ދަރިވަރުން އެންރޯލްކުރުމާއި ކިޔަވައިދިނުމާބެހޭ އުސޫލު އެކުލަވާލައި, މިއަދު ދިވެހި ސަރުކާރުގެ ގެޒެޓްގައި ޝާއިއުކޮށް އެއަށް އަމަލުކުރަންފަށައިފިއެވެ.

މި އުސޫލަކީ، މަތީ ތައުލީމާއި ތަމްރީނުގެ ގާނޫނުގެ 7 ވަނަ މާއްދާގެ (ހ)ގެ ދަށުން، ދިވެހިރާއްޖޭގައި ހިންގާ މަތީ ތައުލީމާއި ތަމްރީނު ޕްރޮގްރާމްތަކުގެ ފެންވަރު ކަށަވަރުކުރުމުގެ އުސޫލުތައް ހަދައި ހިންގުމުގެ ތެރެއިން އެކުލަވާލެވިފައިވާ އުސޫލެކެވެ.

މި އުސޫލުގެ މަގުސަދަކީ, މޯލްޑިވްސް ކޮލިފިކޭޝަންސް އޮތޯރިޓީން ހުއްދަދީގެން މަތީ ތައުލީމުގެ ޕްރޮގްރާމްތައް ހިންގައި މަތީ ތައުލީމުދޭ މަރުކަޒުތަކުގައި, މަތީ ތައުލީމުގެ ޕްރޮގްރާމްތައް ހިންގުމުގައި ދަރިވަރުން އެންރޯލްކުރުމާއި ކިޔަވައިދިނުމުގައި ޢަމަލުކުރަންޖެހޭ އެންމެހާ އުސޫލުތައް ކަނޑައެޅުމެވެ.

މި އުސޫލުގައި ދަރިވަރުން ކޯސްތަކަށް އެންރޯލްކުރުމާއި، ކިޔަވައި ދިނުމާ ގުޅޭގޮތުން, މޯލްޑިވްސް ކޮލިފިކޭޝަންސް އޮތޯރިޓީން ހުއްދަދީގެން, މަތީ ތައުލީމުގެ ޕްރޮގްރާމްތައް ހިންގައި މަތީ ތަައުލީމުދޭ މަރުކަޒުތަކުން އަމަލުކުރަންޖެހޭ މިންގަނޑުތައް ބަޔާންކޮށްފައިވެއެވެ. އޭގެ ތެރޭގައި ކިޔަވައިދެވޭނެ ސެމިސްޓަރތަކުގެ އަދަދާއި، އަހަރެއްގެ ތެރޭގައި އެންމެ ގިނައިން ކިޔައިދެވޭނެ "ވޯރކް ލޯޑް"އާއި، ސެމިސްޓަރތަކުގެ އިންޓޭކާ ގުޅުވައިގެން ދަރިވަރުން އެންރޯލްކުރުމާއި، ލެކްޗަރަރުން ހަމަޖެއްސުމަށްފަހު, ސެމިސްޓަރ ފެށޭއިރު މޮޑިއުލްތައް ކިޔަވައިދޭން ފަށަން ކަނޑައަޅާފައިވެއެވެ.

އަދި މި އުސޫލާ ޚިލާފަށް, މޯލްޑިވްސް ކޮލިފިކޭޝަންސް އޮތޯރިޓީން ހުއްދަދީގެން މަތީ ތައުލީމުގެ ޕްރޮގްރާމްތައް ހިންގާ މަތީ ތައުލީމުދޭ މަރުކަޒުތަކުން އަމަލުކޮށްފިނަމަ، އެ މަރުކަޒަކާމެދު އަޅާނެ ފިޔަވަޅުތަކުގެ ތެރޭގައި، ފާހަގަކުރެވޭ މައްސަލަތައް އިޞްލާހުކުރުމަށް އެކަށީގެންވާ މުއްދަތެއް ކަނޑައަޅައި ނޯޓިސް ދިނުމާއި، އެއަށްފަހު އިސްލާހުނުކޮށްފިނަމަ، އެ ޕްރޮގްރާމަށް ދީފައިވާ ހިންގުމުގެ ހުއްދަ ބާތިލުކުރެވޭނެކަން ބަޔާންކޮށްފައިވެއެވެ.

 މި އުސޫލަށް މިއަދު އަމަލުކުރަންފަށާފައިވާއިރު މިއަދުންފެށިގެން 4 މަސް ދުވަހުގެ ތެރޭގައި، މަތީ ތައުލީމުދޭ މަރުކަޒުތަކުން، އެ މަރުކަޒެއްގެ އެކަޑަމިކް ކަލަންޑަރާއި، ކިޔަވައިދިނުމުގެ ކަންކަން އިންތިޒާމްކޮށްފައިވާ ގޮތް މޯލްޑިވްސް ކޮލިފިކޭޝަންސް އޮތޯރިޓީއަށް ހުށަހަޅަން މި އުސޫލުގައިވަނީ ކަނޑައަޅާފައެވެ.

މަތީ ތައުލީމާއި ތަމްރީނުގެ ގާނޫނުގެ ދަށުން، ރާއްޖޭގެ މަތީތައުލީމުގެ ފެންވަރު ކަށަވަރުކުރުމަށާއި، މޯލްޑިވްސް ކޮލިފިކޭޝަންސް އޮތޯރިޓީގެ މަސައްކަތްތައް ހަރުދަނާކުރުމަށްޓަކައި މިނޫން ގަވާއިދުތަކާއި އުސޫލުތައް ހެދުމުގެ މަސައްކަތް ވެސް މޯލްޑިވްސް ކޮލިފިކޭޝަންސް އޮތޯރިޓީން ވަރަށް ހަލުވިކަމާއެކު ކުރިއަށްގެންދެއެވެ.