ސްރީލަންކާގައި ތެޔޮ ގަންނަން ހަދާފައިވާ ކިއުތަކުގައި ތިބި މީހުންގެ ތެރެއިން ދެމީހުން މަރުވެއްޖެ

ސްރީލަންކާގައި ތެޔޮ ގަންނަން ހަދާފައިވާ ކިއުތަކުގައި ތިބި މީހުންގެ ތެރެއިން ދެމީހުން މަރުވެއްޖެކަމަށް އެގައުމުން ބުނެފިއެވެ.

އެގައުމުގެ ފުލުހުންނާ ހަވާލާދީ ރިޕޯޓުކޮށްފައިވާގޮތުގައި މަރުވެފައިވަނީ ދެ ތަނެއްގައި ހަދާފައިވާ ކިއުގައި ތިބި 2 މީހުންނެވެ. މަރުވި ފުރަތަމަ މީހާއަކީ 70 އަހަރުގެ މީހެކެވެ. އޭނާއަކީ، ހަކުރު ބަލީގެ މީހެއްކަމަށް ފުލުހުންވަނީ ބުނެފައެވެ. މަރުވި ދެވަނަ މީހާއަކީ 72 އަހަރުގެ މީހެއް ކަމަށާއި، އޭނާއަކީ ހިތުގެ ބަލީގެ މީހެއް ކަމަށް ފުލުހުން ބުނެއެވެ.

ދެވަނަ މީހާ މަރުވީ، ތެޔޮ ގަތުމަށް ކިއުގައި ހުރި 70 އަހަރުގެ މީހާ މަރުވިތާ 24 ގަޑިއިރު ނުވަނީސް ކަމަށް ލަންކާ ފުލުހުންނާ ހަވާލާދީ ރިޕޯޓުކޮށްފައިވެއެވެ.

ސްރީލަންކާގެ ގިނަ އަދަދެއްގެ ރައްޔިތުން ޕެޓްރޯލް ޝެޑުތަކުގައި ދިގު ކިއުތައް ހަދައިގެން އެތައް ގަޑިއިރުތަކެއް ވަންދެން ވެހިކަލްތަކަށް ތެޔޮ އެޅުމަށްޓަކަައި މަޑުކުރަންޖެހިފައިވާއިރު، ތެލުގެ އާ ސަޕްލައިތަައް ނައުމުގެ ސަބަބުން ބައެއް ޕެޓްރޯލް ޝެޑުތައް ވަނީ ބަންދުވެސް ކޮށްފައެވެ. ނޫސްތަކުން ރިޕޯޓުކުރާ ގޮތުގައި ދެ ކިލޯމީޓަރަށް ވުރެ ދިގު ކިއުތައް ބައެއް ހިސާބުތަކުގައި ވަނީ ހަދާފައެވެ.

ތެޔޮ ލިބުމަށް ދަތިވެ، ދުވާލަކު ފަސް ގަޑިއިރަށް ކަރަންޓުގެ ޚިދުމަތް މެދުކަނޑާލުމަށްވެސް ލަންކާގެ ސަރުކާރަށް މިދިޔަ ފެބްރުއަރީ މަހުން ފެށިގެން ވަނީ މަޖުބޫރު ވެފައެވެ. 

މީގެ އިތުރުން ކާބޯތަކެތީގެ އަގުތައް މައްޗަށް ގޮސް، ގޭސްފަދަ އަސާސީ ވަސީލަތްތައް ވެސް ލިބުމުގައި ދަތިތަކާ ވަނީ ކުރިމަތިލާން ޖެހިފައެވެ.