ޓްރެއިނިންގ ބެޗުން ތިން ޒުވާނަކަށް ސިއްހީ މައްސަލަ ދިމާވެ، އެކަކު ނިޔާވި މައްސަލަ ތަހުގީގުކުރަނީ

މޯލްޑިވްސް ނޭޝަނަލް ޑިފެންސް ފޯރސް (އެމްއެންޑީއެފް)ގެ ޓްރެެއިނިންގ ހަދަން މާފިލާފުއްޓަށް ދިޔަ ޓްރެއިނިންގ ބެޗުން ތިން ޒުވާނަކަށް ސިއްހީ މައްސަލަ ދިމާވެ, އެކަކު ނިޔާވި މައްސަލަ ބެލުމަށް ޚާއްސަ ކޮމެޓީއެއް އެކުލަވާލައިފިއެވެ.

އެމްއެންޑީއެފުން ބުނީ އަސްކަރީ ތަމްރީނުތަކަކީ އޭގެޒާތުގައި ބުރަ އަދި ރިސްކު ހިމެނޭ ތަމްރީނުތަކެއް ކަމަށެވެ. މި ތަމްރީނުތަކަށް ނެގޭ ސިފައިންނަކީ ފިޒިކަލް އަދި މެޑިކަލް ޓެސްޓުތަކެއް ހެދުމަށްފަހު ޓްރެއިނިންގ ތަކުގައި ބައިވެރިވެވޭ މީހުން ކަމަށެވެ. ނަމަވެސް ތިން ޒުވާނަކަށް މެޑިކަލް މައްސަލަތަކެއް ދިމާވެ, އޭގެ ތެރެއިން އެކަކު ނިޔާވެ ދެވަނަ ޒުވާނާއަށް އައިސީޔޫގައި ފަރުވާކުރަން ޖެހި އަދި ތިންވަނަ ޒުވާނާ އެޑްމިޓްކޮށްގެން ފަރުވާދޭން ޖެހުމަކީ ކަންބޮޑުވާ ކަމެއް ކަމަށް އެމްއެންޑީއެފުން ބުނެއެވެ.

އެހެންކަމުން ބަލަން ޖެހޭކަންކަން ބެލުމަށް އެކިދާއިރާތަކުގެ ތަޖުރިބާކާރުން ހިމެނޭހެން ކޮމިޓީއެއް އެކުލަވާލެވި މަސައްކަތް ފަށާފައިވާކަމަށް އެމްއެންޑީއެފުން ބުނެއެވެ. އަދި މިކަންކަމާ ގުޅޭގޮތުން އިތުރު މައުލޫމާތެއް ހާމަކުރެވޭނީ ކޮމެޓީން އެ މައްސަލަ ބަލައި ތަހުގީގުކޮށް ނިމުމުންކަމަށް އެމްއެންޑީއެފުން ބުނެއެވެ.

މި މައްސަލައިގެ ތަހުގީގު ފަށާފައިވާއިރު، އައިޖީއެމްއެޗްގެ އައިސީޔޫގައި ފަރުވާ ދެމުންދަނީ އުމުރުން 19 އަހަރުގެ ޒުވާނަކަށެވެ. އަދި 21 އަހަރުގެ ޒުވާނަކަށް އެހޮސްޕިޓަލުގެ ވޯޑުގައި އެޑްމިޓްކޮށްގެން ފަރުވާދެމުންދާ ކަމަށް އައިޖީއެމްއެޗުން މައުލޫމާތުދެއެވެ. ނަމަވެސް މި ދެ ޒުވާނުންނަށް ދިމާވީ ކޮންކަހަލަ ސިއްހީ މައްސަލައެއްކަން ހާމަކޮށްފައެއްނުވެއެވެ. މި ދެ ޒުވާނުން އިތުރު ފަރުވާއަށް އައިޖީއެމްއެޗަށް ގެނެސްފައިވަނީ 11 މާޗް 2022ގައެވެ.

މީގެ އިތުރުން ޓްރޭނިންގ ހަދަން މާފިލާފުއްޓަށް ދިޔަ އުމުރުން 19 އަހަރުގެ ޒުވާނެއް 7 މާޗް 2022ގައި ވަނީ ނިޔާވެފައެވެ. އޭނާ ނިޔާވެފައިވަނީ ނޭވާލުމަށް އުނދަގޫވެގެންނެވެ. އަދި ޅ. ނައިފަރު ހޮސްޕިޓަލަށް ގެންދިޔައިރު ވެސް އެ ޒުވާނާ ނިޔާވެފައިވާ ކަމަށް އާއިލާއިން ވަނީ މައުލޫމާތު ދީފައެވެ.