އަމިއްލަ މަސްލަހަތަށްވުރެ އެހެން މީހުންގެ މަސްލަހަތު އިސްކޮށް އިހްސާންތެރިވުމަށް ޚުތުބާގައި ގޮވާލައިފި
18 މާރިޗު 2022 | ހުކުރު 08:41މުސީބާތާއި ތަކުލީފުގެ ވަގުތުގައި އެހެން މީހުންނަށް އެހީތެރިވެ ހަމްދަރުދީވާން ޖެހޭ
އިސްލާމީ މަރުކަޒުގައި ހުކުރު ނަމާދުކޮށް ނިމިގެން މީހުންތައް ދަނީ
އަމިއްލަ މަސްލަހަތަށްވުރެ އެހެން މީހުންގެ މަސްލަހަތު އިސްކޮށް އެމީހުންނަށް އަޅާލައި އިހްސާންތެރިވުމަށް ހުކުރު ޚުތުބާގައި ގޮވާލައިފިއެވެ.
އިޙްސާންތެރިވުން މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ތިމާގެ އަމިއްލަ މަސްލަހަތަށްވުރެ އެހެން މީހުންގެ މަސްލަހަތު އިސްކުރަން ޖެހޭ ކަމަށާއި، އެމީހުންނަށް އަޅާލައި އިހްސާންތެރިވާންޖެހޭ ކަމަށެވެ. ކޮންމެ މުސްލިމަކީ އިސްލާމީ އުޚުއްވަތްތެރިކަމުގެ ހަށިގަނޑުގައި ހިމެނޭ، އެއާ ވަކިނުކުރެވޭ ފަދަ ގުނަވަނެއް ކަމަށާއި، އެ ހަށިގަނޑު އުފުލަންޖެހޭ ކޮންމެ ވޭނެއް، ހުރިހައި ގުނަވަންތައް ހިއްސާކުރަން ޖެހޭ ކަމަށް ޚުތުބާގައި ބުނެފައިވެއެވެ. މިއީ މުސްލިމުންގެ މިސާލުގެ ގޮތުގައި ޚުތުބާގައި ފާހަގަކޮށްފައިވެއެވެ.
ޚުތުބާގައި ބުނީ އިންސާނުން ހައްދާވާފައިވަނީ އެއްބަނޑު އެއްބަފާ ބައެއްގެ ގޮތުގައި ކަމަށާއި، އެއްބަޔަކު އަނެއްބައެއްގެ އެހީތެރިކަމާއި، މަދަދަށް ބޭނުންވާނެ ކަމަށެވެ. ކޮންމެ އިންސާނަކީ ވެސް އެހެން މީހުންގެ އެހީތެރިކަމާއި އަޅައިލުން ބޭނުންވާނެ މީހެއްކަން ފާހަގަކޮށް ޚުތުބާގައި ބުނީ މުސީބާތާއި ތަކުލީފުގެ ވަގުތުގައި އެހެން މީހުންނަށް އެހީތެރިވެ ހަމްދަރުދީވާން ޖެހޭ ކަމަށެވެ. އަދި އެފަދަ ވަގުތުތަކުގައި އެމީހުންނަށް އެހީތެރިވެ އަޅައިލުމަކީ ވާޖިބެއް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މި މުޖުތަމައުގައި އެކިއެކި ކަންކަމުގައި އެހީތެރިކަމަށް ބޭނުންވާ ގިނަ ބަޔަކު އެބަތިބި ކަމަށެވެ. އެއް ބަޔަކަށް މާލީ އެހީތެރިކަން ބޭނުންވާއިރު، އަނެއްބަޔަކަށް ނަފްސާނީ އެހީތެރިކަން ބޭނުންވާ ކަމަށާއި، އަނެއް ބަޔަކަށް ހިތާމައާއި ހިތްދަތިކަމުން އަރައިގަނެވޭ ފަދަ އޯގާވެރިކަމުގެ ބަހެއް ބޭނުންވާ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މުޖުތަމައުގެ ނިކަމެތިންނާއި ފަގީރުންނަކީ މުޖުތަމައުގައި ނުހަނު މުހިއްމު ބައެއް ކަމަށާއި، އެމީހުންނަށް ހެޔޮ އެދިގެން ކުރެވޭ ހޭދައާ ފޯރުކޮށްދެވޭ އެހީތެރިކަމުގެ ސަބަބުން މުޖުތަމައު ގެ ގިނަ ބަޔަކަށް އޭގެ ލާބައާއި މަންފާ ކުރާނެ ކަމަށެވެ.
މީގެ އިތުރުން ޚުތުބާގައި ބުނީ އިސްލާމް ދީނުގައި އިހްސާންތެރިވުމަށް އަންގަވާފައިވަނީ ހަމައެކަނި އިންސާނުންނަށް ނޫން ކަމަށާއި، ދިރޭ ތަކެއްޗަށް ވެސް ރަހުމުކޮށް އޯގާވެރިވާންޖެހޭ ކަމަށެވެ.
