ސްކޫލުތަކުގެ ނަތީޖާ ރަނގަޅު ކުރެވޭނީ އިލްމީ ގާބިލް ޕްރިންސިޕަލުންނާއެކު މަސައްކަތް ކުރެވިގެން: މިނިސްޓްރީ
11 މާރިޗު 2022 | ހުކުރު 13:33ރަނގަޅު ތައުލީމެއް ފޯރުކޮށް ދިނުމަށް ސްކޫލުތަކުގެ ކިޔަވައިދިނުން ރަނގަޅުކޮށް ފެންވަރު މަތިކުރަން ޖެހޭ
ނިއު ނޯރމަލްގެ ދަށުން ސްކޫލެއްގެ ދަރިވަރުންނަށް ކިޔަވައި ދެނީ
ރާއްޖޭގެ ސްކޫލުތަކުގެ ނަތީޖާ ރަނގަޅު ކުރެވޭނީ އިލްމީ ގާބިލް ޕްރިންސިޕަލުންނާއެކު މަސައްކަތް ކުރެވިގެން ކަމަށް އެޑިޔުކޭޝަން މިނިސްޓްރީން ބުނެފިއެވެ.
އެޑިޔުކޭޝަން މިނިސްޓްރީން މިހެން ބުނެފައިވާއިރު، ސަރުކާރުން ހިންގާ 216 ސްކޫލު ރާއްޖޭގެ އެކި ކަންކޮޅުގައި ހުރިއިރު އެއްވެސް ދުވަސްވަރެއްގައި ހުރިހާ ސްކޫލެއްގައި ތަމްރީނުވެފައިވާ ޕްރިންސިޕަލުން ހަމަވެފައެއް ނުވެއެވެ. މިވަގުތުވެސް ރާއްޖޭގައި ދާއިމީ ޕްރިންސިޕަލެއް ނެތް 53 ސްކޫލް ހުރި އިރު، ދާއިރާގައި މަސައްކަތް ކުރައްވާ ދާއިމީ ޕްރިންސިޕަލުންގެ ތެރެއިންވެސް ތަމްރީނު ލިބިވަޑައިގެން ތިއްބެވީ 75 ބޭފުޅުންނެވެ. މިކަން ހައްލު ކުރުމުގެ ގޮތުން ހުރިހާ ޚަރަދެއް ދޭގޮތަށް, 3 އަހަރު ދުވަހުގެ ތެރޭގައި ސަރުކާރުގެ ހުރިހާ ސްކޫލްތަކަށް ބޭނުންވާ ޕްރިންސިޕަލުން ތަމްރީނު ކުރުމަށް ޕްރިންސިޕަލުން ތަމްރީނު ކުރުމުގެ ސްކޮލަރޝިޕް ޕްރޮގްރާމެއް ވަނީ އިފްތިތާހުކޮށްފައެވެ.
މި ޕްރޮގްރާމާއި ބެހޭ ގޮތުން ވާހަކަދައްކަވަމުން އެޑިޔުކޭޝަން މިނިސްޓްރީގެ ނައިބު އަހުމަދު މުޖާހިދު ވިދާޅުވީ ރަނގަޅު ތައުލީމެއް ފޯރުކޮށް ދިނުމަށް ސްކޫލުތަކުގެ ކިޔަވައިދިނުން ރަނގަޅުކޮށް، ފެންވަރު މަތިކުރަން ޖެހޭ ކަމަށެވެ. ޕްރިންސިޕަލުންނަކީ ކިޔަވައި ދިނުމުގައި ވަރަށް ބޮޑު ރޯލެއް އަދާކުރާ ބައެއްކަން ފާހަގަކުރައްވައި މުޖާހިދު ވިދާޅުވީ ރަނގަޅު ޕްރިންސިޕަލުން ތިބުން ވަރަށް މުހިންމު ކަމަށާއި، ސްކޫލުގެތަކުގެ ނަތީޖާ އާއި އެކަމާއި ވަރަށް ބޮޑަށް ގުޅިފައިވާ ކަމަށެވެ.
ރާއްޖޭގައި އެންމެފަހުން ޕްރިންސިޕަލުން ތަމްރީން ކޮށްފައިވަނީ 2010 ވަނަ އަހަރެވެ. ޕްރިންސިޕަލުން ތަމްރީނު ކުރުމުގެ ސްކޮލަރޝިޕް ޕްރޮގްރާމްގެ ތެރެއިން ކިޔަވަން ފޮނުވާ މިއަހަރުގެ ފުރަތަމަ ބެޗުގެ ކިޔެވުން ފެބްރުއަރީ-މާޗް އިންޓޭކުގައި ކުރިއަށްދާނެ އެވެ. މި ބެޗުގައި 20 ސްކޫލެއްގެ ޕްރިންސިޕަލެއް ތަމްރީނު ކުރެވިގެންދާއިރު، އެ 20 ޕްރިންސިޕަލުންނަށް ވަނީ ސްކޮލަރޝިޕަށް ހޮވުނު ކަމުގެ ލިޔުން ހަވާލުކޮށްފައެވެ. އެ ބޭފުޅުން ކިޔެވުން ފެށުމަށް މި ހިނގާ މާރޗު މަހުގައި މެލޭޝިއާއަށް ދަތުރުކުރާނެއެވެ.
މި އަހަރުގެ ސެޕްޓެމްބަރު އިންޓޭކުގައި އިތުރު ބެޗެއްގެ ޕްރިންސިޕަލުން ތަމްރީނުކުރުމަށް ފޮނުވުމަށް މަސައްކަތް ކުރަމުންދާ ކަމަށް ވެސް އެޑިޔުކޭޝަން މިނިސްޓްރީން މައުލޫމާތުދެއެވެ.
