އަނބިމީހާއަށް ގެވެށި އަނިޔާކުރި މީހާ ޝަރީއަތް ނިމެންދެން ބަންދު
ދަޢުވާ ކުރުމަށް 10 މާރިޗު 2022 ގައި ކްރިމިނަލް ކޯޓަށް ހުށައަޅާފައިވޭ
މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށް
މާލޭ ގެއެއްގައި ބިދޭސީ އަންހެނަކަށް ގެވެށި އަނިޔާކުރި މައްސަލައިގައި ހައްޔަރުކުރި ބިދޭސީ މީހާއަށް ކުރާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މިއީ މި މައްސަލައިގައި ބޭއްވި ފުރަތަމަ އަޑުއެހުމެވެ.
މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ. މި އަޑުއެހުމަކީ އޭނާގެ ބަންދާމެދު ގޮތެއް ނިންމުމަށް ބޭއްވި އަޑުއެހުމެކެވެ.
މި މައްސަލައިގައި ދައުލަތުން އެދިފައިވަނީ އޭނާ ޝަރީއަތް ނިމެންދެން ބަންދު ކުރުމަށެވެ. އެގޮތުން މި މައްސަލައިގައި ހެކިންގެ ގޮތުގައި ހުށައަޅާފައިވަނީ އޭނާއާ ގާތް މީހުން ކަމަށާއި، ހެއްކަށް ނުފޫޒު ފޯރުވުމުގެ އިހްތިމާލް އޮތްކަމަށް ދައުލަތުން ބުނެއެވެ. ސަބަބަކީ އޭނާ ޙަމަލާ ދީފައިވަނީ އޭނާގެ ރައްކާތެރިކަމުގެ ދަށުގައި ހުރި ފަރާތެއްކަމަށްވާ އޭނާގެ އަނބިމީހާއަށްކަމަށް ދައުލަތުގެ ވަކީލާ ވިދާޅުވިއެވެ.
އޭނާ ކޮށްފައިވާ ކުށަށް ބަލާއިރު، ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާ ވާނެކަން ދައުލަތުން ފާހަގަކުރެއެވެ. މި މައްސަލައިގެ ހެކިންގެ ތެރޭގައި އަނިޔާ ލިބުނު ފަރާތާއި، މަންޒަރު ދުއް ފަރާތުގެ އިތުރުން، ސީންއަށް ދިޔަ ފުލުހުންވެސް ހިމެނެއެވެ.
ނަމަވެސް ދިފާއުން ވަނީ އަނިޔާ ލިބުނު ފަރާތަށް މަޖުބޫރު ކޮށްފައިވާކަމަށް ވިދާޅުވެފައެވެ. އޭނާ ބަޔާންދިނީ ފުލުހުން މަޖުބޫރު ކޮށްގެންކަމަށް ބަޔާން ކޮށްފައިވާ މި ސިޓީގެ ތަހުގީގު ކުރިއަށްދާކަމަށް ދައުލަތުގެ ވަކީލާ އެކަމާ ގުޅިގެން ވިދާޅުވެއެވެ.
މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ ހެއްކަށް ނުފޫޒު ފޯރުވުމުގެ އިހްތިމާލު އޮތުމާއި، މައްސަލައިގެ ބާވަތަށް ބަލައި، ޝަރީއަތް ނިމެންދެން އޭނާ ބަންދު ކުރުމަށް ނިންމަވާފައެވެ.
އޭނާއަށް ދައުވާ އުފުލަމުން ޕްރޮސެކިއުޓަރ ޖެނެރަލް އޮފީހުން ބުނެފައިވަނީ، 02 ފެބްރުވަރީ 2022 ދުވަހު، މާލޭ ގެއެއްގެ ތެރޭގައި، އޭނާގެ އަނބިމީހާއަށް ވަޅިން ހަމަލާދިން މައްސަލައިގައި ސްރިނިވަސަން ސުބްރަމަނިގެ މައްޗަށް، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާ ކުރުމަށް 10 މާރިޗު 2022 ގައި ކްރިމިނަލް ކޯޓަށް ހުށައަޅާފައިވާ ކަމަށެވެ.
މި ޙާދިސާއާ ގުޅޭ ވީޑިއޯއެއް އާންމުވެފައިވާއިރު، ވީޑިއޯއިން ފެންނަނީ ގެއެއްގެ ސިޑިމަތިން ފުލުހުންގެ އެހީތެރިކަމާއެކު އެ އަންހެންމީހާ ފައިބައިގެންދާ މަންޒަރެވެ. އޭނާ ލައިގެން ހުރި ހެދުމުގެ ފަސްބައިގައި ވަރަށް ގިނަ ލޭ ހުއްޓެވެ.
އަންހެން މީހާގެ ޅިނދުކަށިގަނޑު ކައިރިއަށް ތޫނު އެއްޗަކުން ހަމަލާދީފައިވާއިރު، ވަރަށް ބޮޑަށް ޒަޚަމްވެފައިވެފައިވެއެވެ. އަދި ފިރިހެން މީހާގެ ބަނޑަށް ވެސް ތޫނު އެއްޗަކުން ހަމަލާދީފައިވާ ކަމަށާއި ނަމަވެސް އޭނާއަށް މާބޮޑު އަނިޔާއެއް ލިބިފައިނުވާކަމަށް މައުލޫތުލިބެއެވެ.
