ރަޝިޔާގެ ސްޓޭޓް ޓީވީން ޕްރައިމް ޓައިމް ޚަބަރު ގެނެސްދެމުން ދަނިކޮށް އެންކަރުގެ ފަހަތުން ރަޝިޔާއިން ޔޫކްރެއިންގައި ހިންގަމުންދާ ހަނގުރާމައާއި ދެކޮޅަށް ޕޯސްޓަރެއް ހިފައިގެން ޝުއޫރު ފާޅުކުރި އެޓީވީގައި މަސައްކަތްކުރާ އެޑިޓަރ ޖޫރިމަނާކުރުމަށްފަހު ދޫކޮށްލައިފިއެވެ.

މަރީނާ އޮވްސައްޔާނިކޮވާ ވަނީ ހޯމަ ދުވަހުގެ ރޭ ރަޝިޔާގައި އެންމެ ގިނަ ބަޔަކު ބަލާ އެއް ޗެނަލު ކަމަށްވާ ޗެނަލް ވަން އިން އެންކަރު ޚަބަރު ކިޔަމުން ދަނިކޮށް ފަހަތުން ޕޯސްޓަރު ހިފައިގެން ހުރެ ހަނގުރާމަކުރުން ކުށްވެރިކުރާކަމަށް ބުނެ އަޑު އުފުލާފައެވެ. ޕޯސްޓަރު ހިފައިގެން ހުރެ ރަޝިޔާއިން ޔޫކްރެއިން އާއި ދެކޮޅަށް ކުރަމުންދާ ހަނގުރާމަ ކުށްވެރިކުރާކަމަށް ބުނެ އަޑުއުފުލުމުން މަރީނާ ވަނީ ހައްޔަރުކޮށްފައެވެ. ކޯޓުން އޭނާ ދޫކޮށްލާފައިވަނީ 280 ޑޮލަރުން ޖޫރިމަނާ ކުރުމަށްފަހުއެވެ.

މަރީނާ ހިފަހައްޓައިގެން ހުރި ޕޯސްޓަރުގައި ލިޔެފައިވަނީ "ހަނގުރާމަކުރުން ހުއްޓާލާ، ފަތުރަމުންދާ ޕްރޮޕެގެންޑާ ގަބޫލުނުކުރޭ، އެމީހުން މިތާންގައި ހަދަމުންދަނީ ހުސް ދޮގު" އެވެ.

އެންކަރު ޚަބަރު ކިޔަމުންދަނިކޮށް މަރީނާ އެންކަރުގެ ސައިޑަކުން ޕޯސްޓަރު ހިފައިގެން ހުރެ "ހަނގުރާމަކުރުން ހުއްޓާލާ، ހަނގުރާމައަށް ނޫނެކޭ ބުނެ" ހަޅޭއްލަވާ އަޑުވެސް އިވިގެންދެއެވެ.

މުޒާހަރާކުރުމާއި ބެހޭ ގާނޫނުގެ ދަށުން މަރީނާ ކުށްވެރިވާއިރު މިހާރު ދީފައިވާ އަދަބަށްވުރެ އިތުރު އަދަބުތަކެއް ނުވަތަ އިތުރު ދައުވާތަކެއް އުފުލާނެކަމެއް އަދި ސާފެއް ނޫނެވެ.

ސްޓޭޓް ޓީވީގައި ހަނގުރާމައާއި ދެކޮޅަށް އަޑުއުފުލުމުން ޔޫކްރެއިންގެ ރައީސް ވޮލޮޑަމިއަރ ޒެލެންސްކީ ވަނީ އަންގާރަ ދުވަހުގެ ރޭ ވީޑިއޯ މެދުވެރިކޮށް ވާހަކަދައްކަވަމުން އެކަމަށް ޝުކުރު އަދާކުރައްވާފައެވެ. ޒެލެންސްކީ ވިދާޅުވީ ތެދު ހާމަކުރުމަށް މަސައްކަތްކުރާ ރަޝިޔާގެ ރައްޔިތުންނަށް ޝުކުރު އަދާކުރާކަމަށެވެ. ދުނިޔެއަށާއި އެކުވެރިންނަށާއި ލޯބިވާ މީހުންނަށް މިހަނގުރާމައިގެ އަސްލު ތެދު މައުލޫމާތު ފޯރުކޮށްދެމުންދާކަން ޒެލެންސްކީ ފާހަގަކުރެއްވިއެވެ. އަދި ޗެނެލް ވަންގެ ސްޓޫޑިއޯއަށް ވަދެ ހަނގުރާމައާއި ދެކޮޅަށް އަޑުއުފުލި އަންހެން މީހާއަށް ވަކިން ޚާއްސަކޮށް ޝުކުރު އަދާކުރަކަމަށް ޒެލެންސްކީ ވިދާޅުވިއެވެ.

ރަޝިޔާގެ ރިޔާސީ ގަނޑުވަރު ކްރެމްލިންގެ ސްޕޯކްސްމަން ޑިމިޓްރީ ޕެސްކޯވް ވަނީ މިއަމަލަކީ ގޭންގުތަކުން ހިންގާފަދަ އަމަލެއްގެ ގޮތުގައި ސިފަކޮށްފައެވެ. އަދި ޗެނަލް ވަން އިން މިކަމުގެ އެންމެ ފުނަށް ވާސިލުވާނެކަމަށް ވަނީ ވިދާޅުވެފައެވެ.

މިކަމާއި ގުޅިގެން މިވަގުތު ޖަލުގައި ހުރި ރަޝިޔާގެ އިދިކޮޅު ލީޑަރ އެލެކްސީ ނަވަލްނީގެ ސްޕޯކްސްވުމެން ކުރި ޓްވީޓެއްގައި ވަނީ ނޫސްވެރިޔާގެ ހިތްވަރަށް ތައުރީފުކޮށްފައެވެ. އެވީޑިއޯއާއެކު ކުރި ޓްވީޓް އެތައް ބަޔަކު ރީޓްވީޓްކޮށްފައިވާއިރު ވީޑިއޯ ބެލި މީހުންގެ އަދަދު 2.6 މިލިއަނަށްވުރެ ގިނައެވެ.

ކޯޓުގައި ބޭއްވި އަޑުއެހުމަށްފަހު ނޫސްވެރިންނާއި ވާހަކަދައްކަމުން މަރީނާ ބުނީ 14 ގަޑިއިރު ވަންދެން ސުވާލުކުރުން ކުރިޔަށް ގެންގޮސްފައިވާ ކަމަށާއި މިހާރު ވަރުބަލިވެފައިވާކަމަށެވެ. އަދި ފާއިތުވި ގަޑިއިރު ތަކުގެ ތެރޭގައި ގާތްތިމާގެ މީހަކާއި ވާހަކަދެއްކެމުގެ ފުރުސަތު ދީފައިނުވާއިރު ގާނޫނީ ގޮތުންވެސް އެހީތެރިކަމެއް ދީފައިނުވާކަމަށް ވަނީ ބުނެފައެވެ. އިތުރަށް މިކަމާއި ގުޅިގެން ވާހަކަދެއްކުމުގެ ކުރިން ރެސްޓެއް ނަގާލަން ބޭނުންވާކަމަށް ވަނީ ބުނެފައެވެ.

މަރިނާ މިގޮތަށް އަޑުއުފުލުމާއެކު 15 އަހަރުގެ ޖަލު ހުކުމެއް އޭނާއަށް އައުމަކީ ގާތްކަމެކެވެ. ލައިވްކޮށް ޓީވީގައި ހަނގުރާމައާއި ދެކޮޅަށް އަޑުއުފުލުމުގެ ކުރިން މަރީނާ ރިކޯޑްކޮށްފައިވާ ވީޑިއޯއެއް ވަނީ ސޯޝަލް މީޑިޔާގައި ޕޯސްޓްކޮށްފައެވެ. އެވީޑިއޯގައި އޭނާ ވަނީ ރަޝިޔާގެ ރައީސް ވްލަޑްމިއަރ ޕުޓިން އަށް ވަރަށް ބޮޑަށް ފާޑުކިޔާފައެވެ. އަދި ޔޫކްރެއިންގައި ހިނގަމުންދާ ކަންކަމަކީ ޕުޓިން ޒިންމާވާން ޖެހޭ ކަމެއްކަމަށާއި އެތައް އަހަރެއް ވަންދެން ކްރެމްލިންގެ ޕްރޮޕެގެންޑާ ފެތުރުމަށް ޗެނަލުގައި މަސައްކަތްކުރެވުނީތީ ލަދުގަންނަ ކަމަށް ވީޑިއޯގައި މަރީނާ ބުނެފައިވެއެވެ.

މަރީނާ ވަނީ ހަނގުރާމައާއި ދެކޮޅަށް އަޑުއުފުލުމަށް ރަޝިޔާގެ ރައްޔިތުންނަށް ގޮވާލާފައެވެ.