އިންޑިއާއިން އިމްޕޯޓްކުރާ އެމެރިކާ ތެލުގެ ނިސްބަތް 11 އިންސައްތަ އިތުރުވާނެ ކަމަށް އެގައުމުގެ ސަރުކާރުގެ އޮފިޝަލަކު ވިދާޅުވެއްޖެއެވެ.
ރޮއިޓަރސްގައި ރިޕޯޓްކޮށްފައިވާ ގޮތުން އިންޑިއާ ސަރުކާރުގެ އޮފިޝަލަކު ވަނީ މިއަހަރު އިންޑިއާއިން އިމްޕޯޓްކުރާ އެމެރިކާ ތެލުގެ ނިސްބަތް އިތުރުވާނެ ކަމަށް ވިދާޅުވެފައެވެ. އަދި މިއީ ރަޝިއާ ޔޫކްރެއިން ހަނގުރާމަ އާއި ގުޅިގެން ރަޝިއާގެ ތެޔޮ އިމްޕޯޓްކުރުމާއި ދެކޮޅަށް ގައުމުތަކުން ގެންގުޅޭ އުސޫލުގެ ސަބަބުން އަންނާނެ ބަދަލެއް ކަމަށް ވަނީ ފާހަގަކޮށްފައެވެ.
ތެލުގެ ބާޒާރަށް އަންނަމުންދާ ބަދަލާއެކު އިންޑިއާއިން ދަނީ އެގައުމަށް ގައުމުތަކުން ސަޕްލައި ކުރާ ތެލަށް އަންނާނެ ބަދަލުތަކަށް ވިސްނައި ފިޔަވަޅުތައް އަޅަމުންނެވެ. އަދި ރަޝިއާގެ ތެޔޮ އިމްޕޯޓްކުރުން އިންޑިއާއިން ހުއްޓާލާނެ ކަމަކަށްވެސް އިންޑިއާއިން ބުނެފައެއް ނުވެއެވެ.
އިންޑިއާއިން ރަޝިއާ އާއި ބާއްވާ ގާތްގުޅުމުގެ ސަބަބުން ހުޅަނގުގެ ގައުމުތަކުގެ ފާޑުކިޔުން ވަނީ އެގައުމަށް އަމާޒުވެފައެވެ. ރަޝިއާ އާއި ޔޫކްރެއިނާއި ދެމެދު ހިނގަމުންދާ ހަނގުރާމަ ހުއްޓާލައި ސުލްހައިގެ ވާހަކަތައް ފެށުމަށް އިންޑިއާއިން ގޮވާލާފައި ވީނަމަވެސް އެގައުމުން ރަޝިއާ އާއި ވިޔަފާރީގެ ގުޅުން ބާއްވާނަމަ އެއީ ހަނގުރާމައަށް ރަޝިއާއަށް ފަންޑު ފޯރުކޮށްދެނީ ކަމަށް ހުޅަނގުގެ ގައުމުތަކުން ދަނީ ބުނަމުންނެވެ. އަދި ރަޝިއާއާއި ދެކޮޅަށް އިންޑިއާއިން ސީދާ ތެދުވެފައި ނުވާތީވެސް އެގައުމަށް ވަނީ ފާޑުކިޔުންތައް އަމާޒުވެފައެވެ.
އިންޑިއާއިން އެންމެ ގިނަ އަދަދެއްގެ ތެޔޮ އިމްޕޯޓްކުރަނީ މެދު އިރުމަތީގެ ގައުމުތަކުންނެވެ. އެމެރިކާއަކީ އިންޑިއާއިން ހަތަރު ވަނައަށް އެންމެ ގިނަ އަދަދަކަށް ތެޔޮ އިމްޕޯޓްކުރާ ގައުމެވެ. އެގޮތުން އިންޑިއާއަށް އިމްޕޯޓްކުރާ ތެލުގެ 23 އިންސައްތަ އިރާގުން ސަޕްލައި ކޮށްދޭއިރު، އެގައުމަށް އިމްޕޯޓްކުރާ ތެލުގެ 18 އިންސައްތަ ސަޕްލައި ކުރަނީ ސައުދީ އަރަބިޔާއިންނެވެ. އިންޑިއާ ތެޔޮ ސަޕްލައިގެ 11 އިންސައްތަ ހިއްސާކުރަނީ ޔޫއޭއީންނެވެ. އަދި އެގައުމަށް އެތެރެކުރާ ތެލުގެ 8 އިންސައްތަ މިއަހަރު ހިއްސާކުރާނެ ކަމަށް ލަފާކޮށްފައި ވަނީ އެމެރިކާއިންނެވެ.
ރަޝިއާއަކީވެސް އިންޑިއާގެ ތެޔޮ ސަޕްލަޔަރެކެވެ. ނަމަވެސް ފެބްރުއަރީ 24 ގައި ރަޝިއާއިން ޔޫކްރެއިނަށް ހަމަލާންދޭން ފެށުމާއެކު އެގައުމާއި ދެކޮޅަށް އަޅަން ފެށި ދަތިކުރުމުގެ ފިޔަވަޅުތަކާއެކު ރަޝިއާއިން މިހާރު ދަނީ އެގައުމުގެ ތެޔޮ ޑިސްކައުންޓް އަގުގައި ވިއްކަމުންނެވެ.
އިންޑިއަން އޮއިލް ކޯރޕް އިން ވަނީ ޓެންޑަރ މެދުވެރިކޮށް ރަޝިއާގެ ތިން މިލިއަން ތެޔޮ ފީފާ އޯޑަރުކޮށްފައެވެ. އަދި ހިންދުސްތާން ޕެޓްރޯލިއަމް ކޯރޕް އިން ވަނީ މެއި މަހު ގަތުމަށް ރަޝިއާގެ 2 މިލިއަން ތެޔޮ ފީފާ ބުކްކޮށްފައެވެ.
އިންޑިއާ ސަރުކާރުން ވަނީ އެގައުމުން ހުރިހާ ގައުމެއްގެ ތެޔޮ ގަންނަން ތައްޔާރަށް އޮތްކަމަށް ބުނެފައެވެ. ހާއްސަކޮށް ތެލުގެ ބާޒާރަށް ބޮޑެތި ބަދަލުތަކެއް އަންނަމުންދާ މިދަނޑިވަޅުުގައި އެގައުމަށް ސަޕްލައި ކުރާ ހުރިހާ ގައުމަކުންވެސް ރަނގަޅު އަގުތަކެއްގައި ތެޔޮ ލިބޭ ނަމަ އިންޑިއާއިން ގަންނާނެ ކަމަށް އެގައުމުގެ ސަރުކާރުން ފާހަގަކުރެއެވެ. އަދި މިހާރުވެސް ރަޝިއާގެ ތެލާއި ގޭސް އިމްޕޯޓްކުރާ ޔޫރަޕްގެ ގައުމުތައް އެބަހުރި ކަމަށާއި އެކަން އެހެން އޮއްވާ އިންޑިއާއިން ރަޝިއާގެ ތެޔޮ އިމްޕޯޓްކުރުން ގައުމުތަކަށް މަނާ ނުކުރެވޭނެ ކަމަށް ސަރުކާރުގެ އޮފިޝަލަކު ވަނީ ވިދާޅުވެފައެވެ.
މީގެއިތުރުން އިންޑިއާއިން ރަޝިއާ އާއެކު އޮންނަ ތެލުގެ ވިޔަފާރީގެ މުއާމަލާތް ސިޔާސީ ނުކުރުމަށްވެސް އެޤައުމުގެ ސަރުކާރުގެ އޮފިޝަލް ވަނީ ގޮވާލާފައެވެ. ވަކިން ހާއްސަކޮށް އަމިއްލައަށް ތެޔޮ އުފައްދާ ގައުމުތަކާއި އަދިވެސް ރަޝިއާއިން ތެޔޮ އިމްޕޯޓްކުރާ ގައުމުތަކަށް އިންޑިއާ ކުށްވެރި ނުކުރެވޭނެ ކަމަށް އޭނާ ވަނީ ވިދާޅުވެފައެވެ.
