ލޯކަލް ކައުންސިލް އިންތިޚާބުގެ ކުރެންދޫ ކައުންސިލްގެ ރައީސްގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް އަލީ ނަސީމްގެ ކެމްޕެއިނަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޅ. ކުރެންދޫއަށް ވަޑައިގެންފިއެވެ.
ހުކުރު ދުވަހުގެ ހަވީރު އެމަނިކުފާނު ކުރެންދޫއަށް ވަޑައިގެންފައިވާއިރު އެ ރަށުން އެމަނިކުފާނަށް ވަނީ ހޫނު މަރުހަބާއެއް ދަންނަވާފައެވެ. ރައީސް ނަޝީދު އެ ރަށަށް ވަޑައިގެންފައިވާއިރު އެމަނިކުފާނު ޢަލީ ނަސީމުގެ ކެމްޕެއިން ޖަލްސާގައި ބައިވެރިވެވަޑައިގަންނަވާނެއެވެ. މި ޖަލްސާ ބޭއްވުމަށް ހަމަޖެހިފައިވަނީ ހުކުރު ދުވަހުގެ ރޭ 8:30 ގައި ކުރެންދޫ ދެކުނު އަވަށު މައިޒާނުގައެވެ.
ލޯކަލް ކައުންސިލް އިންތިޚާބުގެ ކުރެންދޫ ކައުންސިލްގެ ރައީސްގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް އަލީ ނަސީމްގެ ކެމްޕެއިން ޖަލްސާއެއް މި މަހުގެ ދެވަނަ ދުވަހު ވެސް ވަނީ ބާއްވާފައެވެ. މި ޖަލްސާގައި ވެސް އެމްޑީޕީގެ ގިނަ މެމްބަރުން ވަނީ ބައިވެރިވެވަޑައިގެންފައެވެ.
އެގޮތުން އެމްޑީޕީގެ ނާއިބު ރައީސް މުހައްމަދު ޝިފާޒް (ޝިއްޕެ) ވަނީ ކުރެންދޫ ކައުންސިލްގެ ރައީސްގެ ބައި-އިލެކްޝަންގައި އިންތިޚާބުގައި ވޯޓުލާން ނިކުމެ، ނަތީޖާ ސާފުކޮށްދިނުމަށް ކުރެންދޫ ރައްޔިތުންގެ ކިބައިން އެދިވަޑައިގެންފައެވެ.
ޝިފާޒް ވިދާޅުވީ އިދާރީ ދާއިރާތައް ހިންގަންވާނީ ލާމަރުކަޒީ އުސޫލުން ކަމަށާއި އެއީ އެހެން ޕާޓީއަކުން ރާއްޖެއަށް އުފަން ކުރުވި ވިސްނުމެއް ނޫން ކަމަށެވެ. އަދި އެއީ ރައްޔިތުން ބާރުވެރި ކުރުވުމަށް އެމްޑީޕީން އުފަން ކުރުވި ވިސްނުމެއް ކަމަށް އޭނާ ވިދާޅުވިއެވެ.
ރަށެއްގެ ރައްޔިތުންގެ ސީދާ މަސްލަހަތު ގުޅިފައި އޮތް ކަމެއްވާނަމަ ވޯޓުލާން ނުކުނަން ޖެހޭނެކަން ފާހަގަކުރައްވާ ޝިފާޒް ވިދާޅުވީ މި އިންތިޚާބު ކާމިޔާބު ކުރަންޖެހޭ ސަބަބަކީ މި ނިޒާމު ހަރުދަނާ ކުރުމަށް ކަމަށެވެ. އެހެންކަމުން ކުރެންދޫ ރައްޔިތުންގެ ފޯކަސް ގެއްލުވާ ނުލާ، މިއިންތިޚާބުގައި ވޯޓުލާން ނުކުމެ ނަތީޖާ ސާފުކޮށްދިނުމަށް ޝިފާޒް އެދިވަޑައިގެންނެވިއެވެ.
މި އިންތިޚާބު ކާމިޔާބު ކުރެވިއްޖެނަމަ އަތޮޅު ކައުންސިލްގެ ފުރިހަމަ މެޖޯރިޓީ ލިބިގެންދާނެ ކަމަށް ވެސް ޝިފާޒް ވިދާޅުވިއެވެ.
ޝިފާޒް އިތުރަށް ވިދާޅުވީ މި ވޯޓަކީ ހަމައެކަނި ކުރެންދޫގެ ރައްޔިތުންނާއި ގުޅިފައި އޮތް ވޯޓެއް ނޫން ކަމަށާއި މިއީ މުޅި ޅ. އަތޮޅުގެ ރައްޔިތުންގެ ތަރައްޤީއާއި ގުޅިފައިވާ ވޯޓެއް ކަމަށެވެ.
