100 ކިލޯ ޑްރަގް މައްސަލަ: މިއަދު ކުރިއަށް ގެންދެވުނީ ދައުވާ ލިބޭ 2 ބިދޭސީންގެ ބައި އެކަނި
21 މާރިޗު 2022 | ހޯމަ 10:02ކްރިމިނަލް ކޯޓުގައި މި މައްސަލައިގެ 3 ދައުވާއަކާއި ގުޅޭ ގަޒިއްޔާތަކެއް ކުރިއަށްދޭ
ރާއްޖެއަށް 100 ކިލޯއަށް ވުރެ ގިނަ މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކުރި 10 މީހުންގެ ތެރެއިން ފުލުހުން ވަނަވަރު ހާމަކުރި މީހުން
100 ކިލޯގެ ޑްރަގް މައްސަލައިގައި ހިމެނޭ މީހުންގެ މައްޗަށް އުފުލާފައިވާ ދައުވާތަކުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލައިގެ 3 ދައުވާއަކާއި ގުޅޭ ގަޒިއްޔާތަކެއް ކުރިއަށް ދެއެވެ. އެއީ ޑައިމޯފިންޓްރެފިކް ކުރުމުގެދައުވާތަކަކާއި، ޑައިމޯފިން ބޭނުން ކުރުމުގެ ދައުވާތަކެއްގެ އިތުރުން، ކެނެބިސް ބޭނުން ކުރުމުގެ ދައުވާތަކެކެވެ.
ޑައިމޯފިން ޓްރެފިކް ކުރުން: (ދިވެހިން)
ހޯމަ ދުވަހުގެ ހެނދުނު 09:00ށް ތާވަލުކޮށްފައި އޮތީ މިމައްސަލައިގެ ޑައިމޯފިން ޓްރެފިކް ކުރުމާއި ގުޅޭ ގަޒިއްޔާގައި ހިމެނޭ ދިވެހިންގެ މައްޗަށް އުފުލާފައިވާ ދައުވާގެ ބައެވެ. އެއީ ހދ. ކުމުންދޫ ޑިއާފުރެންޑް، އިބްރާހީމް ސިނާން، ގއ. ކޮލަމާފުށި ސޯސަންގެ، އިބްރާހީމް ޒައިދު ހަބީބު، ކ މާފުށި ސްވީޓްމީޑް، އަހުމަދު މާހިރު، ނ. ވެލިދޫ ބީޗްހެވެން، ޖުމާން މުސްތަފާ، ލ. ކަލައިދޫ ޖަނަވަރީމާގެ، މުހައްމަދު އަހްމަދު އަދި ދ. ބަނޑިދޫ ޕޮލާރިސް، މުހައްމަދު ހުސައިނެވެ.
މުހައްމަދު ހުސައިންގެ މައްޗަށް ޑައިމޯފިން ބޭނުންކުރުމުގެ ދައުވާ އުފުލައި އެ ގަޒިއްޔާވެސް ކްރިމިނަލް ކޯޓުގައި ކުރިއަށް ދެއެވެ.
މި މައްސަލައިގައި 09:00ށް ތާވަލު ކޮށްފައިވާ އަޑުއެހުން ކުރިއަށް ގެންދެވިފައެއް ނުވެއެވެ. ސަބަބަކީ ދައުވާ ލިބޭ ބައެއް ފަރާތްތަކަށް އަޑުއެހުމަށް ހާޒިރުވެފައި ނުވާތީއެވެ.
ވުމާއެކު އެ މައްސަލަ ވަނީ 27 މާރޗު 2022 ގެ މެންދުރު 13:00ށް ރީ ޝެޑިއުލް ކުރައްވާފައެވެ.
ޑައިމޯފިން ޓްރެފިކް ކުރުން: (ބިދޭސީން)
މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ލިބޭ 2 ބިދޭސީއެއްގެ ބައިވެސް ވަކިން ކުރިއަށް ދެއެވެ. އެ މައްސަލަ ތާވަލުކޮށްފައި އޮތީ 11:00 އަށެވެ.
އެ އަޑުއެހުމުގައި އެ ދެމީހުންގެ ވަކީލު އިބްރާހިމް ސިޔާމް ވަނީ މައްސަލައިގެ ދައުވާއަށް ޖަވާބުދާރީވުމަށްޓަކައި ބޭނުންވާ ބައެއް އިތުރު ލިޔެކިޔުންތައް ހުރިކަން ފާހަގަކޮށް، މަދުވާ ލިޔެކިޔުންތަކުގެ މައުލޫމާތު ދައުލަތާއި ހިއްސާ ކުރައްވާފައެވެ. އަދި ދައުލަތުންވެސް ވަނީ ދިފާއަށް ދޫކުރެވެން ހުރި ލިޔެކިޔުންތައް 5 ދުވަހުގެ މުއްދަތެއްގެ ތެރޭގައި ދޫކުރައްވާނެކަމަށް ވިދާޅުވެފައެވެ.
ވުމާއެކު މައްސަލަ ބައްލަވާ ގާޒީ ދީބާނާޒް ފަހުމީ ވަނީ ދައުލަތަށް 5 ދުވަހުގެ މުއްދަތެއް ދެއްވުމަށްފަހު، އޭގެ ފަހުން މި މައްސަލައިގެ އަޑުއެހުމެއް ތާވަލު ކުރައްވާނެކަމަށް ވިދާޅުވެފައެވެ.
ކެނެބިސް ބޭނުން ކުރުން:
މި މައްސަލައިގައި ދެން ހިމެނެނީ ހައްޔަރުކުރި 10 މީހުންގެ ތެރެއިން ކެނެބިސް ބޭނުންކުރުމުގެ ދައުވާ އުފުލާފައިވާ މީހުންގެ ގަޒިއްޔާއެވެ. އެ އަޑުއެހުން ތާވަލުކޮށްފައި އޮތީ ހޯމަ ދުވަހުގެ ހެނދުނު 11:30 އަށެވެ.
ކެނެބިސް ބޭނުން ކުރުމުގެ ކުށުގެ ދައުވާ އުފުލާފައިވަނީ ނ. ވެލިދޫ ބީޗްހެވެން، ޖުމާން މުސްތަފާ، ލ. ކަލައިދޫ ޖަނަވަރީމާގެ، މުހައްމަދު އަހްމަދު، ގއ ދެެއްވަދޫ ދޭލިޔާގޭ، މިދުހަތު އިބްރާހިމް، މ ކޮޅުފުށި ޒަހީރާ މަންޒިލް، އަހުމަދު ޝިރުހާން ޝަމީމް އަދި ބަންގްލަދޭޝްގެ ރައްޔިތެއްކަމަށްވާ އެމްޑީ ރަފީޤުލް އިސްލާމްގެ މައްޗަށެވެ.
އެހެންނަމަވެސް އެ އަޑުއެހުންވެސް ކުރިއަށް ގެންދެވިފައެއް ނުވެއެވެ. ސަބަބަކީ އޮންލައިން ކަނެކްޝަންގައި މައްސަލަތަކެއް އުޅުމާއި، ދައުވާ ލިބޭ ބައެއް ފަރާތްތައް ހާޒިރުވެފައި ނުވާތީއެވެ. އެ މައްސަލަވެސް ވަނީ 27 މާރޗަށް ރީޝެޑިއުލް ކުރައްވާފައެވެ.
