ޖިނާއީ މައްސަލަތަކާ ގުޅިގެން 49 އެކައުންޓެއްގެ މައުލޫމާތު ހޯދަން ދިވެހި ސަރުކާރުން އެދުނު: ފޭސްބުކް
21 ޑިސެމްބަރު 2017 | ބުރާސްފަތި 08:2049 އެކައުންޓްގެ މައުލޫމާތު ހޯދަން 36 ފަހަރެއްގެ މަތިން ދިވެހި ސަރުކާރުން އެދިފައިވޭ
ފޭސްބުކް، މިދިޔަ އަހަރުގެ ދެ ކުއާޓަރުގައި މައުލޫމާތު ހޯދަން އެދުނީ 18 އެކައުންޓެއްގެ
ޖިނާއީ މައްސަލަތަކާ ގުޅިގެން 49 އެކައުންޓެއްގެ މައުލޫމާތު ހޯދުމަށް ދިވެހި ސަރުކާރުން އެދިފައިވާ ކަމަށް ފޭސްބުކްގެ ތަފާސްހިސާބުތަކުން ދައްކައިފިއެވެ.
ފޭސްބުކް އިން އާންމުކޮށްފައިވާ ތަފާސްހިސާބުތަކަށް ބަލާއިރު، މިއަހަރުގެ ޖެނުއަރީ މަހުން ފެށިގެން ޖޫންމަހާ ހަމައަށް ޖުމްލަ 52 އެކައުންޓެއްގެ މައުލޫމާތު ހޯދުމަށް ދިވެހި ސަރުކާރުން ފޭސްބުކްގައި އެދިފައިވެއެވެ.
އޭގެ ތެރޭގައި ހިމެނެނީ، ޖިނާއީ މައްސަލަތަކާ ގުޅިގެން މައުލޫމާތު ހޯދަން އެދުނު 49 އެކައުންޓަކާއި، އެމަޖަންސީ ހާލަތެއް ކަމަށް ބުނެ މައުލޫމާތު ހޯދަން އެދުނު ތިން އެކައުންޓެކެވެ.
ޖިނާއީ މައްސަލަތަކާ ގުޅިގެން 49 އެކައުންޓެއްގެ މައުލޫމާތު ހޯދަން 36 ފަހަރެއްގެ މަތިން ދިވެހި ސަރުކާރުން އެދިފައިވާ ކަމަށް ތަފާސްހިސާބުތަކުން ދައްކައެވެ.
ފޭސްބުކްގެ އުސޫލުތައް ހަމަޖެހިފައި އޮންނަ ގޮތުން ޖިނާއީ ތަހުގީގުތަކާ ގުޅިގެން މައުލޫމާތު ހޯދަން އެދޭއިރު، އެކަމާ ގުޅޭ ލިޔެކިޔުން ހުށަހަޅަންޖެހެއެވެ. އެހެންނަމަވެސް، ޖިނާއީ މައްސަލަތަކާ ގުޅިގެން ލިޔެކިޔުންތައް ހުށަހަޅާފައި ވަނީ 78 އިންސައްތަ މައްސަލަތަކުގެއެވެ.
އެމަޖެންސީ ހާލަތުގައި ކަމަށް ބުނެ މައުލޫމާތު ހޯދަން އެދުނު އެކައުންޓާ ގުޅޭ މައްސަލައިގެ ލިޔެކިޔުންތައް ފޭސްބުކްއާ ހިއްސާކޮށްފައިނުވާ ކަމަށް ތަފާސްހިސާބުތަކުން ދައްކައެވެ.
ފޭސްބުކްގެ ޓްރާންސްޕޭރަންސީ ރިޕޯޓް އަހަރުގެ ދެ ކުއާޓަރުގައި ނެރޭއިރު، މިއަހަރުގެ ފަހު ކުއާޓަރުގެ ރިޕޯޓް މިހާތަނަށް އަދި ނެރެފައެއް ނުވެއެވެ. މިދިޔަ އަހަރުގެ ދެ ކުއާޓަރުގައި ޖިނާއީ މައްސަލަތަކާ ގުޅިގެން ދިވެހި ސަރުކާރުން މައުލޫމާތު ހޯދަން އެދިފައި ވަނީ ޖުމްލަ 18 އެކައުންޓެއްގެއެވެ.
