ރާއްޖޭގެ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ކޮވިޑް-19 ގެ ބަލިމަޑުކަމުގެ ތެރޭގައި ރާއްޖޭގެ އިޤްތިސާދު ހިފަހައްޓަވައި، އެ ޙާލަތު މެނޭޖް ކުރެއްވުމަށް ކުރެއްވި މަސައްކަތް ފާހަގަ ކުރައްވައި އެ މަސައްކަތަށް ދި ލަކްސް ރިސޯޓްސް އެންޑް ހޮޓެލްސް ގެ ސީއީއޯ ޕޯލް ޖޯންސް ތައުރީފު ކުރައްވައިފިއެވެ.
ލަކްސް ރިސޯޓުގެ ސްޓާފް ބައްދަލްވުމެއްގައި ވާހަކަ ދައްކަވަމުން ޕޯލް ވިދާޅުވީ، އެހެން އެއްވެސް ޤައުމަކަށް ކޮވިޑުގެ ޙާލަތު މެނޭޖް ނުކުރެވޭ ފެންވަރަށް ރާއްޖެއިން މި ޕެންޑަމިކް މެނޭޖް ކޮށްފައިވާކަމުގެ އެއްވެސް ޝައްކެއް ނެތް ކަމަށެވެ. އެކަމަށްޓަކައި ހުރިހާ ދިވެހިންވެސް ފަޚުރުވެރިވާން ޖެހޭ ކަމަށް ޕޯލް ވިދާޅުވިއެވެ.
ޕޯލް ވަނީ އެކަން ޙާސިލު ކުރުމުގައި ސަރުކާރުގެ މުޅި ލީޑަރޝިޕްއާއި ރާއްޖޭގެ ރައީސުލްޖުމްހޫރިއްޔާގެ އިތުރުން، ކެބިނެޓްގެ ވަޒީރުން ކުރެއްވި މަސައްކަތްތައް ފާހަގަ ކުރައްވައި އެއީ ދިވެހިން ފަޚުރުވެރިވުން ޙައްޤު މަސައްކަތްތަކެއްކަމަށް ވިދާޅުވެފައެވެ.
މީގެ އިތުރުން ޕޯލް ވަނީ މިއަދުގެ ލީޑަރޝިޕްއަކީ ކަންކަމާ ކުރިމަތިލުމުގެ ޤާބިލުކަން ލިބިފައިވާ އަދި ދުރުވިސްނޭ ލީޑަރޝިޕެއްގެ ގޮތުގައި ސިފަ ކުރައްވާފައެވެ. ވަކިން ޚާއްސަކޮށް، މިއަދުގެ ލީޑަރޝިޕް އިން ރަނގަޅު ދަނޑިވަޅުތަކުގައި ރަނގަޅު ނިންމެވުންތައް ނިންމަވާކަމަށްވެސް އޭނާ ވަނީ ވިދާޅުވެފައެވެ. ރާއްޖޭގެ ރައީސް އާއި، ކެބިނެޓް ވަޒީރުން ކޮންމެ ދުވަހަކުވެސް އަވަދިނެތި އުޅުއްވަނީ އެ މަސައްކަތުގައިކަމަށް އޭނާ ވިދާޅުވިއެވެ.
