ޖަލުގައި ތިބޭ ކޮންމެ ޤައިދީއަކަށް ވަކި އިންތިޒާމެއް ހަމަޖައްސަންވެއްޖެނަމަ، އެންމެ އިންސާފުން ކަންކަން ނުވެދާނެކަމަށް ކްރިމިނަލް ކޯޓުގެ ގާޒީ ސޮފްވަތު ޙަބީބު ވިދާޅުވެއްޖެއެވެ.

ގާޒީ އެހެން ވިދާޅުވީ މޯލްޑިވްސް ޕޮލިސް ސަރވިސްގެ ލޯންޗެއްގައި ގަސްދުގައި ރޯކޮށްލި މައްސަލައިގައި ދަޢުވާތައް އުފުލި ދެ މީހުންގެ ތެރެއިން ލ. ކަޅައިދޫ ފިނިހިޔާގެ މޫސާ އިނާސްގެ ބަންދާއި ގުޅޭގޮތުން އޭނާ ދެއްކި ވާހަކަތަކާއި ގުޅިގެންނެވެ.

މި މައްސަލައިގައި މީގެ ކުރިން ބޭއްވި އަޑުއެހުމެއްގައި އިނާސްގެ ފަރާތުން ވަނީ ޖަލުގައި އެކަށީގެންވާ ބޭސްފަރުވާ ނުލިބޭ ކަމަށާއި، އާތްރައިޓިސްއަށް ވެސް އެކަށީގެންވާ ފަރުވާ ނުލިބޭކަމުގެ ޝަކުވާ ކޮށްފައެވެ.

އެ ދުވަހުގެ އަޑުއެހުމުގައި ގާޒީ ވަނީ މައްސަލައެއްގައި ބަލި ޙާލަތާއި ގުޅޭގޮތުން އެކަށީގެންވާ ފަރުވާ ނުލިބޭނަމަ، އަދި އެކަންކަމުގައި ދައުލަތުން އިހުމާލުވާނަމަ، ކިތަންމެ ބޮޑު މައްސަލައެއް ނަމަވެސް ފަސްޖެހިވަޑައިގަތުމެއް ނެތި ދޫކޮށްލައްވާނެ ކަމުގައި ވިދާޅުވެފައެވެ. އިނާސް މިހާރު ހުރީ ޝަރީއަތް ނިމެންދެން ބަންދުގައެވެ.

ބުދަ ދުވަހުގެ އަޑުއެހުމުގައިވެސް އިނާސް ވަނީ އެ ޝަކުވާ ކޮށްފައެވެ. އެހެންނަމަވެސް ދައުލަތުން ވަނީ އޭނާގެ ބޭސްފަރުވާގެ ކަންކަން ހަމަޖެއްސި ނަމަވެސް އޭނާ ބޭނުންވަނީ ވަކި ޑޮކްޓަރަކަށް ދެއްކުމަށް ކަން ފާހަގަކުރައްވާފައެވެ. އަދި އެއީ ކަރެކްޝަންސްއަށްވެސް ފަސޭހަ ކަމަކަށް ނުވާނެކަން ކަރެކްޝަންސްއިން ފޯރުކޮށްދިން މައުލޫމާތުތަކާއި ޙަވާލާދީ ދައުލަތުގެ ވަކީލާ ވިދާޅުވެފައިވެއެވެ.

މި އަޑުއެހުމުގައި ވާހަކަ ދައްކަވަމުން ގާޒީ ސޮފްވަތު ޙަބީބު ވިދާޅުވީ، ޖަލުގައި ހުންނައިރު އެންމެ ބޭނުންވާ ގޮތަށް ހުރިހާ ކަމެއް ނުވެދާނެކަމަށް ޤަބޫލު ކުރަންޖެހޭ ކަމަށެވެ. މިސާލެއްގެ ގޮތުން ޖަލުގައި ހުންނަ މީހަކު މުގުރިހަ ކާން ބޭނުން ނުވި ނަމަވެސް، ޖަލުގައި ހުންނައިރު ކޮންމެ ޤައިދީއަކު ބޭނުންވާ ވަކި އިންތިޒާމުތަކެއް ހަމަޖައްސަންވެއްޖެނަމަ، އެއީ އެންމެ އިންސާފުވެރިގޮތަކަށް ނުވެދާނެކަމަށް ގާޒީ ވިދާޅުވިއެވެ. އަދި މި މައްސަލައިގައިވެސް ބޭސްފަރުވާ ފޯރުކޮށްދިނުމަށް މަސައްކަތްތަކެއް ކުރެވިފައިވާކަން ގާޒީ ވަނީ ފާހަގަކުރައްވާފައެވެ.

ދައުލަތުންވެސް ވަނީ އެ ނުކުތާ ފާހަގަކޮށްފައެވެ. އެހެންނަމަވެސް، ދައުވާ ލިބޭ މީހާ ބޭނުންވާ ޑޮކްޓަރަކަށް ދެއްކުމުގެ އިންތިޒާމުތައް ހަމަޖެހޭތޯ ކަރެކްޝަންސް މެދުވެރިކޮށް މަސައްކަތް ކޮށްދެއްވާނެކަމަށް ދައުލަތުގެ ވަކީލު ވިދާޅުވިއެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީވެސް ވަނީ ޝަރީއަތުން އޭނާގެ ބޭސްފަރުވާގެ ކަންކަން ގާތުން ބަލަމުންގެންދާނެކަމަށް ވިދާޅުވެފައެވެ. އަދި މިވަގުތު އޭނާގެ ބޭސްފަރުވާގެ ކަންކަމުގައި މައްސަލައެއް އުޅޭކަމަށް ދެކިވަޑައިނުގަންނަވާކަމަށް ގާޒީ ވިދާޅުވިއެވެ.

ގާޒީ ވަނީ ބޭސްފަރުވާއާއި ގުޅިގެން އެއްވެސް މައްސަލައެއް އުޅޭނަމަ ނުވަތަ ކަރެކްޝަންސްގެ އިހުމާލެއް ވާނަމަ، ލިޔުމުން އެކަން އެންގުމަށް ދަންނަވާފައެވެ. މި އަޑުއެހުމުގައި އޭނާގެ މައްޗަށް ކުރާ ދައުވާގެ އިބްތިދާއީ މަރުޙަލާވެސް ވަނީ އެއްކޮށް ނިންމާލާފައެވެ.

72 ކިލޯގެ މަސްތުވާތަކެތި އެތެރެކުރި މައްސަލައިގައި ޑައިމޯފިން ޓްރެފިކްކުރުމުގެ ކުށުގެ ދަޢުވާ އުފުލާފައިވާ ސ.ހުޅުދޫ ދޭލިޔާގޭ އިރުފާން ތަޤިއްޔުގެމައްސަލައިގައިވެސްމިފަދަ ކަމެއް ދިމާވެފައިވެއެވެ. އެ މައްސަލައިގައި ހިމެނޭ ފަރާތަށްވެސް ދައުލަތުން ބޭސްފަރުވާގެ އިންތިޒާމު ހަމަޖެއްސިނަމަވެސް، އޭނާ ބޭނުންވަނީ ވަކި ޑޮކްޓަރަކަށް ދައްކާށެވެ.

ދައުވާ ލިބޭ މީހާ ބޭނުން ކޮންމެ ޑޮކްޓަރަކަށް ނުދެއްކި ނަމަވެސް، ބޭސްފަރުވާގެ އިންތިޒާމު ހަމަޖެއްސުމަށް މަސައްކަތްތަކެއް ކުރެވިފައިވާ ކަމަށާއި، މިހާރު ޑޮކްޓަރަށް ނުދެއްކި އޮތީ ކަރެކްޝަންސްގެ އިހުމާލަކުން ނޫންކަން މި ދެ މައްސަލައިގައި ހިމެނޭ ދައުލަތުގެ ވަކީލުންވެސް ފާހަގަ ކުރައްވާފައިވެއެވެ.

އޭގެ އިތުރުން، ބަންދުގައި ހުރި މީހަކު ޑޮކްޓަރަށް ދައްކަން ބޭނުންވާ ކޮންމެ ފަހަރަކު އާއިލާއިން އެޕޮއިންޓްމަންޓް ހައްދައިގެން ޑޮކްޓަރަށް ދައްކަން ގެންދާ ނިޒާމު އޮންނަ ނަމަ، ޖަލުގައި ބަންދުގައި އެއްވެސް މީހަކު ނުހުންނާނެކަންވެސް ދައުލަތުގެ ވަކީލާ ވިދާޅުވިއެވެ.

އެ މައްސަލަ ބެއްލެވީ ގާޒީ ޙަސަން ސައީދެވެ.

ގާޒީ ޙަސަން ސައީދު ވަނީ އިރުފާން ތަޤިއްޔު ބޭނުންވާ ޑޮކްޓަރަށް ދެއްކުމާއި އޮޕަރޭޝަން ކުރުމަށް އާއިލާއިން އެޕޮއިންޓްމަންޓް ހެއްދުމަށްފަހު، އެކަން އެންގުމަށް ދަންނަވާފައެވެ. އަދި އޭނާ ޝަރީއަތް ނިމެންދެން ބަންދު ކުރި ކުރުން ގާޒީ ޙަސަން ސައީދު ވަނީ ދަމަހައްޓަވާފައެވެ.