ރަޝިޔާއާއި ދެކޮޅަށް، އޮސްޓްރޭލިއާ އާއި ނެދަލޭންޑްސް އިން ގުޅިގެން އެމްއެޗް17 ވައްޓާލި މައްސަލައިގައި ބައިނަލްއަގުވާމީ ސިވިލް އޭވިއޭޝަން އޮގަނައިޒޭޝަނަށް ގާނޫނީ މައްސަލައެއް ވައްދަން ނިންމައިފިއެވެ.

މީގެ 8 އަހަރު ކުރިން ޔޫކްރޭންގެ މަތިން ދަތުރުކުރަމުން ދިޔަ މެލޭޝިއާގެ މަތިންދާ ބޯޓު، އެމްއެޗް17 ވައްޓާލައިފައި ވަނީ ރަޝިއާގެ މިސައިލްއަކުން ކަމަށް ތަހްގީގު ކުރަމުންދާ ބައިނަލް އަގްވާމީ ޓީމުން ބުނެފައިވެއެވެ. ނެދަލޭންޑްސް ގައި ހުންނަ ބައިނަލްއަގްވާމީ ކޯޓް، ދަ ހޭގްއަށް އެ ޓީމުން އޭރު ހުށަހެޅި ރިޕޯޓްގައި ބުނެފައިވަނީ 2014 ވައްޓާލި މަތިންދާ ބޯޓަށް ހަމަލާ ދީފައިވާނީ ރަޝިއާގެ މިސައިލް އަކުން ކަމަށް އެކަށީގެންވާ ހެކިތައް ލިބިފައިވާ ކަމަށެވެ.

އެމްއެޗް17، ބޮއިންގް 777 ގެ މަތިންދާ ބޯޓު ގޮއްވާލާފައި ވަނީ އެމްސްޓަޑާމްއިން މެލޭޝިއާގެ ވެރިރަށް ކުއަލަ ލަމްޕޫރަށް ދަނިކޮށެވެ. އެ ހާދިސާގައި ބޯޓުގެ ހުރިހާ ފަތުރުވެރިންނާއި ފަޅުވެރިން ވަނީ މަރުވެފައެވެ.

މި ހާދިސާގައި ބޯޓުން ދަތުރުކުރި 298 މީހުން މަރުވި އިރު އޭގެ ތެރޭގައި އޮސްޓްރޭލިއާގެ 38 މީހުން ހިމެނެއެވެ. އޮސްޓްރޭލިއާގެ ބޮޑުވަޒީރު ސްކޮޓް މޮރިސަން އާއި ހާރިޖީ ވަޒީރު މެރިސް ޕޭން ވިދާޅުވެފައިވަނީ ބޯޓު ވައްޓާލުމުގެ ޒިންމާ ބައިނަލް އަގުވާމީ ގާނޫނުގެ ދަށުން ނަގަންޖެހޭނީ ރަޝިޔާއިން ކަމަށެވެ.

ނަމަވެސް ރަޝިޔާއިން އަންނަނީ މި ތުހުމަތުތަައް ދޮގުކުރަމުންނެވެ. އަދި އެފަދަ ކަމެއް ނުކުރާކަމުގެ ތިއަރީތަކެއް ދައްކާފައިވެއެވެ. ނަމަވެސް ބައިނަލްއަގުވާމީ އިންވެސްޓިގޭޓަރުން ވަނީ ހެކި ނެތުމުގެ ސަބަބުން އެކަން ބަލައި ނުގަނެފައެވެ.

2008 ވަނަ އަހަރު އެމްއެޗް 17 ވެއްޓުނު ހާދިސާ ތަހުޤީޤުކުރި ނެދަލެންޑްސްގެ ޓީމުން ބުނީ އެމަތިންދާ ބޯޓަށް އަރާފައިވަނީ ބީޔޫކޭ މިސައިލެއްކަމަށާއި، މިސައިލް ފޮނުވާލީ ޔޫކްރެއިންގައި ހަރަކާތްތެރިވި ރަޝިޔާއިން ވާގިވެރިވާ އިދިކޮޅު ފަރާތްތަކުގެ ކޮންޓްރޯލްގެ ދަށުގައިވާ ސަރަހައްދަކުން ކަމަށާއި، މިސައިލް ފޮނުވާލީ ރަޝިޔާގެ އަސްކަރިއްޔާގެ 53ވަނަ ބްރިގޭޑްގެ އަސްކަރީ ވެހިކަލްތައް ހިމެނޭ ފައުޖުންކަމަށެވެ. 

2015 ވަނަ އަހަރުވެސް ނެދަލެންޑްސްގެ ތަޖުރިބާކާރުން ވަނީ މަތިންދާބޯޓު ވެއްޓުނީ ރަޝިޔާގެ ބީޔޫކޭ މިސައިލަކުން ކަމަށް ބުނެފައެވެ. އަދި އޭގެ ފަހުން މިމައްސަލަ ތަހުޤީޤުކުރި ޖޮއިންޓް އިންވެސްޓިގޭޝަން ޓީމުން 2016 ވަނަ އަހަރުގެ ސެޕްޓެމްބަރު މަހުވެސް އެޓީމުން ހާމަކުރި މައުލޫމާތު ޕްރިލިމިނަރީ ރިޕޯޓެއްގެ ގޮތުގައި އާއްމުކޮށްފައިވެއެވެ. މި ޓީމުގައި ހިމެނެނީ ނެދަލެންޑްސް، އޮސްޓްރޭލިއާ، ބެލްޖިއަމް، މެލޭޝިއާ އަދި ޔޫކްރެއިންގެ ތަޖުރިބާކާރުންނެވެ. 

އެޓީމުގެ ހޯދުންތަކާއި ގުޅޭގޮތުން ރަޝިޔާ ސަރުކާރުން ބުނީ އެރިޕޯޓު ޤަބޫލު ނުކުރާކަމަށާއި، އެތުހުމަތުތަކުގައި އެއްވެސް އަސްލެއް ނުވާކަމަށެވެ.