އިންޑިއާ އައުޓް ހަރަކާތަކީ ރައީސް ޔާމީން ވެރިކަމުގެ އުންމީދުގައި ހިންގަވަ ހަރަކާތެއް - ރައީސް ނަޝީދު
ރާއްޖެއަށް ގެއްލުންވާނެ އެއްވެސް ކަމެއްގައި އެއްވެސް މީހަކު އަދި އެއްވެސް ޕާޓީއަކުން ބައިވެރިވުމަކީ ބުއްދިވެރި ކަމެއްނޫން
ރައީސް މުހައްމަދު ނަޝީދު ކުރެންދޫގެ ޖަލްސާގައި ވާހަކަފުޅުދައްކަވަނީ
އިންޑިއާ އައުޓް ހަރަކާތަކީ ކުރީގެ ރައީސް ޔާމީން ވެރިކަމުގެ އުންމީދުގައި ހިންގަވާ ނުރައްކާތެރި ހަރަކާތެއް ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވިއެވެ.
ކުރެންދޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓްގެ ކެމްޕެއިން ޖަލްސާގައި ކުރެންދޫގައި ވާހަކަފުޅުދައްކަވަމުން ރައިސް ނަޝީދު ވިދާޅުވީ، އިންޑިއާ އައުޓް ކަމަށް ވިދާޅުވެގެން ރައީސް ޔާމިން އެކުރައްވަނީ ވަރަށް ނުރައްކާތެރިކަމެއް ކަމަށެވެ. ރާއްޖޭގެ އިސްތިގުލާލަށް މިއަށްވުރެ ގެއްލުން ހުރި މަސައްކަތެއް އަދި މިހާ ނުރައްކާތެރިކަމެއް އެއްވެސް ބޭފުޅަކު މިހާތަނަށް ކުރައްވާފައިނުވާ ކަމަށް ރައީސް ނަޝީދު ވިދާޅުވިއެވެ. ރައީސް ޔާމީން އެކަން ކުރައްވަނީ އެނގިވަޑައިގެންހުންނަވާ ކަމަށާއި، ރައީސް ޔާމީންގެ ބޭނުންފުޅަކީ ރާއްޖެއާ ދޭދޭ ގައުމުތަކާ ދެމެދު ނަފްރަތު އުފެއްދެވުން ކަަމަށް ވިދާޅުވިއެވެ.
ރާއްޖެ މިނިވަންކަން ހޯދާފައި ވަނީ އަވަށްޓެރިންނާ ގުޅިގެން ކަމަށާއި، އެނގިވަޑައިގެން ހުންނަވާ އެކުރައްވަނީ ރާއްޖެ އަނދަވަޅަކަށް ވައްޓާލެއްވުމަށް ކުރައްވާ މަސައްކަތެއް ކަމުގައި ރައީސް ނަޝީދު ވިދާޅުވިއެވެ. އަދި އެއީ ރައީސް ޔާމިން ވެރިކަމުގެ އުންމީދުގައި ކުރައްވާ ކަމެއް ކަމަށް ވިދާޅުވިއެވެ.
ރައީސް ޔާމީން އެކުރައްވާ ފަދަ ގޮތަށް މަސައްކަތް ކުރެއްވި ވެރިން ތަރީޚުގައި ފެނި އެކަމުގެ ނަތީޖާވެސް ދިވެހިންނަށް ފެނިފައިވާކަމަށް ނަޝީދު ވިދާޅުވިއެވެ.
އަދި ރައީސް ޔާމީން އަމާޒުކުރައްވާފަވަނީ ކޮންމެ ފަދަ ކަމެއް ކުރައްވައިގެން ވެސް ވެރިކަމަށް ވަޑައިގަތުންކަމަށާ، ނަމަވެސް ދިވެހިންނަށް ގެއްލުން ލިބޭނެ ގޮތަކަށް އެކަން ކުރުމަކީ އެއްވެސް ގޮތަކަށް ރަނގަޅު ކަމެއް ނޫންކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، ވަރަށް އިހުލާސްތެރި ކަމާއެކު ޕީޕީއެމްގެ ހުރިހާ މެމްބަރުންނަށް ދަންނަވާލަން ބޭނުންފުޅުވަނީ، ރައީސް ޔާމީނާއި، ޕީޕީއެމްއަށް ތާއީދުކުރުން އެއީ ވަކި ކަމެއް ކަމަށެވެ. އެހެންނަމަވެސް ދިވެހި ރާއްޖެއަށް ގެއްލުންވާނެ އެއްވެސް ކަމެއްގައި އެއްވެސް މީހަކު އަދި އެއްވެސް ޕާޓީއަކުން ބައިވެރިވުމަކީ ބުއްދިވެރި ކަމެއްނޫން ކަމަށެވެ.
