އިންޑިޔާއާއި ދެކޮޅަށް ކުރިއަށްގެންދާ ހަރަކާތްތަކުގައި ބައިވެރިނުވުމަށް ރައީސް ނަޝީދު އެދިވަޑައިގެންފި

ކުރީގެ ރައީސް އަބްދުﷲ ޔާމީން އިސްކޮށް ހުންނަވާ އިންޑިޔާއާއި ދެކޮޅަށް ކުރިއަށްގެންދަވާ ހަރަކާތްތަކުގައި ބައިވެރިނުވުމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގެންފިއެވެ.

ރައީސް ނަޝީދު ވިދާޅުވީ ރައީސް ޔާމީން އިންޑިޔާއާއި ދެކޮޅަށް ހިންގަވާ ހަރަކާތަކީ ރައްޔިތުންގެ ތާއީދު ނެތް ހަރަކާތެއް ކަމަށެވެ.

އެއީ ދިވެހިންނަށް ގެއްލުން ލިބޭނެ ހަރަކާތެއްކަމަށް ފާހަގަކުރައްވާ ރައީސް ނަޝީދު ވަނީ ޕީޕީއެމްގެ މެމްބަރުން އިދިކޮޅުގެ ހަރަކާތްތަކުގައި ބައިވެރިނުވުމަށް އެދިވަޑައިގެންފައެވެ.

އިދިކޮޅު ހަރަކާތުގައި ބައިނުވުމަށް ރައީސް ނަޝީދު އިލްތިމާސްކުރައްވާފައިވާއިރު، އިންޑިޔާ އައުޓް ކެމްޕޭން ހަރަކާތް ހިންގެވުމަށް އދ.މަހިބަދޫއަށް ހުކުރު ދުވަހުގެ ހަވީރު ރައީސް ޔާމީން ވަޑައިގަންނަވާނެއެވެ.

އެމަނިކުފާނު ޖަލުން މިނިވަންވެވަޑައިގެން ފަހުން އަތޮޅުތެރޭގެ ރަށްރަށަށް ދަނީ ދަތުރުކުރައްވަމުންނެވެ. އެގޮތުން ރައީސް އެންމެ ފަހުން ވަޑައިގެންނެވީ ގއ. ވިލިނގިއްޔަށެވެ. އަދި މީގެ ކުރިން ށ. އަތޮޅާއި ފ. އަތޮޅު އަދި ރ. އަތޮޅަށް ވެސް ވަޑައިގެންނެވިއެވެ.

"އިންޑިޔާ އައުޓް" ގެ ނަމުގައި އިދިކޮޅުން ކުރިޔަށް ގެންދާ ހަރަކާތް ފުޅާކުރަމުން ގެންދާއިރު، އިންޑިއާ އަސްކަރިއްޔާ މި ގައުމުން ބޭރު ކުރުމުގެ ނަމުގައި ފެށި ހަރަކާތް މިހާރު ވަނީ ބަދަލުވާން ފަށާފައެވެ. އެގޮތުން އަމިއްލަ ގޭގޭގައިވެސް އިންޑިއާ އައުޓް ޖެހުމަށް ރައީސް ޔާމީން ގޮވާލައްވާފައިވާއިރު، މިއީ ސިޔާސީ ގޮތުން ވަކި މަގުސަދެއް ހާސިލު ކުރުމަށް ހިންގަމުންގެންދާ ހަރަކާތެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ. އަދި އިންޑިއާ އައުޓްގެ ނަމުގައި ޕެޓިޝަނެއްގައި ސޮއިކުރުންވެސް ކުރިއަށް ގެންގޮސްފައިވާއިރު މި ޕެޓިޝަންގައި ބުނަނީ މި ސަރުކާރުން އިންޑިއާއާއެކު ސިއްރު އަސްކަރީ އެއްބަސްވުންތަކެއްގައި ސޮއިކުރަމުން ގެންދާ ކަމަށެވެ. އަދި ގާނޫނުއަސާސީއާއި ޚިލާފަށް ރާއްޖޭގެ ތަންތަން އިންޑިއާއަށް ދޫކޮށްފައިވާކަމަށެވެ.

ގިނަ ތުހުމަތުތަކެއް އިންޑިޔާ ސިފައިނަށް ކުރަމުންދާއިރު، އިންޑިޔާގެ އަސްކަރީ ތަމްރީންތަކަށްދާ ދިވެހި އަންހެން ސިފައިން ބުރުގާ ނެގުމަށް މަޖުބޫރު ކުރާ ކަމަށްވެސް ރައީސް ޔާމީން ތުހުމަތު ކުރައްވާފައިވެއެވެ. އަދި އެކަން އެމްއެންޑީއެފުން ވަނީ ދޮގުކޮށްފައެވެ.

މިހަރަކާތުގެ ސަބަބުން ޚާރިޖީ ގުޅުންތަކަށް އެކަމުގެ ނޭދެވޭ އަސަރު ކުރާނެކަމަށް ފޮރިން މިނިސްޓްރީން ބުނެފައިވެއެވެ. މީގެ އިތުރުން ދެގައުމުގެ ދޭތެރޭގައި ނަފްރަތާއި ރުޅިވެރިކަން އުފެދޭ ކަމަށާއި، މިއީ ގައުމީ ސާލާމަތަށް ހުރި ނުރައްކަލެއް ކަމަށް މިނިސްޓްރީ އޮފް ޑިފެންސް އަދި މޯލްޑިވްސް ނޭޝަނަލް ޑިފެންސް ފޯސްއިން ބުނެފައިވެއެވެ.