ރަޝިއާއަށް އެލުމިނީ އެކްސްޕޯޓްކުރުން އޮސްޓްރޭލިއާއިން މަނާކޮށްފި

ރަޝިއާއަށް އެލުމިނީ އެކްސްޕޯޓްކުރުން އޮސްޓްރޭލިއާއިން މަނާކޮށްފިއެވެ.

ރަޝިއާ ޔޫކްރެއިންގެ ހަނގުރާމަ އާއި ގުޅިގެން ރަޝިއާ އާއި ދެކޮޅަށް ގިނަ ފިޔަވަޅުތަކެއް އޮސްޓްރޭލިއާއިން ދަނީ އަޅަމުންނެވެ. އެގޮތުން އޮސްޓްރޭލިއާއިން މިވަނީ އެގައުމުގެ އެލުމިނީ ރަޝިއާއަށް އެކްސްޕޯޓްކުރުން މަނާކޮށް ޔޫކްރެއިނަށް ކޯލް އެކްސްޕޯޓް ކުރާ ވަރު އިތުރުކުރަން ނިންމާފައިވާކަމަށް އެގައުމުގެ ބޮޑުވަޒީރު ސްކޮޓް މޮރިސަން އާދިއްތަ ދުވަހު ވިދާޅުވެފައެވެ.

އޮސްޓްރޭލިއާގެ ބޮޑުވަޒީރު ވަނީ އެގައުމުން ރަޝިއާއަށް އެލުމިނީ އެކްސްޕޯޓްކުރުން ހުއްޓާލުމުން ރަޝިއާ އިން އުފައްދާ އެލުމިނިއަމްގެ އުފެއްދުންތެރިކަން ދަށަށްދާނެކަން ފާހަގަކުރައްވާފައެވެ.

މިހާތަނަށް އައިރު އޮސްޓްރޭލިއާއިން ވަނީ ރަޝިއާގެ 443 މީހުންނާ 33 އިދާރާއަކާއި ދެކޮޅަށް 476 ދަތިކުރުމުގެ ފިޔަވަޅުތައް އިއުލާނުކޮށްފައެވެ.

ރަޝިއާއާ ދެކޮޅަށް ދަތިކުރުމުގެ ފިޔަވަޅުތައް އަޅަމުންދާއިރު، އޮސްޓްރޭލިއާއިން ދަނީ ޔޫކްރެއިނަށް ގިނަ އެހީތަކެއް ފޯރުކޮށްދެމުންނެވެ. އެގޮތުން އާދިއްތަ ދުވަހު ބޮޑުވަޒީރު ސްކޮޓްވަނީ ރަޝިއާއާ ދެކޮޅަށް އަޅާ އައު ފިޔަވަޅުތައް އިއުލާނުކުރުމަށްފަހު އޮސްޓްރޭލިއާއިން ޔޫކްރެއިނަށް 21 މިލިއަން އޮސްޓްރޭލިއަން ޑޮލަރުގެ އަސްކަރީ އެހީ ފޯރުކޮށްދޭން ނިންމާފައިވާކަން އިއުލާނުކޮށްފައެވެ. އަދި އިންސާނީ އެހީގެ ގޮތުގައި 30 މިލިއަން އޮސްޓްރޭލިއަން ޑޮލަރު ދިނުމަށް ވަނީ ނިންމާފައެވެ.

މީގެ އިތުރުން، އޮސްޓްރޭލިއާއިން ވަނީ ޔޫކްރެއިނަށް 70،000 ޓަނުގެ ތަރމަލް ކޯލް ފޮނުވަންވެސް ނިންމާފައެވެ.