އިރާގްގެ ގަދީމީ ސައިޓް، "ހަތްރާ" މަރާމާތަށްފަހު ހުޅުވައިފި

އިރާގުގެ ގަދީމީ ސައިޓްއެއްކަމަށްވާ "ހަތްރާ" މަރާމާތު ކުރުމަށްފަހުން އަލުން އާންމުންނަށް ހުޅުވާލީ ފެބްރުއަރީ މަހުގެ 24 ވަނަ ދުވަހުއެވެ. އެތަން ހަލާކުކޮށްލާފައިވަނީ، މީގެ އަހަރުތަކެއް ކުރިން އައިއެސްގެ ހަނގުރާމަވެރިންނެވެ. 

އިރާގްގެ އަރކިއޮލޮޖިސްޓުން ބުނީ އެސައިޓުގެ 15 އިންސައްތައް ހަލާކުކޮށްލަފައިވާ ކަމަށެވެ.

"އަހަރެމެން، އަރކިއޮލޮޖިކަލް ޑިޕާރޓްމެންޓާއި، އިޓަލީގެ ވަފުދަކާއެކު މި މަސައްކަތްކުރީ އިސްލަމިކް ސްޓޭޓުން ހަލަކުކޮށްލާފައިވާ، މިތަނުގައި މިހާރު ފެންނަން ހުރި ފަންނީ މަސައްކަތައް ހޯދުމަށް. އެތަކެތި ދެން ގެންދިޔައީ މަރަމާތު ކުރުމަށް އަރކިއޮލޮޖިކަލް ސައިޓްގައި ހުންނަ އެކަމަށް ޚާއްސަ ލެބޯޓްރީއަށް. އެއަށްފަހު އަނބުރާ މިތަނަށް  ގެނެސް އެ ކުރިން ހުރި ތަނުގައި މި ބެހެއްޓީ " އިރާގް އާރކިއޮލޮޖީ ޑިޕާރޓްމެންޓްގެ އޮފިޝަލް މަހްމޫދު އަބްދުﷲ ވިދާޅުވިއެވެ.

އެ ސައިޓުގެ ފޮޓޯތައް 2015ވަނަ އަހަރު އާންމުވެގެން ދިޔައިރު އެ ފޮޓޯތަކުން ފެންނަ ގޮތުގައި މުޅި ސައިޓް ވަނީ ސިފަ ގެއްލިފައެވެ. އެތަނުގައި ހުރި ކުރެހުންތަކަށްވެސް ވަނީ ބޮޑެތި ގެއްލުންތަކެއް ވެފައެވެ.

އެ ސައިޓް މަރާމާތުކުރުމުގެ މަސައްކަތް ކުރިއަށް ގެންދިޔައީ އިޓަލިއަން އިންޓަރނޭޝަނަލް އެސޯސިއޭޝަން ފޯރ މެޑިޓެރޭނިއަން އެންޑް އޮރިއެންޓަލް ސްޓަޑީސް އިންނެވެ. މިހާތަނަށް މަރާމަތު ކުރެވުނީ ގާތްގަނޑަކަށް 5 އިންސައްތައެވެ.

ހަތްރާ ޕްރޮޖެކްޓްގެ ޑިރެކްޓަރ މަސިމޯ ވިޑޭލް ވިދާޅުވީ، "އަހަރެމެން ފުރަތަމަ މިތަނަށް އައި އިރު މިތަން އޮތީ ވަރަށް ހާލުދެރެކޮށް. ފާރުތަކާ އިމާރާތް އެއްކޮށް ވަނީ ހަލާކުވެފައި. ހަނގުރާމައިގައި ބޭނުން ކުރި އެއްޗެއްސާއި، ބޮންތައްވެސް ހުރި. އެހެންކަމުން ފުރަތަމަ އުނދަގޫތަކެއް ކުރިމަތިވި. މުޅިތަން ސާފުކުރުމަށް ބޮޑެތި ޚަރަދުތަކެއްވެސް ކުރަން ޖެހުނު. މަޑުމަޑުން މަސައްކަތް ފެށީ އިމާރަތް ސާފުކޮށް މިތަނުގައި ހުރި ކުރެހުންތައް އޭގެ އަސްލު ނުގެއްލޭ ގޮތަށް ސާފުކުރުމަށް" 

ޔުނެސްކޯއިން ހިމާޔަތްކޮށްފައިވާ ހަތްރާ ސައިޓް ހިމެނެނީ އިރާގާއި ސިރިއާގެ ފައުޖުތަކުން ހަނގުރާމައިގައި ހަލަކުކޮށްލާފައިވާ ގަދީމީ ސައިޓްތަކުގެތެރެއިން ސައިޓެއްގެ ގޮތުގައެވެ.