މޯލްޑިވްސް ސްޕޯރޓްސް އެވޯޑްސްއަކީ ރާއްޖޭގެ ޗެމްޕިއަނުންގެ މެދުގައި ވާދަވެރިކަން އުފައްދައިދޭނެ އެވޯޑެއް- މުންތަޤިމް

މޯލްޑިވްސް ސްޕޯރޓްސް އެވޯޑްސްގެ ސަބަބުން ރާއްޖޭގެ ހުރިހާ ކުޅިވަރެއްގެ ޗެމްޕިއަނުންގެ ތެރޭގައިވެސް ވާދަވެރިކަމެއް އުފެދި އޭގެ ހެޔޮ އަސަރު ކުރާނެކަމަށް އެތްލެޓިކްސް އެސޯސިއޭޝަންގެ ޖެނެރަލް ސެކެޓްރީ އަޙްމަދު މުންތަޤިމް ވިދާޅުވެއްޖެއެވެ. މުންތަޤިމް ވިދާޅުވީ އެކަން ވެގެން ދާނީ ރާއްޖޭގެ ކުޅިވަރު އެތްލީޓުން އިތުރަށް މަސައްކަތްކުރަން މެދުވެރިވާ ސަބަބެއްކަމަށެވެ.

ރާއްޖެޓީވީގެ ކައުންޓްޑައުން ޝޯވގައި މުންތަޤިމް ވިދާޅުވީ އެހެން ކުޅިވަރުތަކުގެ އެތްލީޓުންނާއި ވާދަކޮށް, ރާއްޖޭގެ އެންމެ މޮޅު އެތްލީޓްގެ އެވޯޑަށް ވާދަކުރަން ބޭނުންނަމަ އިތުރަށް މަސައްކަތްކުރަން އެތްލީޓުންނަށް މަޖުބޫރުވާނެކަމަށެވެ. އެގޮތުން މިއެވޯޑްގެ ފައިދާ ވަރަށް ބޮޑަށް ކުރާނެކަން މުންތަޤިމް ފާހަގަކުރެއްވިއެވެ.

މިސާލެއްގެ ގޮތުން މުންތަޤިމް ފާހަގަކުރެއްވީ ސާއިދު އެންމެ ބާރަށް ނުދުވިޔަސް ރާއްޖޭގެ 100 މީޓަރުން އެއްވަނަ ލިބޭނެކަމަށާއި, އެކަމަކު އެހެން ކުޅިވަރުތަކުގެ އެތްލީޓުންނާއި ވާދަކޮށް ރާއްޖޭގެ އެންމެ މޮޅު އެތްލީޓްގެ އެވޯޑް ހޯދަން, ނުވަތަ މޯލްޑިވްސް ސްޕޯރޓްސް އެވޯޑް ހޯދަން އިތުރު ހިތްވަރެއްކުރަން ސާއިދުއަށްވެސް މިހާރު މަޖުބޫރުވާނެކަމަށެވެ. އެތްލީޓުން ކުރާ މަސައްކަތުގެ އަގު ވަޒަންކުރުމަކީ, އެތްލީޓުން ކުރަން ޖެހޭ މަސައްކަތްވެސް އިތުރުވާނެކަމެއްކަން އޭނާ ފާހަގަކުރެއްވިއެވެ.

މޯލްޑިވްސް ސްޕޯރޓްސް އެވޯޑްސް ހައިބަތު ބޮޑު އެވޯޑެއްގެ ގޮތުގައި ބާއްވަން ނިންމަވާފައިވާ ނިނެމްވުމާއި ގުޅިގެން މުންތަޤިމް ވިދާޅުވީ މިއީ ކުރިއަރަން ތިބި އެތްލީޓުން ކުރިއަރަން ލިބިގެންދާ ވަރަށް ބޮޑު ފުރުޞަތެއްކަމަށެވެ. ޓްރެކް ދަނޑުން ބޭރުގެ ކުޅިވަރު ޝަހުޞިއްޔަތުންނާއި ބައްދަލުކޮށްލުމުގެ ފުރުޞަތު ލިބުމަކީވެސް ވަރަށް މުހިއްމު ފުރުޞަތެއްކަން މުންތަޤިމް ފާހަގަކުރެއްވިއެވެ. ދުނިޔޭގެ ޗެމްޕިއަނުން ޗެމްޕިއަނުންނަށްވުމަށް ކުރި ދަތުރުގެ ވާހަކަ ރާއްޖޭގެ އެތްލީޓުންނަށް އެނގި, އެކަން އަމިއްލައަށް ވާހަކަދައްކައިގެން ހޯދާ ތަޖުރިބާ ކުރުމުގެ ފުރުޞަތު ލިބޭނެކަންވެސް މުންތަޤިމް ފާހަގަކުރެއްވިއެވެ.