މާލެ ރައްޔިތުންނަށް ދޫކުރާ ގޯއްޗަށް ކުރިމަތިލުމަށް އޮތީ މައިގަނޑު ހަތަރު ޝަރުތެއް
ދިރިއުޅުމުގެ ހާލަަތަށް ބަލައި މާކްސް ދޭނެ ގޮތްތައް އަދި ނިންމާފައި ނުވޭ
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަ ސުވާލުކުރެއްވުން
މާލެ ސަރަހައްދުން މާލޭގެ ރައްޔިތުންނަށް ދޫކުރަން ސަރުކާރުން ނިންމާފައިވާ ގޯތިތަކަށް ކުރިމަތިލުމަށް ކަނޑައަޅާފައިވަނީ މައިގަނޑު ހަތަރު ޝަރުތެއް ކަމަށް މިިސްޓަރ އޮފް ނެޝަނަލް ޕްލޭނިން، ހައުސިން އެންޑް އިފްރާސްޓްރަކްޗާރ މުހައްމަދު އަސްލަމް މިއަދު ވިދާޅުވެއްޖެއެވެ.
މާލެ ސަރަހައްދުން ގޯތި ދޫކުރުމުގެ މަސައްކަތް ފެށޭނެ ތާރީޚަކާއި އެއަށް ކަނޑައެޅިފައިވާ ޝަރުތުތަކާއި ގުޅޭ ގޮތުން ރައްޔިތުންގެ މަޖިލީހުގައި ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ކުރެއްވި ސުވާލަކަށް ޖަވާބު ދެއްވަމުން މިނިސްޓަރު އަސްލަމް ވިދާޅުވީ، މެމްބަރުންނާއި ބައްދަލުކުރުން އަދި ކުރިއަށް ނުގެންދިވި އޮތް ކަމަށާއި، އެ ބައްދަލުވުން ވަރަށް އަވަހަށް ބާއްވަވާނެ ކަމަށެވެ. މިނިސްޓަރު އަސްލަމް ވިދާޅުވީ، މާލެ ސަރަހައްދުން ދޫކުރާ ގޯތިތަކަށް ކުރިމަތިލުމަށް މާބޮޑެތި ޝަރުތުތަކެއް ކަނޑައަޅާފައި ނުވާނެ ކަމަށެވެ.
މިނިސްޓަރު އަސްލަމް ވިދާޅުވީ، އެ ޝަރުތުތަކަކީ، މާލެއަށް އުފަން މާލެ ރައްޔިތަކަށްވުމާއި، އެ މީހެއްގެ ނަންމަތީ، 600 އަކަފޫޓަށް ވުރެ ބޮޑު ބިމެއް ނެތުން އަދި ވާރުތަކުރަން ވެސް ނެތް އެވަރުގެ ބިމެއް ނެތުން އަދި އެވަރުގެ ބިމެއް ލިބިއްޖެ ނަމަ ދައުލަތަށް ދޫކޮށްލުން ނުވަތަ ވާރުތަވާން އޮތްތަނެއް ވެސް ދޫކޮށްލުމެވެ. ތިންވަނަ ޝަރުތެއްގެ ގޮތުގައި ވިދާޅުވީ، ދަފްތަރަށް އުފަން މީހުންނަށް ވެސް ކުރިމަތިލެވޭނެ ކަމަށެވެ. މީގެ އިތުރުން މާލޭގައި ދިރިއުޅޭނެ އެއްވެސް ތަނެއް ނެތް މާލެ މީހުންނަށް ވެސް ގޯއްޗަށް ކުރިމަތިލެވޭނެ ކަމަށެވެ.
ދަފްތަރުގައި ތިބޭ މީހުންނަށް ކުރިމަތި ލެވޭނެ ކަމަށް ވިދާޅުވެ، އެކަން ތަފްސީލް ކޮށްދެއްވަމުން މިނިސްޓަރު އަސްލަމް ވިދާޅުވީ، ރަށްރަށުން މާލެއަށް ހިޖުރަ ކުރުމަށް ފަހު ދަފްތަރުގައި ތިބި މީހުންގެ ތެރެއިން ބައެއް މީހުންނަށް ދަރިން ލިބިފައިވާ ކަމަށާއި އެގޮތަށް ދަފްތަރަށް އުފަން މީހުން ވެސް ކުރިމަތިލެވޭނެ ކަމަށެވެ.
މާކްސް ދޭ އުސޫލުތަކުގެ މިނިސްޓަރު އަސްލަމް ވިދާޅުވީ، އެކި އުމުރުފުރައިގެ މީހުންނަށް ދޭ މާކްސްތައް ތަފާތުވާނެ ކަމަށެވެ. އެހެންނަމަވެސް މީހަކާ އިނދެގެން އުޅޭތީ އިތުރު މާކްސްއެއް ނުދޭނެ ކަމަށާއި، ދެމަފިރިން ގުޅިގެން އެއް ގޯއްޗަކަށް ކުރިމަތިލާ ނަމަ މާކްސް އިތުރުކުރަން ވިސްނަވާ ކަމަށެވެ.
ދިރިއުޅުމުގެ ހާލަަތަށް ބަލައި މާކްސް ދޭނެ ގޮތްތައް އަދި ނިންމާފައި ނުވާ ކަމަށާއި، އެކަންކަން ނިމިގެންދާނީ، މާލެ ދާއިރާގެ މަޖިލިސް މެމްބަރުންނާއި ރައީސް އޮފީހުގެ ޕޮލިސީ ފަރާތްތަކާއި މަޝްވަރާ ކުރެއްވުމަށްފަހު ކަމަށެވެ.
މާލެ ސަރަހައްދުން މާލޭގެ ރައްޔިތުންނަށް ދޫކުރުމަށް ސަރުކާރުން ނިންމާފައިވާ ގޯތި ދޫކުރުމުގެ މަސައްކަތް މި އަހަރުގެ ޖޫން މަހު ފެށިގެން ދާނެ ކަމަށް މީގެ ކުރިން މަޖިލީހަށް ވަޑައިގެން މިނިސްޓަރު ވަނީ ވިދާޅުވެފައެވެ. އަދި މި އަހަރަށް ރައްޔިތުންގެ މަޖިލިސް ހުޅުވުމަށް ދެއްވި ރިޔާސީ ބަޔާނުގައި ރައީސްވެސް ވަނީ އެކަން ފާހަގަކުރައްވާފައެވެ.
