ހަނިމާދޫގައި ތިބި އިންޑިއާ ސިފައިން މިހާރުވީ އިތުރު، ޑޯނިޔާ ވެސް އެބަ ދުއްވާ- ހަނިމާދޫ ކައުސިލްގެ ނައިބު
ވެރިކަމަށް އައުމަށް ސަރުކާރުން ބޭނުން ކުރި އެންމެ ބޮޑު އުކުޅަކީ އިންޑިއާ ސިފައިން ރާއްޖެއިން ބޭރުކުރުން ކަމަށް އާއްމުން ވަނީ ބުނެފަ
ހަނިމާދޫ ކައުންސިލް ރައީސް އަދި ބައެއް އާއްމުން
ހަނިމާދޫގައި ތިބި އިންޑިއާ ސިފައިން މިހާރުވީ އިތުރުކަމަށާއި މިހާރު އެ ވާހަކަ ނުދައްކަނީ ކީއްވެގެންތޯ ހަނިމާދޫ ކައުސިލްގެ ނައިބު ރައީސް ފިރާޤް މުހައްމަދު ވިދާޅުވެއްޖެއެވެ.
ރާއްޖެ އެމްވީ އާއި ވާހަކަދައްކަވަމުން ވަނީ ސަރުކާރަށް އެއް އަހަރުވެގެންދާ އިރު ރައްޔިތުންގެ ވަރަށް ބޮޑު ކަންބޮޑުވުންތަކެއް އެބަހުރި ކަމަށެވެ. އެގޮތުން އެންމެ ބޮޑު ކަންބޮޑުވުމަކީ ސަރުކާރު ވެރިކަމަށް އައީ ވަރަށް ބޮޑަށް 'އިންޑިއާ މިލިޓަރީ އައުޓް'ގެ ޓެގްލައިން ބޭނުންކޮށްގެން ކަމަށް ވެފައި އެކަމުގައި ހަގީގަތެއް ނެތުން ކަމަށް އޭނާ ވިދާޅުވިއެވެ. އޭރު ސަރުކާރާއި މެދު އިދިކޮޅު ފަރާތްތަކުން ދެއްކި ވާހަކަތަކުގެ ތެރެއިން ވަރަށް ގިނަ ރައްޔިތުން ތިބީ ބިރުވެރިކަމެއްގެ ތެރޭގައި ކަމަށް އޭނާ ވިދާޅުވިއެވެ. މީގެ އިތުރުން ވެރިކަމަށް އައުމަށް ސަރުކާރުން ބޭނުން ކުރި އެންމެ ބޮޑު އުކުޅަކީ އިންޑިއާ ސިފައިން ރާއްޖެއިން ބޭރުކުރުން ކަމަށް އޭނާ ވިދާޅުވިއެވެ. ހަނިމާދޫގައި އިންޑިއާ ސިފައިން ތިބިކަމަށް ބުނެ ސަރުކާރުން ހެދީ ދޮގުކަން މިއަދު އެބަ ހާމަވާ ކަމަށް އޭނާ ވިދާޅުވިއެވެ.
ހަމައެހެންމެ ހަނިމާދޫ އެއާޕޯޓް ހަދަމުން ދަނީ އިންޑިއާގެ ލޯނު އެހީގައި ކަމަށް ވާއިރު އެކަން އޮޅުވާލުމަށް މި ސަރުކާރުން މަސައްކަތް ކުރާ ކަމަށް އޭނާ ތުހުމަތުކުރެއްވިއެވެ. އޭނާ ވަނީ އެކަން އޮޅުވާލައިގެން އެއާޕޯޓް އެޅުމުގެ ކްރެޑިޓް މި ސަރުކާރުން ނަގަން އުޅޭ ކަމަށް ވެސް ތުހުމަތުކުރައްވާފައެވެ. މިހާރުވެސް އެއާޕޯޓް މަސައްކަތް ކުރަމުންދާ ކަމަށާއި މިއަދު އެކަމުން އެކަނި ވެސް ކުރީގެ ރައީސް ޞާލިހު ކުރެއްވި މަސައްކަތް ފެންނަން އޮތް ކަމަށް އޭނާ ވިދާޅުވިއެވެ.
ރާއްޖެ އެމްވީ އާއި ވާހަކަދެއްކި ބައެއް އާއްމުން ވަނީ ހަނިމާދޫގައި ނިމިދިޔަ ސަރުކާރުން ފެށި މަޝްރޫޢުތައް މިހާރު ހުއްޓާލާފައިވާތީ ކަންބޮޑުވުން ފާޅުކޮށްފައެވެ. ސަރުކާރަށް ޕްރޮޖެކްޓްތައް ނުހިންގޭ ކަމަށާއި ދައްކަނީ ހުސް ވާހަކަކަމަށް ރާއްޖެ އެމްވީ އާއި ވާހަކަދެއްކި އާއްމުން ވަނީ ބުނެފައެވެ. އެއާޕޯޓްގެ މަސައްކަތް ނޫން ކަމެއް ހަނިމާދޫގައި ނުހިނގާކަމަށް އާއްމުން ފާހަގަކުރިއެވެ.
އިތުރު އާއްމު މީހަކު ރާއްޖެ އެމްވީ އާއި ވާހަކަދައްކަމުން ބުނީ ސަރުކާރުން ކުރި އެއްވެސް މަސައްކަތެއް ހަމަލޮލަށް ނުފެންނަ ކަމަށެވެ. އަދި މަސައްކަތްތައް ކުރިއަށް ދާނެ ގޮތުގެ ތަފްސީލެއް ނުދެވޭ ކަމަށާއި އިންޑިއާ ސިފައިންނާއި މެދު ވެސް ސަރުކާރުން ހެދީ ދޮގުކަން ހާމަވާ ކަމަށް އާއްމުން ވަނީ ބުނެފައެވެ.
