ސްޕޯޓްސް އެވޯޑްސް 2022: ހަތަރު ކުޅިވަރެއްގެ އެންމެ މޮޅު އެތުލީޓުންނަށް ވާދަކުރާ ފަރާތްތައް އިއުލާނުކޮށްފި
16 މާރިޗު 2022 | ބުދަ 06:08ކޮންމެ ކުޅިވަރެއްގައިވެސް އެންމެ މޮޅު އަންހެން އަދި ފިރިހެން އެތުލީޓު ހޮވާނެ
އެންމެ މޮޅު އެތުލީޓްގެ އެވޯޑަށް އެތުލެޓިކްސް އެސޯސިއޭޝަނުން ނޮމިނޭޓުކުރި ފިރިހެން އެތުލީޓުން
މޯލްޑިވްސް ސްޕޯޓްސް އެވޯޑްސް 2022 ގައި އެތުލީޓް އޮފް ދަ އިޔަރއަށް ވާދަކުރާ ކުޅުންތެރިންގެ ތެރެއިން ހަތަރު ކުޅިވަރެއްގެ ނޮމިނޭޓުން އިއުލާނުކޮށްފިއެވެ.
މިފަހަރުގެ އެވޯޑުގައި ކޮންމެ ކުޅިވަރަކުންވެސް އެންމެ މޮޅު އަންހެން އަދި ފިރިހެން އެތުލީޓު ހޮވާނެއެވެ. މި އެވޯޑަށް ނަންތައް ނޮމިނޭޓް ކުރާނީ އެސޯސިއޭޝަންތަކުންނެވެ. އެގޮތުން މިހާތަނަށް މި މަގާމަށް ނޮމިނޭޓްކޮށްފައިވާ ކުޅުންތެރިން އާންމުކޮށްފައިވަނީ އެތުލެޓިކްސް އެސޯސިއޭޝަން އޮފް މޯލްޑިވްސް، ކެރަމް އެސޯސިއޭޝަން އޮފް މޯލްޑިވްސް، ބާސްކެޓް އެސޯސިއޭޝަން އޮފް މޯލްޑިވްސް އަދި މޯލްޑިވްސް ޕޫލް އެންޑް ބިލިއަރޑް އެސޯސިއޭޝަނުންނެވެ.
އަހަރުގެ އެންމެ މޮޅު ފިރިހެން އެތުލީޓަށް އެތުލެޓިކްސް އެސޯސިއޭޝަނުން ނޮމިނޭޓުކޮށްފައިވަނީ އިބާދުﷲ އާދަމް، ހަސަން ސާއިދު އަދި ހުސައިން ރިޒާއެވެ. އެންމެ މޮޅު އަންހެން އެތުލީޓަށް ނޮމިނޭޓުވެފައި ވަނީ އައިޝަތު ހަމްނާ ހަސަން، އާމިނަތު ޖައުޝާ ޖުނީޒް އަދި މަރިޔަމް ރޫޔާ އަލީއެވެ.
ކެރަމް އެސޯސިއޭޝަނުން ނޮމިނޭޓުކުރި ފިރިހެން އެތުލީޓުންނަކީ އިސްމާއިލް އަޒްމީން، މުޙައްމަދު މުންތަސިރު އަދި އަލީ އާޒިމްއެވެ. އަންހެން ނޮމިނޭޓުންގެ ތެރޭގައި ހިމެނެނީ އާމިނަތު ޝުބާ އާދަމް، އާމިނަތު ވިޝާމާގެ އިތުރުން އާމިނަތު ވިދާދްއެވެ.
މި އެވޯޑަށް ބާސްކެޓް އެސޯސިއޭޝަނުން ނޮމިނޭޓުކުރި ފިރިހެން ކުޅުންތެރިންނަކީ އަބްދުﷲ އަމްޒަރް މުޙައްމަދުގެ އިތުރުން އިސްމާއިލް ވިލްދާން ޔޫސުފް އާއި އަހްމަދު ޒަބީރްއެވެ. އަންހެން ނޮމިނޭޓުންނަކީ އާމިނަތު އިސްރާއު އަބްދުލް ޝުކޫރާއި، ފާތިމަތު ރިޝްމާ އަދި އާމިނަތު ޝިއުރާ އަބްދުލް ބާރީއެވެ.
ޕޫލް އެންޑް ބިލިއަރޑް އެސޯސިއޭޝަނުން ނޮމިނޭޓުކުރި ފިރިހެން ބައިވެރިންނަކީ ހަސަން ޝާޒް މުހައްމަދު، ހުސައިން ފަޔާޒް އަދި މުހައްމަދު ޝަރީފްއެވެ. އަންހެން ނޮމިނޭޓުންގެ ތެރޭގައި ހިމެނެނީ އާމިނަތު ފަތުހީ، އާމިނަތު ހަލީމް އަދި ދީނާ އަހްމަދުއެވެ.
