އޯޕެކްގެ އެއްބަސްވުން ދެމެހެއްޓުން މުހިންމު: ސައުދީ ވަލީއަހުދު
ތެޔޮ ބާޒާރުގެ އަގުތައް އެއްވަރެއްގައި ހިފޭއްޓުން މުހިންމު ކަމަށް ދެބޭފުޅުން އެއްބަސްވެ ވަޑައިގެންނެވި
ސައުދީ ވަލީއަހުދު މުހައްމަދު ބިން ސަލްމާން
އޯގަނައިޒޭޝަން އޮފް ޕެޓްރޯލިއަމް އެކްސްޕޯޓިން ކަންޓްރީޒް (އޯޕެކް)ގެ އެއްބަސްވުން ދެމެހެއްޓުން މުހިންމު ކަމަށް ސައުދީ ވަލީއަޙްދު މުހައްމަދު ބިން ސަލްމާން ވިދާޅުވެއްޖެއެވެ.
ސައުދީ ވަލީއަހުދު މިހެން ވިދާޅުވެފައި ވަނީ ޖަޕާނުގެ ބޮޑުވަޒީރު ފުމިއޯ ކިޝިޑާ އާ ފޯނުން ގުޅުއްވާ ދެއްކެވި ވާހަކަފުޅުގައެވެ.
ވަލީއަޙްދު މުހައްމަދު ބިން ސަލްމާން ވަނީ އޯޕެކް އެއްބަސްވުން ދެމެހެއްޓުން މުހިންމު ކަމުގެ އިތުރުން ތެޔޮ ބާޒާރުގެ އަގުތައް އެއްވަރެއްގައި ހިފެހެއްޓުމުގެ މުހިންމުކަމާ ގުޅޭގޮތުންވެސް ވާހަކަފުޅު ދައްކަވާފައި ކަމަށް ސައުދީ ސަރުކާރުން ބުނެއެވެ. އޭގެ އިތުރުން ތެލުގެ އަގުތައް އުފުލުނަ ނުދީ އެއްވަރެއްގައި ހިފޭއްޓުމަށް ސައުދީން މަސައްކަތްކުރާނެ ކަމަށްވެސް ވަލީއަހުދު ވަނީ ވިދާޅުވެފައެވެ.
ސައުދީ ވަލީއަޙްދު މިމޭރުމުން ވާހަކަފުޅު ދައްކަވާފައި މިވަނީ ރަޝިއާ ޔޫކްރެއިން ހަނގުރާމައާ ގުޅިގެން ރަޝިއާގެ ތެޔޮ އެތެރެކުރުން ގައުމުތަކުން މަނާކުރަމުންދާ ދަނޑިވަޅެއްގައެވެ. އަދި މީގެ ސަބަބުން ތެލުގެ އަގަށް ދަނީ ބޮޑެތި ބަދަލުތަކެއް އަންނަމުންނެވެ.
މިނިމުނު ހަފުތާގައި އިނގިރޭސި ބޮޑުވަޒީރު ވަނީ އެގައުމަށް ތެޔޮ އިމްޕޯޓްކުރާ ވަރު އިތުރުކުރުމުގެ މަޝްވަރާތައް ކުރުމަށް ޔޫއޭއީއަށް ވަޑައިގަންނަވާފައެވެ. އަދި އެދަތުރުފުޅު ނިންމަވާ ލެއްވުމަށްފަހު ސައުދީއަރޭބިޔާ އަށް ވަޑައިގެން އެގައުމުގެ ވަލީއަހުދު މުހައްމަދު ބިން ސަލްމާން އާ ބައްދަލުކުރައްވަންވެސް ވަނީ ނިންމަވާފައެވެ.
ސައުދީ ވަލީއަޙްދު، ޖަޕާނުގެ ބޮޑުވަޒީރަށް ބުރާސްފަތި ދުވަހު ކުރެއްވި ފޯނުކޯލުގައި ޔޫކްރެއިންގެ މިހާރުގެ ހާލަތާ ގުޅޭގޮތުންވެސް ދެ ބޭފުޅުން ވަނީ މަޝްވަރާކުރައްވާފައެވެ.
