ޑައިވިން ހަރަކާތްތަކާއެކު ބައިނަލްއަގުވާމީ ފޮޓޯ މުބާރާތެއް ބާއްވަނީ
50 ޑައިވިން ޕޮއިންޓަކަށް އެއްފަހަރާ ޑައިވްކުރާނެ
ޓޫރިޒަމް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ޓޫރިޒަމް މިނިސްޓްރީ އާއި އޯޝަން ޖިއޯގްރަފިކް އަދި މޯލްޑިވްސް އެލަޔަންސް ފޯ ޑައިވް އޮޕަރޭޓާސް (މޯޑޯ) ގުޅިގެން ޑައިވިން ހަރަކާތްތަކާއެކު ބައިނަލްއަގުވާމީ ފޮޓޯ މުބާރާތެއް ބާއްވަން ތައްޔާރުވެއްޖެ އެވެ.
އަހަރުތަކަކަށް ދެމިގެންދާ ގޮތަށް ކުރިއަށް ގެންދާ މި މުބާރާތުގައި ރާއްޖޭގެ އެންމެ ރަނގަޅު 50 ޑައިވިން ޕޮއިންޓަކަށް އެއްފަހަރާ ޑައިވްކުރާނެ އެވެ. ފޮޓޯ މުބާރާތް ކުރިއަށްދާނީ އެ ޑައިވްގެ ތެރެއިންނެވެ. މުބާރާތް ކުރިއަށް ގެންދަން ނިންމާފައިވަނީ ސެޕްޓެންބަރު މަހުގެ 29 ވަނަ ދުވަހެވެ.
މި ހަރަކާތްތަކާއި ގުޅޭގޮތުން ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ މުޅި ރާއްޖެއިން ޑައިވް ޕޮއެންޓްތައް ކަނޑައަޅާނެ ކަމަށާއި، އެމަސައްކަތް ކުރުމުގެ މަޝްވަރާތައް ފަށާފައިވާ ކަމަށެވެ. އެގޮތުން ކައުންސިލްތަކާއި ގުޅިގެން މަސައްކަތްތައް ކުރިއަށްދާއިރު، ކައުންސިލްތަކުން ދެ ޕޮއެންޓެއް ކަނޑައެޅުމަށް ފުރުސަތު ދީފައިވާ ކަމަށާއި، ރިސޯޓުތަކުން ވެސް ތިން ޕޮއެންޓެއް ކަނޑައެޅުމަށް ފުރުސަތު ހުޅުވާލާފައިވާ ކަމަށެވެ. އަދި ވިދާޅުވީ ކަނޑައަޅާ ޕޮއެންޓްތަކުން ޓޫރިޒަމް މިނިސްޓްރީން ނަނގާނީ އެއް ޕޮއެންޓް ކަމަށެވެ.
މީގެ އިތުރުން މިނިސްޓަރު ވިދާޅުވީ މި ހަރަކާތާއެކު ރާއްޖޭގެ އިތުރު ޑައިވިން ޕޮއެންޓްތައް މަޝްހޫރުވެގެންދާނެ ކަމަށާއި، ރާއްޖޭގެ ކަނޑުގެ ރީތިކަން ދުނިޔޭގެ އެކިކަންކޮޅުތަކަށް ދައްކާލުމަށް ލިބޭ ފަހި ފުރުސަތެއް ކަމަށެވެ.
މި ހަރަކާތް އިންތިޒާމް ކުރުމަށް އެންމެ އިސްކޮށް އުޅުއްވާ އޯޝަން ޖިއޯގްރަފިކްގެ ޑިރެކްޓަރ އަދި ޕަބްލިޝަރ މައިކަލް ވިދާޅުވީ ޑައިވް ޕޮއިންޓުތަކުން އެއް ވަގުތެއްގައި ނަގާ ފޮޓޯތަކުގެ ސަބަބުން ރާއްޖޭގެ ފަރުތަކާ ބެހޭ ދިރާސާތައް ކުރުމަށް ފަސޭހަވާނެ ކަމަށާއި، ފަރުތަކަށް އަންނަ ބަދަލުތައް ފާހަގަވާނެ ކަމަށެވެ. ފަރުތައް ހިމާޔަތްކުރުމުގެ މުހިންމު ކަމަށް އިޝާރަތް ކުރައްވައި މައިކަލް ވިދާޅުވީ ޓޫރިޒަމް މިނިސްޓްރީ އިން އެކަމާއި ގުޅޭ މިނިސްޓްރީތަކާއިއެކު މަޝްވަރާތައް ކުރިއަށްދާކަމުގެ މައުލޫމާތު ލިބިފައިވާ ކަމަށެވެ. އަދި އަންނަ އޮތް ޖީލުތަކަށް ފަރުތައް ހިމާޔަތްކޮށް ބެލެހެއްޓުމަށް މަސައްކަތް ކުރަންޖެހޭ މިންވަރު ހާމަވާނެ ކަމަށެވެ.
ޑައިވްގެ ތެރެއިން ކުރިއަށް ގެންދާ ފޮޓޯ މުބާރާތުގައި ދިވެހި އަދި ބައިނަލްއަގުވާމީ ފޮޓޯގްރާފަރުން ވެސް ބައިވެރިވާނެއެވެ. މި މުބާރާތުގައި ދިވެހި ފޮޓޯގްރަފަރުންނަށް ހިލޭ ބައިވެރިވެވޭއިރު، ބޭރުގެ ފޮޓޯގްރަފަރުން 10 ޑޮލަރުގެ ފީއެއް ދައްކަން ޖެހެއެވެ. މުބާރާތުގައި ނަގާ ފޮޓޯތަކުގެ ތެރެއިން އެންމެ ރީތި ތިން ފޮޓޯ އެ ޑައިވްއަށް ޚާއްސަ ފޮތުގައި ހިމަނާނެ އެވެ. އަދި މޮޅު ފޮޓޯތައް އަންނަ އަހަރުގެ ޖެނުއަރީ މަހު އޮންނަ އަންޑަވޯޓާ އެގްޒަބިޝަނުގައި ފޮޓޯގްރަފަރުގެ ނަމާއެކު ހިމަނާނެ އެވެ. މިއީ ދިވެހި ޕޮޓޯގްރަފަރުންނަށް އެހެންގައުމުތަކުގެ ޕޮޓޯގްރާފަރުންނާއި ވާދަކޮށްލުމަށް ލިބޭ ފަހި ފުރުސަތެކެވެ.
ރާއްޖޭގެ އެންމެ ރީތި 50 ޑައިވް ސައިޓް ނޮމިނޭޓްކޮށްގެން ހޮވާއިރު، މި ހަރަކާތުގައި ބައިވެރިވުމުގެ ފުރުސަތު ޑައިވަރުންނާއި، ޑައިވް ސެންޓަރުތަކަށް ވެސް ވަނީ ހުޅުވާލާފައެވެ. އަދި އެފަދަ ފަރާތްތަކަށް މި ހަރަކާތުގައި ބައިވެރިވުމަށް ފީއެއްގެ ގޮތުގައި 85 ރުފިޔާ ދައްކަންޖެހެއެވެ. އަންޑަވޯޓާ އެގްޒަބިޝަނުގައި 150 ފޮޓޯ ހިމަނާނެއެވެ.
