ދައުލަތުގެ އާމްދަނީ 5.4 ބިލިއަނަށް އަރައިފި

މާރޗް 10 ވަނަ ދުވަހުގެ ނިޔަލަށް ދައުލަތަށް އާމްދަނީގެ ގޮތުގައި 5.4 ބިލިއަން ރުފިޔާ ލިބިފައިވާކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން މިއަހަރުގެ މިހާތަނަށް ދައުލަތަށް އާމްދަނީގެ ގޮތުގައި ލިބިފައިވާ ފައިސާއަކީ މިދިޔަ 2021 ވަނަ އަހަރުގެ މި މުއްދަތުގައި ލިބުނު އާމްދަނީއަށްވުރެ އިތުރު އަދަދެކެވެ. މިއަހަރުގެ މިހާތަނަށް 5.4 ބިލިއަން ރުފިޔާ ލިބިފައިވާއިރު، މިދިޔަ އަހަރުގެ މި މުއްދަތުގައި ދައުލަތަށް އާމްދަނީގެ ގޮތުގައި ލިބިފައިވަނީ 3.9 ބިލިއަން ރުފިޔާއެވެ. މިއީ 1.5 ބިލިއަން ރުފިޔާގެ ދަށް އަދަދެކެވެ.

މިއަހަރުގެ މިހާތަަނަށް ދައުލަތަށް ލިބުނު އާމްދަނީގެ އެންމެ ބޮޑު ބައެއް ހިއްސާކުރަނީ ޓެކްސް ފައިސާއިންނެވެ. މިގޮތުން ޓެކުހުން ލިބުނު އާމްދަނީ 4 ބިލިއަނަށް އަރާ ކަމަށް ފިނޭންސް މިނިސްޓްރީން ހާމަކޮށްފައިވެއެވެ. މީގެ ތެރެއިން އެންމެ ބޮޑު އާމްދަނީއެއް ލިބިފައިވަނީ މުދަލާއި، ޚިދުމަތުގެ އަގުން ނަގާ ޓެކުހުން ކަމަށް ފިނޭންސް މިނިސްޓްރީން ހާމަކުރެއެވެ. މިގޮތުން މުދަލުން ނަގާ ޓެކުހުގެ ގޮތުގައި 529.2 މިލިއަން ރުފިޔާ ދައުލަތަށް ލިބިފައިވާއިރު، ފަތުރުވެރިކަމުގެ މުދަލާއި ޚިދުމަތުގެ އަގުން ނަގާ ޓެކުހުގެ ގޮތުގައި 1.6 ބިލިއަން ރުފިޔާ ވަނީ ދައުލަތަށް ލިބިފައެވެ. މިއާއެކު މުޅި ޖުމްލަ މުދަލާއި ޚިދުމަތުގެ އަގުން ނަގާ ޓެކުހުން 2.1 ބިލިއަން ރުފިޔާ ވަނީ ދައުލަތަށް ލިބިފައެވެ.

ވިޔަފާރިތަކުންނާއި، ތަކެތިން ނަގާ ޓެކުހުގެ ގޮތުގައި 1 ބިލިއަން ރުފިޔާ ދައުލަތަށް ލިބިފައިވެއެވެ. އަދި އިމްޕޯޓު ޑިއުޓީން އާމްދަނީގެ ގޮތުގައި ލިބިފައިވަނީ 551 މިލިއަން ރުފިޔާ ކަމަށް ފިނޭންސް މިނިސްޓްރީން ހާމަކޮށްފައިވެއެވެ. ގްރީން ޓެކެސްގެ ގޮތުގައި 202 މިލިއަން ރުފިޔާ ލިބިފައިވާއިރު، އެއަރޕޯޓު ސަރވިސް ޗާޖުގެ ގޮތުގައި 114 މިލިއަން ރުފިޔާ ލިބިފައިވާކަމަށް ފިނޭންސްގެ ތަފާސްހިސާބުން ހާމަކުރެއެވެ.

ޓެކްސް ނޫން އެހެނިހެން ގޮތްގޮތުން 1.4 ބިލިއަން ރުފިޔާގެ އާމްދަނީއެއް ވަނީ ދައުލަތަށް ލިބިފައެވެ. މިއީވެސް 2021 ވަނަ އަހަރުގެ މި މުއްދަތާ އަޅާ ބަލާއިރު، ބޮޑުތަނުން އިތުރު އަދަދެކެވެ. މިދިޔަ އަހަރުގެ މި މުއްދަތުގައި ޓެކްސް ނޫން އެހެނިހެން ގޮތްގޮތުން އާމްދަނީގެ ގޮތުގައި ލިބިފައިވަނީ 691 މިލިއަން ރުފިޔާއެވެ. މިއީ މިއަހަރާ އަޅާ ބަލާއިރު 709 މިލިއަން ރުފިޔާގެ ދަށް އަދަދެކެވެ. ކެޕިޓަލް ރިސީޓްގެ ގޮތުގައި 2.9 މިލިއަން ރުފިޔާ ވަނީ ލިބިފައެވެ. އަދި ފްރާންޓްސްގެ ގޮތުގައި 65.3 މިލިއަން ރުފިޔާ ދައުލަތަށް ލިިބިފައިވެއެވެ.

މީގެ އިތުރުން، މިހާތަނަށް ބަޖެޓުން ކުރި ހޭދަ 6.5 ބިލިއަން ރުފިޔާއަށް އަރާފައިވާކަމަށް ފިނޭންސް މިނިސްޓްރީން ވަނީ ހާމަކޮށްފައެވެ. މިގޮތުން ރިކަރަންޓް އަދި ކެޕިޓަލް ޚަރަދުގެ ގޮތުގައި މިހާތަނަށް 5.9 ބިލިއަން ރުފިޔާ ހިނގާފައިވާކަމަސް ފިނޭންސް މިނިސްޓްރީން ހާމަކޮށްފައިވެއެވެ.