ޒުވާން ކުޅުންތެރިޔާގެ އެވޯޑަށް ވާދަކުރާ އެތްލީޓުންގެ ތެރޭގައި ދީމާއާއި ރަފާ

އެންމެ އުއްމީދީ އެތްލީޓަށް ވާދަކުރާ ކުޅުންތެރިންގެ ތެރޭގައި ޒުވާން ދެ ޓީޓީ ކުޅުންތެރިންކަމަށްވާ ފާތިމަތު ދީމާއާއި, އައިޝަތު ރަފާ ނާޒިމްވެސް ހިމެނިއްޖެއެވެ. އިންޑިޔަން އޯޝަން އައިލެންޑް ގޭމްސްއިން ރާއްޖެއަށް މެޑަލް ހޯދައިދިން ދެ ކުޅުންތެރިން އެންމެ މޮޅު އަންހެން ޓޭބަލް ކުޅުންތެރިޔާގެ އެވޯޑަށްވެސް ވާދަކުރެއެވެ. އެންމެ ބާރަށް ކުރިއަރަމުން އަންނަ އަދި ޅަ އުމުރުގައި ބޮޑަތި ކާމިޔާބީތައް ހޯދަމުން އަންނަ އެތްލީޓުންގެ ތެރޭގައި މިދެކުޅުންތެރިން ހިމެނެއެވެ. އަންހެން އެންމެ އުއްމީދީ އެތްލީޓްގެ އެވޯޑަށް މިދެކުޅުންތެރިންގެ އިތުރުން ވާދަކުރަނީ އެތްލެޓިކްސްގެ ޗެމްޕިއަން އައިޝަތު ހިމްނާ ހަސަންއެވެ. އެންމެ މޮޅު އަންހެން އެތްލީޓްގެ އެވޯޑަށްވެސް ހިމްނާ ވާދަކުރެއެވެ.

އެންމެ އުއްމީދީ ފިރިހެން އެތްލީޓްގެ އެވޯޑަށް ވާދަކުރަނީ އެތްލެޓިކްސްގެ އިބާދުالله އާދަމްއާއި, ބެޑްމިންޓަން ކުޅުންތެރިޔާ ނިބާލް އަހުމަދުއާއި, ފެތުންތެރިޔާ އަލީ އިމާންއެވެ. އެންމެ މޮޅު ފިރިހެން ފެތުންތެރިޔާގެ އެވޯޑަށްވެސް އިމާން ވާދަކުރެއެވެ. އެންމެ މޮޅު ފިރިހެން ބެޑްމިންޓަން ކުޅުންތެރިޔާގެ އެވޯޑަށްވެސް ނިބާލް ވާދަކުރެއެވެ. އެތްލެޓިކްސްއިން އަހަރުގެ އެންމެ މޮޅު ފިރިހެން އެތްލީޓްގެ އެވޯޑަށް އިބާދުالله ވާދަކުރެއެވެ.

މިރޭ އޮންނަ މޯލްޑިވްސް ސްޕޯރޓްސް އެވޯޑްސް 2022 ގައި އެވޯޑްތައް ދެނީ މިދިޔަ ތިން އަހަރަށް ބަލައިގެންނެވެ. މިއެވޯޑް ހަފްލާގައި އެކި ކުޅިވަރުތަކުން ދުނިޔޭގެ ޗެމްޕިއަނުން ބައިވެރިވެއެވެ. ކޮންމެ ކުޅިވަރެއްގެ އަންހެން އަދި ފިރިހެން ޗެމްޕިއަން ހޮވުމުގެ އިތުރުން ހުރިހާ ކުޅުވަރެއް ހިމެނޭ ގޮތަށް އެންމެ މޮޅު ފިރިހެން އެތްލީޓް އަދި އެންމެ މޮޅު އަންހެން އެތްލީޓްވެސް ހޮވާނެއެވެ.