ޔޫކްރެއިންގެ ރެފިއުޖީން ގޮވައިގެން ދަތުރުކުރަމުންދިޔަ ބަހެއް ފުރޮޅާލައިފި

ޔޫކްރެއިންގެ ރެފިއުޖީން ގޮވައިގެން ދަތުރުކުރަމުންދިޔަ ބަހެއް ފުރޮޅާލައި އެކަކު މަރުވެފައިވާކަމަށް ރޮއިޓަރސް އިން ރިޕޯޓްކޮށްފިއެވެ.

ރޮއިޓަރސް އިން ރިޕޯޓްކޮށްފައިވާ ގޮތުން ޔޫކްރެއިންގެ ރެފިއުޖީން ގޮވައިގެން ބަސް ދަތުރުކުރަމުން ދިޔައީ އިޓަލީގެ ޕެސްކަރާ އަށެވެ. މި ބަސް ފުރޮޅާލާފައި ވަނީ އިޓަލީގެ ސެސީނާ އާއި ރިމިނީގެ ދެމެދު ދަތުރުކުރަން އޮންނަ ހައިވޭ މަތިން ކަމަށް އިޓަލީގެ އިންޓީރިއާ މިނިސްޓްރީއާއި ހަވާލާދީ ވަނީ ރިޕޯޓުކޮށްފައެވެ.

އެމިނިސްޓްރީން މައުލޫމާތުދިން ގޮތުގައި ބަހުގައި ދަތުރުކުރަމުން ދިޔައީ އަންހެނުންނާއި ކުޑަކުދިން ގޮވައިގެންނެވެ. އެގޮތުން ކުޑަކުދިން ހިމެނޭ ގޮތަށް ޖުމުލަ 50 މީހުން އެބަހުގައި ދަތުރުކުރަމުން ދިޔަ ކަމަށް މައުލޫމާތުދީފައިވެއެވެ.

ބަސް ފުރޮޅާލުމާއި ގުޅިގެން ގިނަ ބަޔަކަށް އެކި ވަރުގެ ޒަހަމުތައް ލިބިފައިވާއިރު، އެއް އަންހެނަކު ވަނީ މަރުވެފައެވެ.

ރަޝިއާ އާއި ޔޫކްރެއިނާއި ދެމެދު ހިނގަމުންދާ ކުރިމަތިލުންތަކާއި ގުޅިގެން ޔޫކްރެއިންގެ އެތައް މިލިއަން ރައްޔިތުންނެއް މިހާރު ދަނީ ރެފިއުޖީންގެ ގޮތުގައި ޔޫރަޕުގެ އެހެން ގައުމުތަކަށް ހިޖުރަކުރަމުންނެވެ.