އަންހެނުން ބާރުވެރިކުރުވުމަށާއި އަންހެނުންނަށް ތައުލީމީ ފުރުސަތުތައް ފަހިކޮށްދިނުމަށް އެއްބަސްވުމެއްގައި ސޮއިކޮށްފި

އަންހެނުން ބާރުވެރިކުރުވުމަށާއި އަންހެނުންނަށް ތައުލީމީ ފުރުސަތުތައް ފަހިކޮށްދިނުމަށް ޓަކައި ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސްއާއި ބްރިޖިންގ ދަ ކޮމިއުނިޓީސް މޯލްޑިވްސް (ބީސީއެމް)އާ ދެމެދު އެއްބަސްވުމެއްގައި ސޮއިކޮށްފިއެވެ.

މިކަމަށްޓަކައި އަންގާރަ ދުވަހުގެ ރޭ ބޭއްވި ބައްދަލްވުމެއްގައި މި އެއްބަސްވުމުގައި ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސްގެ ފަރާތުން ސޮއިކުރެއްވީ އެކަޑެމިކް ކައުންސިލްގެ ވައިސް ޗެއަރ ފާޠިމަތު މުނާއެވެ. ބީސީއެމްގެ ފަރާތުން ސޮއިކުރެއްވީ ސެކްރެޓަރީ ޖެނެރަލް ފާޠިމަތު ނައުޝާނެވެ.

2 އަހަރު ދުވަހުގެ މުއްދަތަށް ސޮއިކޮށްފައިވާ އެއްބަސްވުމުގެ ދަށުން ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސްގެ ފަރާތުން ހިންގާ ކޮންމެ ކޯހެއްގައި ބީސީއެމްގެ ފަރާތުން ބައިވެރިކުރާ 1 އަންހެނަކަށް ހިލޭ ކިޔެވުމުގެ ފުރުސަތު ލިބިގެންދާނެއެވެ. މީގެ އިތުރުން ބީސީއެމްގެ ފަރާތުން އަންހެނުން ބާރުވެރިކުރުވުމަށް ހިންގާ ހަރަކާތްތަކަށް ފިނެކް އިންސްޓިޓިއުޓް ފޮރ ޑެވަލޮޕްމަންޓް ސްޓަޑީސް އިން ފަންނީ ލަފާއާއި އެހީތެރިކަން ދިނުމަށް އެއްބަސްވުމުގައި ބުނެފައިވެއެވެ.

މި އެއްބަސްވުމުގެ ދަށުން ފިނެކް އިންސްޓިޓިއުޓް ފޮރ ޑިވެލޮޕްމަންޓް ސްޓަޑީސްގެ ފަރާތުން އަލަށް ތައާރުފުކުރުމަށް ގަސްދުކުރެވިފައިވާ "ސްޓްރެޓީޖިކް ޖެންޑަރ ޑިވެލޮޕްމަންޓް" ކޯހުގެ މުޤައްރަރު އެކުލަވާ ލުމުގެއިތުރުން އިޖުތިމާއީ އެހެނިހެން ކޯސްތައް ފަރުމާކުރުމުގައި ބީސީއެމްގެ ފަރާތުން ފަންނީ އެހީތެރިކަން ދިނުމަށް ހަމަޖެހިފައިވެއެވެ.

އަންހެނުންގެ ހައްގުތައް ހޯދައިދިނުމަށާއި އަންހެނުން ބާރުވެރިކުރުވުމުގެ މަގުސަދުގައި 14 ޖަނަވަރީ 2022ގައި އިފުތިތާހުކުރެވުނު ބީސީއެމްގެ ފަރާތުން އަންނަނީ ފުޅާ ދާއިރާއެއްގައި ހަރަކާތްތައް ހިންގަމުންނެވެ. އެ ގޮތުން އަންހެނުން ޓެކްނޮލޮޖީއަށާއި ގާނޫނީ ދާއިރާއަށާއި މީޑިއާގެ ދާއިރާއަށް އަހުލުވެރިކުރުވުމަށް ޕްރޮގްރާމްތައް ހިންގުމުގެ އިތުރުން އަންހެނުންނަށް ހިންގޭ ސެލްފް ޑިފެންސް ކްލާސްތައް ފާހަގަކޮށްލެވެއެވެ.