ހަނގުރާމަވެރި ސަރަހައްދުން ރާއްޖެއައި އާއިލާ 30 ދުވަހަށް އިދާރީ ބަންދެއްގައި ބޭތިއްބުމަށް ކްރިމިނަލް ކޯޓުން އަމުރުކޮށްފިއެވެ.

ހުކުރު ދުވަހު މާލެ ގެނެސްފައިވަނީ ހަނގުރާމައިގައި ހާލުގައި ޖެހުނު 31 އަހަރުގެ އަންހެނަކާއި އޭނާގެ 18 އަހަރު ނުފުރޭ ހަތަރު ދަރިންނެވެ. އޭގެ ތެރެއިން ދެ ކުދިންނަކީ ހަނގުރާމައަށް ދިޔައިރު ގޮވައިގެންދިޔަ ދެ ކުދިންނެވެ. ދެން ތިބި ދެ ކުދިންނަކީ ރާއްޖެ އައި އިރު އޭނާ ގޮވައިގެން އައި ދެ ކުދިންނެވެ. އެ ކުދިން ގެނައީ ޑީއެންއޭ ޓެސްޓް ހެދުމަށް ފަހު އެއީ އޭނާގެ ދަރިންކަން ކަށަވަރުކުރުމަށް ފަހުގައެވެ. އެ ދެކުދިންނަށް މިހާރުވަނީ ރާއްޖޭގެ ރަށްވެހިކަންވެސް ދީފައެވެ.

ކޯޓް އަމުރުގައި ބުނެފައި ވަނީ، ޓެރަރިޒަމް މަނާކުރުމުގެ ގާނޫނުގައި ހަނގުރާމަވެރި ސަރަހައްދެއްގައި ހުރެފައި އެނބުރި ރާއްޖެ އަންނަ މީހެއް ނަމަ އެ މީހަކީ ރިހެބިލިޓޭޝަން ޕްރޮގްރާމެއް ފުރިހަމަ ކުރުމަކާ ނުލައި ދޫކޮށްލައިފި ނަމަ މުޖުތަމައުގެ ސަލަމާތަށް ނުރައްކާވެދާނެ މީހެއް ކަމަށް ބަލައި ގިނަވެގެން 30 ދުވަހަށް ބަންދުގައި ބަހައްޓަން ޖެހޭ ކަމަށް ބުނެފައި ވާތީ، އެގޮތަށް އަމުރުކޮށްފައިވާ ކަމަށެވެ.

އެ އަންހެން މީހާއާ އެކު، އޭނާގެ ހަތަރު ދަރިންވެސް އެ މުއްދަތަށް ބަންދުކުރުމަށްވަނީ އަމުރުކޮށްފަ އެވެ. ބަންދުގައި ބަހައްޓަން އެއްވެސް އިއުތިޒާރެއް ނެތް ކަމަށް އަންހެން މީހާ ކޯޓުގައި ބުނެފައިވާ ކަމަށް ވެސް އެ އަމުރުގައިވެއެވެ.

ހަނގުރާމަތަކުގައި ވިކްޓިމައިޒްވާ އަންހެނުންނާއި ކުޑަކުދިންނަށް ބޭނުންވާ ދީނީ، އިޖުތިމާއީ އަދި ނަފުސާނީ ފަރުވާ ދެވޭގޮތަށް ގާނޫނުތަކާއި ގަވާއިދުތައް އިސްލާހުކޮށް އެކަމަށް ބޭނުންވާ ހާއްސަ މަރުކަޒެއް ކ. ހިންމަފުށީގައި ވަނީ ހުޅުވާފައެވެ. ހޯމް މިނިސްޓްރީން ބުނެފައިވަނީ އެ އާއިލާ މުޖުތަމައުއަށް އަނބުރާ ނެރޭނީ ރިހެބިލިޓޭޝަން ޕްރޮގްރާމް ފުރިހަމަކުރުމަށް ފަހުގައި ކަމަށެވެ.

ކުޑަކުދިންނާއި އަނިޔާއަށް ހުށަހެޅިފައިވާ އަންހެނުންނަކީ ދިވެހިރާއްޖޭގެ ޤާނޫނުތަކާއި ދިވެހިރާއްޖެ ބައިވެރިވާ ބައިނަލްއަޤުވާމީ މުޢާޙަދާތަކުން ޚާއްސަ ސަލާމަތާއި ރައްކާތެރިކަން ދީފައިވާ ބަޔަކަށް ވާހިނދު، އެފަދަ ފަރާތްތަކުގެ އައިޑެންޓިޓީ ހާމަކޮށް ޒާތީ މައުލޫމާތު އާންމުކޮށް ފެތުރުމަކީ އެފަދަ ފަރާތްތަކުގެ އިންސާނީ ކަރާމަތަށް އުނިކަން ލިބޭ، ޤާނޫނީ ގޮތުން މަނާކުރެވިފައިވާ، އަދި އެފަރާތްތައް އަލުން އަނބުރާ މުޖުތަމައު ޢަށް ގެނައުމަށް ކުރެވޭ މަސައްކަތަށް ހުރަސްއެޅޭ ކަމެއްކަމުގައި ވާތީ، ޒިންމާދާރުކަމާއެކު މިކަމަށް ސަމާލުކަން ދިނުމަށް ވަނީ އިލްތިމާސް ކޮށްފައެވެ.

މިމަސައްކަތުގައި ސަރުކާރުން އެންމެ ބޮޑު އިސްކަމެއްދެނީ ދިވެހިރާއްޖޭގެ ދާޚިލީ ސަލާމަތާއި ރައްކާތެރިކަން ކަށަވަރު ކުރުމަށާއި، ދިވެހި ރައްޔިތުންގެ އަސާސީ އިންސާނީ ޙައްޤުތައް ކަށަވަރުކުރުމަށާއި، އެކި ސަބަބުތަކާއި ހުރެ މުޖުތަމަޢު އިން ހަވާސާ ވެފައިވާ ފަރާތްތައް ޤާނޫނުތަކާއި ބައިނަލްއަޤުވާމީ މިންގަނޑުތަކާއި އެއްގޮތްވާ ގޮތުގެ މަތިން، އިސްލާހުކޮށް ޒިންމާދާރު ރައްޔިތުންގެ ގޮތުގައި އަނބުރާ މުޖުތަމައު ޢަށް ގެނައުން ކަމަށް ހޯމް މިނިސްޓްރީން ވަނީ ބުނެފައެވެ.