އޭސީސީގެ އައު މެމްބަރުންނަށް ވެދާނެތަ؟

ސަރުކާރުން އައްޔަންކުރި އޭސީސީގެ މެމްބަރުންގެ މަސައްކަތްތައް އެކަށީގެންވާ ގޮތެއްގައި ކުރިއަށްނުދާކަމަށް ބުނެ، ރައްޔިތުންގެ މަޖިލީހުން މެމްބަރުންގެ ޕަރފޯމެންސް އޮޑިޓެއް ހެދިއެވެ. އެ އޮޑިޓްގެ މައްޗަށް ރިއާޔަތްކޮށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމީ ކޮމިޝަންގެ މެމްބަރުން ވަކި ކުރުމަށެވެ. ސަރުކާރުގެ ސުޕަރ މެޖޯރިޓީއާއެކު ކޮމިޓީން ނިންމި ގޮތަށް މަޖިލީހުން އެކަން އެގޮތަށް ކުރިއަށްގެންދިޔުމަށް ނިންމިއެވެ. އެއާއެކު އޭސީސީގެ ހުރިހާ މެމްބަރުން އެއްފަހަރާ އިސްތިއުފާދެއްވީ ފާއިތުވި އަހަރުގެ ޑިސެމްބަރު މަހުއެވެ.

އެއަށްފަހު ދެމަސް ފާއިތުވެގެން ދިޔައީ އައު މެމްބަރުން އައްޔަން ނުކުރެވިއެވެ. މެމްބަރުން ނެތުމުން މައްސަލަތައް ނުބެލޭކަމުގެ ޝަކުވާ ގިނަވެފައިވަނިކޮށް އައު މެމްބަރުން އައްޔަންކުރީ މިދިޔަހަފުތާ ތެރޭގައެވެ.  

އޭސީސީގެ މެމްބަރުން ވަކިކުރުމުގެ މަރުހަލާގައި، އެންމެ ބޮޑަށް ރައްޔިތުންގެ މަޖިލީހުގެ މެމްބަރުން ވިދާޅުވީ، ޚިޔާނާތުގެ ބޮޑެތި މައްސަލަތައް ތަހުގީގުނުކުރެވި ދިގުލައިގެން ދިޔަ ވާހަކައެވެ. ތަހުގީގު ނިންމުމަށް މުއްދަތަކަށްފަހު މުދަތެއް ދެމުން ދިޔަނަމަވެސް, އެ މަސައްކަތް އޭސީސީން ނިންމާފައިނުވާކަމެވެ. އައު މެމްބަރުން އައްޔަންކުރުމުގެ ކުރިން ކުރިއަށްގެންދިޔަ އިންޓަރވިއު މަރުހަލާގައިވެސް ކޮމިޓީން އެންމެ ބޮޑަށް ފާހަގަކުރީ އެކަމެވެ. އެހެންކަމުން ސިޔާސީ ނުފޫޒާއި އެހެނިހެން ނުފޫޒުތަކުން އެއްކިބާވެގެން މިހާރުގެ މެމްބަރުންނަށް ރަނގަޅަށް މަސައްކަތްކުރެއްވިދާނެބާވައެވެ؟

އެންޓި ކޮރަޕްޝަން ކޮމިޝަނަށް ހަވާލުވެފައިވާ އެންމެ ބޮޑު ޒިންމާއަކީ ކޮރަޕްޝަންގެ މައްސަލަތައް ތަހުގީގުކުރުމެވެ. ދައުލަތުގެ ތެރޭގައި ހިނގާ މިބާވަތުގެ އަމަލަކީ އެއިރެއްގައި ތިބޭ ސިޔާސީ ވެރިންނާއި، އިސް މަގާމުތަކުގައި ތިބޭ މީހުންގެ އަތެއް އެކަމުގައި އޮންނާނެ ކަމެއްކަމާމެދު ދެބަސްވެވޭކަށްނެތެވެ. އެހެންކަމުން އެފަދަ ވެރިންގެ ނުފޫޒު, ކަންކަމުގައި އޮތުމަކީ އޭސީސީގެ ގާނޫނީ ޒިންމާ އަދާކުރުމަށް ހުރަސް އެޅިދާނެ ކަންކަމެވެ. މިފަދަ ނުފޫޒުތަކުގެ ސަބަބުން އިތުރު ގޮންޖެހުންތަކެއް ކުރިމަތިވާނެއެވެ. އަލަށް އައްޔަން ކުރެވުނު މެމްބަރުން ވިދާޅުވަނީ އެ ބޭފުޅުން މަސައްކަތް ކުރައްވާނީ އެފަދަ އެއްވެސް ނުފޫޒަކަށް ތަންދެއްވުމެއްނެތި ކަމަށެވެ.

އެންމެ ބޮޑު ޚިޔާނާތުގެ މައްސަލަ ކަމަށްވާ، އެމްއެމްޕީއާރްސީގެ ޚިޔާނާތުގެ މައްސަލަ ތަހުގީގުކުރުމުގައި އޭރުގެ އޭސީސީ ފެއިލްވެގެން ގޮސްފައިވާކަމުގެ ތުހުމަތުކުރެއެވެ. މިކަމުގައި ސިޔާސީ ނުފޫޒު އޮންނަ ކަމުގެ ތުހުމަތުތައްވެސް ކުރެއެވެ. އެހެންނަމަވެސް އޭސީސީގެ އޭރުގެ މެމްބަރުންވެސް ވިދާޅުވެފައިވަނީ، އެފަދަ ނުފޫޒެއް ނެތްކަމަށެވެ. މަދުވަނީ ބަޖެޓާއި މުވައްޒަފުން ކަމަށެވެ. އެކަމަށްވެސް މިއަދު ސަރުކާރުންވަނީ މަގު ތަނަވަސް ކޮށްދީފައެވެ. އައު މެމްބަރުން ދެއްކެވީ ވަރަށް އުންމީދީ ވާހަކަތަކެކެވެ. ބޮޑު ޚިޔާނާތުގެ މައްސަލަ, އައު މެމްބަރުން އައްޔަންކުރާތާ މާ ގިނަދުވަހެއްނުވެ ފުރިހަމަ ޓައިމްލައިނަކާއެކު ނިންމަވާލައްވާނެކަމަށެވެ. މިހާރު އޭސީސީގައި ފުނިޖެހިފައި ހުރި މައްސަލަތަކުގެ ތަހުގީގު އަވަސްކުރުމުގެ ވާހަކައެވެ. ކަމާ ގުޅުންހުރި އިދާރާތަކާ ގުޅިގެން މަސައްކަތްތައް ބާރު ސްޕީޑްގައި ކުރިއަށް ގެންދަވާނެކަމަށް ކޮމިޓީގައި ވިދާޅުވިއެވެ.  

އެހެންކަމުން އައު މެމްބަރުންނާއެކު ކުރެވޭ އުންމީދުތައްވެސް އޮންނާނެއެވެ. ގިނަބަޔަކު ތިބީ ހެޔޮ ބަދަލެއްގެ އުއްމީދުގައެވެ. އައު މެމްބަރުން އިންޓަރވިއު މަރުހަލާގައި އެ ކުރައްސަވައިދެއްވި ތަސްވީރުގައި ކުލަ ޖެހޭނެ ދުވަސް އަވަހަށް އަންނާނެ ކަމުގެ އުންމީދުގައެވެ.