ކުރިއަށް އޮތް ހަފްތާ ތެރޭގައި ބާޖަމާލުއްދީން ހުސްކޮށް ނިމޭނެ: އީސީ
މިދިޔަ މަހު ސާމާނުތައް ޕެކް ކުރުމުގެ މަސައްކަތް ފަށާފައިވޭ
އިންތިޚާބާ ބެހޭ މަރުކަޒު ހިންގަމުންދިޔަ ބާ ޖަމާލުއްދީން ސްކޫލް
ކުރިއަށް އޮތް ހަފްތާ ތެރޭގައި ބާޖަމާލުއްދީން ސްކޫލް ހުސްކޮށް ނިމޭނެ ކަމަށް އިލެކްޝަން ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.
އީސީގެ އިންތިޚާބާ ބެހޭ މަރުކަޒު ހިންގާ ބާޖަމާލުއްދީން ސްކޫލް ހުސްކުރަން އަންގާފައިވަނީ އަރަބިއްޔާގެ ސްކޫލުގެ އާ އިމާރާތް އެބިމުގައި އެޅުމަށެވެ. ބާޖަމާލުއްދީންގައި އަރަބިއްޔާގެ އާ އިމާރާތް އެޅުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނިންމެވީ މިދިޔަ ޑިސެމްބަރު މަހު އެވެ.
އިލެކްޝަންސް ކޮމިޝަންގެ ރައީސް ފުއާދު ތައުފީގު ރާއްޖެއެމްވީއަށް ވިދާޅުވީ ބާޖަމާލުއްދީން ހުސްކުރުމުގެ މަސައްކަތް މިދިޔަ މަހުން ފެށިގެން ކުރިއަށްދާ ކަމަށެވެ. ވަރަށް ބޮޑަށް ބާވެ ރައްކާތެރި އިމަރާތަކަށް ނުވުމާއެކު، ހުސްކުރަން އެންގުމާއެކު ޕެކިންގެ މަސައްކަތްތަށް ފަށައިގެން ކުރިއަށްދާކަން އޭނާ ފާހަގަކުރެއްވިއެވެ.
ފުއާދު ވިދާޅުވީ ބާޖަމާލުއްދީންގައި އެކޮމިޝަނުންގެ 4 ސެކްޝަން ހިންގަމުންދާ ކަމަށާއި، ގިނަ އަދަދެއްގެ އާލާތްތައް ގެންދަން ޖެހޭ ކަމަށެވެ. އެގޮތުން މިދިޔަ ހުކުރު ހޮނިހިރު ދުވަހު ވެސް ބުރަކޮށް މަސައްކަތް ކޮށް ގިނަ އަދަދެއްގެ ސާމާނު ބަދަލުކޮށްފައިވާ ކަމަށް ފުއާދު ވިދާޅުވިއެވެ. ފުއާދު ވިދާޅުވީ ވޯޓު ފޮށިތަކާއި ބައެއް އެހެނިހެން ސާމާނުތައް އަރަބިއްޔާ އިމާރާތަށް ބަދަލުކޮށްފައިވާ ކަމަށެވެ. އަދި އެތަނުގައި މަސައްކަތް ކުރަމުންދިޔަ ކޮމިޝަންގެ މުވައްޒަފުން މިހާރު މަސައްކަތް ކުރަމުންދާނީ އީސީގެ މައި އޮފީހުގައި ކަމަށް ވިދާޅުވިއެވެ.
ބާޖަމާލުއްދީން ހުސްކުރުމުގެ މަސައްކަތް ލަސްވި ސަބަބަށް އިޝާރަތް ކުރައްވާ ފުއާދު ވިދާޅުވީ ގިނަ އަދަދެއްގެ މުއައްޒަފުންނާއެކު މަސައްކަތްކުރާ އޮފީހަކަށް ކޮމިޝަނަށްވާއިރު، އެކަށީގެންވާ އިމާރާތެއް ބޭނުންވާ ކަމަށެވެ. މިދިޔަ ދުވަސްތަކުގައި އީސީއަށް އެކަށީގެންވާ އިމާރަތެއް ހަމަނުޖެހޭ ކަމަށް ފުއާދު ވިދާޅުވިއެވެ. އަދި ވިދާޅުވީ ވަގުތީ ގޮތުން އަރަބިއްޔާ ސްކޫލަށް ބަދަލުވެވޭނެކަން އެޑިޔުކޭޝަން މިނިސްޓްރީން އެންގީ މިދިޔަ ބުރާސްފަތި ދުވަހު ކަމަށެވެ.
މީގެ އިތުރުން ފުއާދު ވިދާޅުވީ އަރަބިއްޔާ ސްކޫލުގެ އިމާރަތް ވެސް ވަނީ ވަރަށް ބޮޑަށް ހަލާކުވެފައި ކަމަށެވެ. އެ އިމާރާތް ވެސް މިއަހަރުގެ ފަހުކޮޅު ހުސްކުރަންޖެހޭ ކަމަށް އޭނާ ވިދާޅުވިއެވެ. އެގޮތުން އީސީއަށް ދާއިމީ އިމާރާތެއް ހޯދުމަށް ކުރިއަށް އޮތް ދުވަސްތަކުގައި މަސައްކަތް ކުރައްވާނެ ކަމަށާއި، މިހާރު ވެސް މަޝްވަރާތައް ކުރިއަށްދާ ކަމަށް އޭނާ ވިދާޅުވިއެވެ. އަދި ވިދާޅުވީ މިކަމުގެ ސަބަބުން ކޮމިޝަނުންގެ މަސައްކަތްތަކަށް ކޮންމެވެސް ވަރެއްގެ ލަސްކަމެއް ކުރިމަތިވާނެ ކަމަށެވެ. ނަމަވެސް މެނޭޖްކޮށްގެން މަސައްކަތްތައް ކުރިއަށް ގެންދަވާނެ ކަމަށް ފުއާދު ވިދާޅުވިއެވެ.
