އިމިގްރޭޝަންގެ ބޭންކް އެކައުންޓްތަކެއްގެ ބާކީ ބަލަހައްޓާފައިނުވާކަމާއި، އެކައުންޓް ރިކޮންސައިލް ކޮށްފައިނުވާކަން އޮޑިޓަރ ޖެނެރަލް އޮފީހުން އާންމުކޮށްފައިވާ އޮޑިޓް ރިޕޯޓުން ހާމަވެއްޖެއެވެ.

އޮޑިޓް އޮފީހުން އާންމުކޮށްފައިވާ އިމިގްރޭޝަންގެ 2018 ވަނަ އަހަރުގެ އޮޑިޓް ރިޕޯޓުގައިވާގޮތުން، މޯލްޑިވްސް މަނިޓަރީ އޮތޯރިޓީއަށް ނުވަތަ އެހެންވެސް ބޭންކަކަށް ފައިސާ ޖަމާކޮށްފިނަމަ، އެ ފައިސާ ޖަމާކުރި އޮފީހަކުން އެ ފައިސާގެ ހިސާބު ބަލަހައްޓައި، އެކައުންޓު ބާކީ ފޮތުގައި ލިޔެގެން ނުވަތަ ކޮމްޕިއުޓަރ ޝީޓުގައި ހިސާބުތައް ހިމަނައިގެން، އެ ހިސާބުތައް ބަލަހައްޓަމުން ގެންދަންވާނެ ކަމަށް ދައުލަތުގެ މާލިއްޔަތުގެ ގަވާއިދުގެ 5.16 ވަނަ މާއްދާގެ (ހ) ގައި ބަޔާންކޮށްފައިވެއެވެ.

އަދި އެކައުންޓުން ދައްކާ ބާކީއާއި އޮފީހުގެ ހިސާބުތަކުން ދައްކާ ބާކީއަކީ ރަނގަޅު އަދަދުތަކެއްކަން ދެނެގަތުމަށްޓަކައި ކޮންމެ މަހަކު އެއްފަހަރު ބޭންކް ސްޓޭޓްމަންޓެއް ގެނުވައި ރިކޮންސިލިއޭޝަން ސްޓޭޓްމަންޓެއް ތައްޔާރު ކުރަންޖެހޭނެ ކަމަށް ހަމަ އެ މާއްދާގެ (ށ) ގައި ބަޔާންކޮށްފައިވާ ކަމަށް އޮޑިޓް ރިޕޯޓުގައި ވެއެވެ.

އެހެންނަމަވެސް، އިމިގްރޭޝަންގެ އަތޮޅުތެރޭގައި ގާއިމްކޮށްފައިވާ އޮފީސްތަކުން ބަލައިގަންނަ ފައިސާ ޖަމާކުރުމަށް ބޭންކް އޮފް މޯލްޑިވްސްގައި ހުޅުވާފައިވާ ތިން އެކައުންޓްގައި 2018 ވަނަ އަހަރުގެ ނިޔަލަށް ޖުމުލަ 361,842 (ތިން ސަތޭކަ ފަސްދޮޅަސް އެއް ހާސް އަށްސަތޭކަ ސާޅީސް ދޭއް) ރުފިޔާ ހުރިކަމަށް އެކައުންޓްތަކުގެ ބޭންކް ސްޓޭޓްމަންޓްތަކުން ދައްކާ ކަމަށް ރިޕޯޓުގައިވެއެވެ. މި އެކައުންޓްތަކުގެ ހިސާބުތައް ބަލަހައްޓައި، އެކައުންޓް ބާކީކޮށް، އަދި ބޭންކް ސްޓޭޓްމަންޓުން ދައްކާ ބާކީ އާއި އިމިގްރޭޝަންގެ ރިކޯޑުތަކުން ދައްކާ ބާކީ އަޅާބަލައި ރިކޮންސައިލްކޮށްފައި ނުވާ ކަމަށް އޮޑިޓް ރިޕޯޓުުގައި ބުނެފައިވެއެވެ. އެހެންކަމުން، އަހަރު ނިމުނުއިރު، އިދާރާގައި ހުރި ފައިސާއާއި ފައިސާގެ ގޮތުގައި ބެލެވޭ ތަކެތީގެ ގޮތުގައި މާލީ ބަޔާނުގައި ހިމަނާފައިވާ އަދަދު ސައްހަކަން ޔަގީންކުރެވެން ނެތްކަމަށް އޮޑިޓް ރިޕޯޓުގައިވެއެވެ.

މިކަންކަން ރަނގަޅުކުރުމަށް އޮޑިޓް އޮފީހުން ދީފައިވާ ލަފާގައި ވަނީ މާލިއްޔަތު ގަވާއިދާ އެއްގޮތްވާ ގޮތުގެ މަތިން ހިސާބުތައް ބަލަހައްޓަމުން ދިއުމަށް އަންގާފައެވެ. އަދި މާލިއްޔަތު ގަވާއިދުގެ 5.16 ވަނަ މާއްދާގެ (ހ) ގައި ބަޔާންކޮށްފައިވާ އެކައުންޓުން ދައްކާ ބާކީއާއި އޮފީހުގެ ހިސާބުތަކުން ދައްކާ ބާކީއަކީ ރަނގަޅު އަދަދުތަކެއްކަން ދެނެގަތުމަށްޓަކައި ކޮންމެ މަހަކު އެއްފަހަރު ބޭންކް ސްޓޭޓްމަންޓެއް ގެނުވައި ރިކޮންސިލިއޭޝަން ސްޓޭޓްމަންޓެއް ތައްޔާރު ކުރުމަށް އަންގައި ލަފާދީފައިވެއެވެ.