އީޝަލް 36000 ރުފިޔާ ދައްކަން ޖެހެއެވެ. ޕާސަނަލް ޓްރެއިނަރެއްގެ އެހީ ހޯދައިގެން ނޫނީ އެކަން ވާކަށް ނެތެވެ. އެއީ އީޝަލްގެ މައިންބަފައިންނަށްވެސް އޮތް ގޮންޖެހުމެކެވެ. އެފަދަ ކަންކަމުގައި ސްޕޮންސަރުންގެ އެހީތެރިކަން ލިބުމަކީ އީޝަލް ފަދަ އެތްލީޓުން ކުރިއަށްގެންދިއުމަށް މައިންބަފައިން ކުރާ މަސައްކަތަށް އެހެން މީހުންނަށް ދެވޭނެ ލުޔެކެވެ. ކާމިޔާބީއަށް އަޅައިދެވޭނެ ބާރެކެވެ.

މީގެއިތުރުން އީޝަލްއަށް އޮތް ޗެލެންޖަކީ ޕްރެކްޓިސް ކުރުމުގައި ޕާޓްނަރެއް ނެތުމެވެ. ޕްރެކްޓިސް ކުރަމުން ދަނީ ނޯމަލް ކެޓަގަރީގެ ކުޅުންތެރިންނާއެކުއެވެ. އެކަމަކު މުބާރާތުގައި ވާދަކުރަން ޖެހެނީ އޭނާފަދަ އެހެން ކުދިންނާއެވެ. އެއީ ވަރަށްބޮޑު ޗެލެންޖެކެވެ. އެކަމަކު އީޝަލް ހުރީ އެޗެލެންޖުވެސް ގިރާކުރާށެވެ. ބެޑްމިންޓަންއިން ރާއްޖެއަށް މެޑަލް ގެނެސްދޭ ފުރަތަމަ ޕެރަލިމްޕިކްސްގެ އެތުލީޓަށް ވުމުގެ އުއްމީދުގައެވެ.