ނިންމުންތައް ނިންމަނީ ވަރަށް ގިނަ ކަންކަމަށް ބެލުމަށް ފަހު: ހެލްތް މިނިސްޓްރީ
15 މާރިޗު 2022 | އަންގާރަ 01:55ސިއްހީ ކުއްލި ނުރައްކަލުގެ ހާލަތު މިހާރު ވަނީ އުވާލާފައި
ހެލްތް މިނިސްޓްރީގެ ޕާމަނަންޓް ސެކެޓްރީ އައިޝަތު ސާމިޔާ
ހެލްތް މިނިސްޓްރީން މިހާތަނަށް ނިންމާފައިވާ ކޮންމެ ނިންމުމަކީވެސް އެއިރެއްގެ ހާލަތަށް ވަރަށް ބޮޑަށް ރިއާޔަތްކުރުމަށްފަހު ނިންމާފައިވާ ނިންމުމެއް ކަމަށް އެ މިނިސްޓްރީން ބުނެފިއެވެ.
ކޮވިޑް-19އާއި ގުޅިގެން މީގެ 2 އަހަރު ކުރިން އިއުލާނުކޮށްފައިވާ ސިއްހީ ކުއްލި ނުރައްކަލުގެ ހާލަތު މިހާރު ވަނީ އުވާލާފައެވެ. ސަރުކާރުގެ މި ނިންމުމާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ހެލްތް މިނިސްޓްރީގެ ޕާމަނަންޓް ސެކެޓްރީ އައިޝަތު ސާމިޔާ ވިދާޅުވީ މިކަހަލަ ކަންކަމުގައި މިހާތަނަށް މިނިސްޓްރީން ނިންމުންތައް ނިންމާފައިވާނީ ވަރަށް ގިނަ ކަންކަމަށް ރިއާޔަތްކުރުމަށް ފަހުގައި ކަމަށެވެ.
މިކަންކަން ކުރުމަށް ޚާއްސަ ސްޓްރެޓެޖީއަކާއި ޕްލޭންތަކެއް އެކުލަވާލެވިފައިވާ ކަމަށާއި، މިހާރުވެސް އަމަލުކުރަމުންދަނީ އެ ޕްލޭނާއި އެއްގޮތަށް ކަމަށް ސާމިޔާ ވިދާޅުވިއެވެ. ސާމިޔާ ވިދާޅުވީ މިކަން ކުރުމުގައި ދުނިޔޭގެ ސިއްހަތު ޖަމިއްޔާއިން ބަލާ މިންގަނޑުތަކުގައި ހިމެނޭ 10 ބަޔަކަށް ބަލާފައިވާނެ ކަމަށެވެ.
އާންމު ސިއްހަތުގެ ކުއްލި ނުރައްކަލުގެ ހާލަތު އުވާލަން ނިންމާފައިވަނީވެސް ވަރަށް ގިނަ ކަންކަމަށް ރިއާޔަތްކުރުމަށްފަހުގައި ކަމަށް ސާމިޔާ ވިދާޅުވިއެވެ. އަދި މި ނިންމުމާއެކު ބައެއް ފިޔަވަޅުތަކަށް ލުއި ދިނުމާއި، ބައެއް ފިޔަވަޅުތައް ދެމެހެއްޓިގެންދަނީވެސް މިހާރުގެ ހާލަތަށް ވަރަށް ބޮޑަށް ރިއާޔަތްކުރުމަށްފަހުގައި ކަމަށް ސާމިޔާ ވިދާޅުވިއެވެ.
ސާމިޔާ ވިދާޅުވީ ދިން ލުއިތަކުގެ ތެރޭގައި މާސްކު އެޅުން މަޖުބޫރު ނުވުން ހިމެނޭ ކަމަށެވެ. މިއީ ބަލި ކޮންޓްރޯލްކުރުމުގައި ވަރަށް ރަނގަޅު ނަތީޖާއެެއް ދައްކާފައިވާ ކަމެެއް ކަމަށް އޭނާ ވިދާޅުވިއެވެ. ސާމިޔާ ވިދާޅުވީ މާސްކު އެޅުން މިވަގުތަށް މަޖުބޫރުނުވިޔަސް އަދިވެސް މާސްކު އަޅަންޖެހޭނެ ހާލަތްތަކެއްވާ ކަމަށެވެ. މީގެ ތެރޭގައި ސިއްހީ ޚިދުމަތްދޭ ތަނަކަށް ދާއިރު މާސްކު އަޅަން ޖެހުމާއި، ޕޮޒިޓިވްވާ މީހުންނާއި، އެމީހުންނާއި އެކުގައި އުޅޭ ޑައިރެކްޓް ކޮންޓެކްޓުން މާސްކު އަޅަން ޖެހުމާއި، ޕޮޒިޓިވިޓީ ރޭޓު 20 އިންސައްތައަށްވުރެ މަތީ ރަށްރަށުގައި އަދިވެސް މާސްކު އަޅަން ޖެހޭނެ ކަމަށް އޭނާ ވިދާޅުވިއެވެ.
