ވެލާ އެޅި ބިސްތައް އީޕީއޭގެ ބެލުމުގެ ދަށަށް، ބިސް ފީކުރާނީ ކުޑަހުރާގައި
16 މާރިޗު 2022 | ބުދަ 00:29ވެލާ ބިސްއަޅާފައިވަނީ އަންގާރަ ދުވަހުގެ ރޭ ދަންވަރުގެ ވަގުތެއްގައި
ބުރިޖާ ދިމާލުން މާލޭގެ އިރު ދެކުނު ފަރާތު ގޮނޑުދޮށަށް އެރި ވެލާ އެޅި ބިސްތައް އީޕީއޭއިން ނަގަނީ
މާލޭގެ ސިނަމާލެ ބްރިޖް ސަރަހައްދަށް އެރި ވެލާ އެޅި ބިސްތައް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)ގެ ބެލުމުގެ ދަށަށް ގެންގޮސްފިއެވެ.
އަންގާރަ ދުވަހުގެ ރޭ އެސަރަހައްދަށް ވެލާ އެރުމާއެކު ފުލުހުން ވަނީ އެސަރަހައްދު ކޯޑަން ކުރުމަށްފަހު ވެލައަށް ރައްކާތެރިކަން ދީފައެވެ. ވެލައަށް ހިމާޔަތްދިނުމަށް އީޕީއޭއިން ވަނީ ފުލުހުންނަށް އަންގާފައެވެ. އަންގާރަ ދުވަހުގެ ރޭގެ ދަންވަރުގެ ވަގުތެއްގައި ވެލާ ވަނީ ބިސް އަޅާފައެވެ. ބިސް އެޅުމަށްފަހު ވެލާ ވަނީ ފައިބައިގެންގޮސްފައެވެ. އޭގެފަހުންވެސް ފުލުހުން ދިޔައީ އެސަރަހައްދު ބަލަހައްޓަމުންނެވެ.
އީޕީއޭގެ ޓީމުން ގޮސް ވެލާ އެޅި ބިސްތައް ނަގާފައިވަނީ ފަތިހު 4ވެސް ޖެހިފަހުންނެވެ. ރާއްޖެއެމްވީއަށް މައުލޫމާތު ދެމުން އެންވަޔަރަމަންޓް މިނިސްޓްރީން ބުނީ ވެލާ ބިސްތައް އީޕީއޭގެ ބެލެމުގެ ދަށުން ހެޗަރީއަކަށް ގެންދާނެ ކަމަށެވެ. އަދި ބިސް ފީ ކުރާނީ ވެސް އީޕީއޭގެ ބެލުމުގެ ދަށުން ކަމަށެވެ. ބިސްތައް ފީކުރަނީ ކުޑަހުރާގައެވެ.
ބިސްތައް އެހެންތަނަކަށް ބަދަލުކުރުމާއި ގުޅޭގޮތުން އީޕީއޭއިން ބުނީ ބުރިޖުކައިރިއަށް ބިސް އަޅާފައިވާތަކުގެ ގޮތުން ބިސް ފީވުމުގެ ފުރުސަތު ކުޑަކަމަށެވެ. އަދި އެތަނަކީ ރާޅު ޖަހާ ސަރަހައްދު ކަމަށްވެފައި އެންމެ ރަނގަޅު ގޮތަކީ ބިސްތައް ނަގައި ރައްކާތެރި ހިސާބަކަށް ގެންދިއުން ކަމަށާއި ބިސްތައް ނުނަގައިވާނެ ހުރިހާ ގޮތެއް ބެލި ކަމަަށެވެ. އަދި މިއީ ދުނިޔޭގެ އެހެން ހިސާބުތަކުގައިވެސް އަމަލުކުރަމުން އަންނަ ގޮތް ކަމަށާއި، ބިސްތައް ނަގާފައިވަނީ އެނޫން އެހެން ގޮތެއް ނެތުމުން ކަމަށެވެ.
އީޕީއޭއިން ބުނީ ކުޑަހުރާގައި ބިސް ހެޗަރީގައި ބިސް ފީކުރާނެ ކަމަށެވެ. އަދި އީޕީއޭއިން އެކަން ގާތުން ބަލަމުން އަންނާނެ ކަމަށެވެ.
އީޕީއޭއިން ބުނީ ގުދުރަތީގޮތުން ވެލާ ބިސްއަޅާނީ އެ ވެލައެއް އުފަންވިތަނަކަށް ކަމަށާއި މާލެއަށް ބިސްއެޅި ވެލާގެ ބިސްތައް ފީވި ނަމަވެސް އެއެއްޗެހި ބިސްއަޅަން އަނބުރާ އަންނާނެ ކަމަށް ބެލެވޭ ކަމަށެވެ.
ސިނަމާލެ ބުރިޖު ކައިރިއަށް ބިސްއެޅި ވެލާގެ ބިސްވަޅު ކޮނެފައިވަނީ އީޕީއޭގެ ކަމާއިގުޅުންހުރި ފަރާތްތަކުންނެވެ. ބިސްވަޅުކޮނުނު އިރު އެތަނުގައި ރާއްޖެޓީވީގެ ނޫސްވެރިން ތިއްބެވެ.
މިއީ ފަހުގެ ތާރީޚެއްގައި ވެލައެއް މާލެއަށް އަރާ ބިސް އަޅާފައިވާ ފުރަތަމަ ފަހަރެވެ. މީގެކުރިން މިއަހަރުގެ ފެބްރުއަރީ މަހުގެ 27 ގައިވެސް މާލެއަށް ވަނީ ވެލާ އަރާފައެވެ. ނަމަވެސް އެފަހަރު ވަނީ ފުލުހުން އެވެލާ މޫދަށް ބާލާފައެވެ. އެކަމާއި ގުޅިގެން ގިނަ ބަޔެއްގެ ފާޑުކިޔުންތައްވެސް އަމާޒުވެފައިވެއެވެ.
ވެލާ އެރުމާއެކު ކޮންމެ ފަހަރަކުވެސް ގިނަ ބަޔަކު ވެލާ ކައިރިއަށް ގޮސް ފޮޓޯ ނަގާހަދައެވެ. މިފަހަރުވެސް ވެލާ އެރުމާއެކު ގިނަ ބަޔަކު ވަނީ ފޮޓޯ ނަގާހަދާފައެވެ
