"ފަނޑިޔާރުންނަކީ ފާޑުކިޔުން ހަޖަމުކުރުމުގެ ގާބިލުކަން ހުރި ބަޔަކަށް ވާން ޖެހޭނެ"
ފަނޑިޔާރެއްގެ ދިރިއުޅުމަކީ ވަރަށް އެކަނިވެރި ދިރިއުޅުމެއް
ސިވިލް ކޯޓަށް އަލަށް އައްޔަނު ކުރެއްވި ފަނޑިޔާރުން ހުވާކުރުމުގެ ރަސްމިއްޔާތު
ފަނޑިޔާރުންނަކީ ފާޑުކިޔުންތައް ހަޖަމުކުރުމުގެ ގާބިލުކަން ހުންނަ ބަޔަކަށް ވާން ޖެހޭނެކަމަށް ސުޕްރީމް ކޯޓުގެ ފަނޑިޔާރު މުހައްމަދު އިބްރާހީމް ވިދާޅުވެއްޖެއެވެ.
ސިވިލް ކޯޓަށް އަލަށް އައްޔަނު ކުރެއްވި ފަނޑިޔާރުން ހުވާކުރުމަށް އަންގާރަ ދުވަހު ބޭއްވި ރަސްމިއްޔާތުގައި ވާހަކަދައްކަވަމުން މުހައްމަދު އިބްރާހީމް ވިދާޅުވީ، ފަނޑިޔާރުންނަކީ މަޑުމައިތިރި، ކެތްކުރުމުގެ ގާބިލުކަން ލިބިފައިވާ ބަޔަކަށް ވާންޖެހޭނެ ކަމަށެވެ. އެހެންނަމަވެސް، މި ސިފަތަކަކީ އަދުލުވެރިކަމާއެކު ނިންމުންތައް ނިންމުމުގައި އޮތް ހުރަހަކަށް ވެގެން ނުވާނެކަމަށްވެސް އޭނާ ވިދާޅުވިއެވެ.
ހަމައެއާއެކު، ފަނޑިޔާރުންނަކީ ސާދާ ދިރިއުޅުމަކަށް ލޯބިކުރާ ބަޔަކަށް ވާންޖެހޭނެ ކަމަށްވެސް އޭނާ ވިދާޅުވިއެވެ. ލިބޭ އެއްޗަކުން ދެކޮޅު ޖެއްސުނު ނަމަވެސް، ދަހި މީހަކަށް ފަނޑިޔާރުން ވެގެން ނުވާނެކަމަށް އޭނާ ވިދާޅުވިއެވެ. ހަމައެއާއެކު، ފަނޑިޔާރުންނަށް ކުރިމަތިވާ ކަންކަން ތަހައްމަލު ކުރުމުގެ ގާބިލުކަން ހުންނަން ޖެހޭނެކަމަށްވެސް ވިދާޅުވިއެވެ.
މީގެއިތުރުން، ފަނޑިޔާރުންނަކީ ފާޑުކިޔުންތައް ހަޖަމު ކުރުމުގެ ގާބިލުކަން ހުރި ބަޔަކަށް ވާން ޖެހޭނެކަން އޭނާގެ ވާހަކަފުޅުގައި ފާހަގަކުރެއްވިއެވެ.
ފަނޑިޔާރުގެ ދިފާއުގައި އޮންނަ ހަމައެކަނި އެއްޗަކީ އެ ފަނޑިޔާރަކު ކުރާ ހުކުމްކަން ފާހަގަކުރައްވައި އޭނާ ވިދާޅުވީ، ތާއަބަދަށްވެސް އެ ފަނޑިޔާރެއްގެ ދިފާއުގައި އޭނާ ކުރާ ހުކުމްތައް އޮންނާނެ ކަމަށެވެ. ނަމަވެސް އެ ހުކުމަކީ އޮއްޓަރުހުރި، ފަންވަރު ހެޔޮ ހުކުމެއް ކަމުގައި ވާން ޖެހޭނެކަމަށެވެ.
އޮއްޓަރުހުރި ހުކުމެއް ކުރުމަށްޓަކައި އަބަދުވެސް މާތް ﷲއަށް ބިރުވެތިވުމާއި، ކުރިން ނިންމާފައިވާ ނިންމުންތައް ބަލައި ދިރާސާކުރުމުގެ އިތުރުން، އިލްމުވެރިންނާ މަޝްވަރާ ކުރުމަކީ އިސްލާމީ ތާރީޚުން ދައްކުވައިދޭ މިސާލުތައްކަމަށް ފަނޑިޔާރު މުހައްމަދު އިބްރާހީމް ވިދާޅުވިއެވެ.
އޭގެ އިތުރުން، ނުތަނަވަސްކަމާއި، ބަނޑުހައިހޫނުކަމުގެ މަތީގައި ހުރެ ހުކުމްކޮށްގެން ނުވާނެކަންވެސް ފާހަގަ ކުރެއްވިއެވެ. އެގޮތުން ތިމާ ނަފްސާނީ ގޮތުން ތައްޔާރުނުވެ ކުރާ ހުކުމް ބައެއް ފަހަރު އެންމެ ރަނގަޅު ގޮތަކަށް ނުކުރެވި ހިނގައިދާނެކަމަށް ވިދާޅުވިއެވެ.
ރަސްމީ މަސައްކަތަށްފަހުވެސް ފަނޑިޔާރުންގެ އަމަލުތައް ބައްޓަން ކުރަންޖެހޭ ގޮތާމެދު ފަނޑިޔާރު ވަނީ އިސްލާމީ ތާރީޚީ މިސާލުތަކާއެކު، އޭނާގެ ޝުއޫރު ހިއްސާކުރައްވާފައެވެ. އެގޮތުން ރީތިކޮށް ހެދުން އެޅުމާއި، އާންމު މުޖުތަމައު ގަބޫލުކުރާ މިންގަނޑުގައި އަމަލުތައް ބެހެއްޓުން މުހިއްމުކަމަށް ވިދާޅުވިއެވެ.
މި ހުރިހާ ކަމަކާއެކު، ފަނޑިޔާރެއްގެ ދިރިއުޅުމަކީ ވަރަށް އެކަނިވެރި ދިރިއުޅުމެއްކަމަށް އޭނާ ވިދާޅުވިއެވެ.
އަންގާރަ ދުވަހު ބޭއްވި މި ރަސްމިއްޔާތުގައި ފަނޑިޔާރު ކަމުގެ ހުވާކޮށްފައިވަނީ ސ. ފޭދޫ، ފިތިރޯނުގެ، އަލްއުސްތާޒާ ޒުލައިޚާ ޝީޒާއާއި ގއ. މާމެންދޫ، ފެހިގެ، އަލްއުސްތާޒު އަހުމަދު ނިމާލް ޖުނައިދުއެވެ.
