ސިޔާސީ ޕާޓީ ޕީޕީއެމުން ކައުންސިލް އިންތިޚާބުތަކުގައި ވާދަކުރައްވާތީ އަޖާއިބު ވެވަޑައިގަންނަވާ ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކުރެންދޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓްގެ ކެމްޕެއިން ޖަލްސާގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ، ޕީޕީއެމްއަކީ ލާމަރުކަޒު އުސޫލާ މުޅިން އިދިކޮޅު ބައެއް ކަމަށެވެ. އެހެންކަމުން އިންތިކާބުތަކުގައި ވަދަކުރާތީ އަޖައިބުވެވަޑައިގަންނަވަކަމަށް ވިދާޅުވިއެވެ.
ރައީސް ޔާމިން އަދި ޕީޕީއެމްގެ ވިސްނުކަމީ ކުރެންދޫފަދަ ރަށްތައް އުވާލައި، މާލެ ކައިރީގައި ތަނެއް ހިއްކާފައި އެތަނަށް މީހުން ގެންދިޔުން ކަމަށާ، އެހެންކަމުން ތަރައްގީއަށް ވިސްނުމެއް ގެނެވޭނީވެސް ރަށްތައް އޮތުމަށް ވިސްނުން ގެންގުޅުއްވައިގެން ކަމަށް ރައީސް ނަޝީދު ވިދާޅުވިއެވެ.
ފާދިއްޕޮޅަށް އަބަދުވެސް ބޮޑު ތަސައްވުރެއް އޮންނަ ކަމަށާއި، އެއީ ނައިފަރާއި ހިންނަވަރު ގުޅުވާލުން ކަމަށް ރައީސް ނަޝީދު ވިދާޅުވިއެވެ. އެއާއެކު ފާދިއްޕޮޅުގައި 25،000 އަށްވުރެ ގިނަ ރައްޔިތުންނަށް ދިރިއުޅެވޭނެ ކަމަށެވެ. އަދި ރާއްޖޭގެ ކޮންމެ ހިސާބެއްގެ ރައްޔިތުންނަށްވެސް އެތަނުން ގޯތިދެވެންވާނެ ކަމަށާއި، މިކަމަށް ކައުންސިލްތަކުން ނޫނެކޭ ނުބުނާނެ ކަމުގެ ޔަގީންކަން އެބައޮތް ކަމަށް ވިދާޅުވިއެވެ. ރަށް ހިއްކުމަށްވުރެ ރަށްތައް ގުޅުވާލުން މުހިންމުކަމަށްވެސް އެމަނިކުފާނު ވިދާޅުވިއެވެ.
ކުރެންދޫގައި އޮތް އެންމެ ބޮޑު މައްސަލައަކީ ބޯހިޔަވަހިކަމުގެ މައްސަލަ ކަމަށާއި، މި މައްސަލައަށް ހައްލު ހޯދުމަށް މަސައްކަތް ކުރަމުންދާ ކަމުގައި ވިދާޅުވިއެވެ. ބިމަށް ޖެހިގެން ހާލުގައި ޖެހިފައިވާ މީހުންގެ ކަންކަން ވަރަށް ރަނގަޅަށް އެނގިވަޑައިގަންނަވާ ކަމުގައި ވިދާޅުވިއެވެ.
ރައީސް ނަޝީދު ވިދާޅުވީ އެމްޑީޕީ އިން ވޯޓަށް އަހަނީ ކަންކަން ހައްލު ކުރެވިދާނެކަމަށް ދެކިގެން ކަމަށާއި، އެމްޑީޕީގެ މެނިފެސްޓޯއަކީ ރަށްރަށުގެ މައްސަލައަށް ހައްލު ހޯދައިދޭނެ މެނިފެސްޓޯއެއްކަމަށެވެ. ބިންހިއްކެން ނެތުމުން ނުހިއްކާ އަދި ދިރިއުޅެވޭނެ ގޮތުގެ ޓެކްނޮލޮޖީ މިދަނީ ފެންނަމުން ކަމަށާއި، އޭގެ މިސާލަކީ ނެދަރލެންޑުން ހަދަމުންދާ ފްލޯޓިން ސިޓީ ކަމުގައި ވިދާޅުވިއެވެ. އަދި ބޯހިޔާވަހިކަމުގެ މައްސަލައަށް މިހާރު އޮތް ވަގުތީ ހައްލަކީ ފްލެޓް ދިނުން ކަމަށާއި، އެކަން ކުރާނީ ކޮން ޕްރޮޖެކްޓަކުންތޯ އެއީ ނިންމަންޖެހިފައި އޮތް ކަމެއް ކަމަށް ރައިސް ނަޝީދު ވިދާޅުވިއެވެ.
ރައީސް ސާލިހުގެ ސަރުކާރުން ކޮށްފައިވާ ކަންކަން ވަރަށް ގިނަ ކަމަށާއި، އެންމެ ކުޑަ އުޖޫރަ އާއެކު އައި ބަދަލުވެސް ފެނިގެން ގޮސްފިކަން ފާހަގަކުރެއްވިއެވެ. ރާއްޖެގައި މަސައްކަތްކުރާ މީހުންނަށް އެކަށީގެންވާ އުޖޫރައެއް ދޭން ޖެހޭކަން އެމްޑީޕީން ދެނެގަނެ އެކަމަށް މަސައްކަތްކުރާތާ ދުވަސްތަކެއްވީފަހުން، އެމްޑީޕީގެ މެޖޯރިޓީއާއެކު އެކަން މިހާރު މިއޮތީ ހަމަޖެހިފައި ކަމަށް ވިދާޅުވިއެެވެ.
ކުރެންދޫގެ ކައުންސިލް ރައީސަކު ހޮވުމަށް ބައި އިލެކްޝަން ބާއްވަނީ އެ ކައުންސިލްގެ ރައީސަކަށް ކުރިން ހުރި އެމްޑީޕީގެ ކައުންސިލަރ އިބްރާހިމް ސިމާއު އެ މަގާމުން އިސްތިއުފާދެއްވުމާ ގުޅިގެންނެވެ.
އެމްޑީޕީން ވާދަކުރަނީ އަލީ ނަސީމް އެވެ. ޕީޕީއެމް އިން މި ދާއިރާ އަށް ނެރެނީ ކުރިން ވެސް ކުރެންދޫ ކައުންސިލްގެ ރައީސް ކަން ކުރެއްވި އިސްމާއީލް މަދީހު އެވެ.
