ޔާމީނުގެ ފަރާތުން ހުށަހެޅުއްވި "އިންޑިއާ އައުޓް" ގަރާރުގެ މައްސަލަ ކޯޓުން ބޭރުކޮށްލައިފި
"އިންޑިއާ އައުޓް" ކެމްޕޭންގެ ތެރެއިން ޖެނުއަރީ 7، 2022 ގައި ބޭއްވި ހަރާކާތުގެ ތެރެއިން
'އިންޑިއާ އައުޓް' ހަރަކާތް ހުއްޓުވަން ރައީސް އިބްރާހީމް މުޙައްމަދު ޞާލިޙް ނެރުއްވި ރިޔާސީ ގަރާރު ބާތިލު ކުރުމަށް ސިވިލް ކޯޓަށް ކުރީގެ ރައީސް ޔާމީން އަބްދުލް ގައްޔޫމް ދިވެހި ދައުލަތުގެ މައްޗަށް ހުށަހެޅި މައްސަލަ އެ ކޯޓުން އަންގާރަ ދުވަހު ބޭރުކޮށްފިއެވެ.
މިއީ ސިވިލް ކޯޓުން މި މައްސަލަ ބޭރުކޮށްލި ދެވަނަ ފަހަރެވެ.
އޭޕްރީލް 21، 2022 ގައި ރައީސް ސާލިހް ސޮއި ކުރައްވާ ނެރުނު ގަރާރުގައި ވަނީ، 'އިންޑިއާ އައުޓް' ކެމްޕޭނަކީ ރާއްޖޭގެ ސުލްހަ މަސަލަސްކަން ނަގާލުމުގެ ނިޔަތުގައި، ރާއްޖެ އާއި އިންޑިއާއާ އެކު އޮތް ޒަމާންވީ ބަދަހި ގުޅުމަށާއި ރާއްޖޭގެ ތަރައްގީ އަށާއި މި ސަރަހައްދުގެ ސަލާމަތާއި ހަމަޖެހުމާއި އަމަންއަމާންކަން ދެމެހެއްޓުމަށް ބައިނަލްއަގުވާމީ ފެންވަރުގައި ކުރަމުން އަންނަ މުހިންމު މަސައްކަތަކަށް ހުރަސްއެޅުމަށް ރާވައިގެން ހިންގަމުންގެންދާ ކެމްޕޭނެއް ކަމަށެވެ. އަދި އެއީ ގައުމީ ސަލާމަތާއި ހާރިޖީ ގުޅުންތަކަށް ވެސް ނުރަނގަޅު އަސަރު ކޮށްފާނެ ކަމެއް ކަމަށެވެ.
"އިންޑިއާ އައުޓް" ކެމްޕޭންގައި އެންމެ އިސްކޮށް ހުންނެވި ކުރީގެ ރައީސް އަބްދުﷲ ޔާމީން ވިދާޅުވެފައިވަނީ، ރައީސް ސާލިހް ނެރުއްވި ގަރާރަކީ ގާނޫނީ ބާރެއް ލިބިގެން ނުވާ، ރައްޔިތުން އަމަލު ކުރުން ލާޒިމު ނުވާ ގަރާރެއް ކަމުގައެވެ. އެހެން ކަމުން ކޯޓަށް މައްސަލަ ހުށަހެޅީ އެއީ ބާތިލު ގަރާރެއް ކަމަށް ކަނޑައެޅުމަށެވެ.
ރައީސް ޔާމީނުގެ ފަރާތުން ހުށަހެޅި ގަރާރުގެ މައްސަލަ މައްސަލަ ސިވިލް ކޯޓުން ބާތިލު ކުރީ، ޝަރީއަތުގެ މަޖިލީހަށް ޔާމީންގެ ފަރާތުން އައްޔަން ކުރައްވާފައިވާ ވަކީލު އެއްވެސް މަގުބޫލު އުޒުރެއް ނެތި ކޯޓަށް ހާޒިރު ނުވުމުން ކަމަށް ސިވިލް ކޯޓުން ވަނީ ބުނެފައެވެ.
އަންގާރަ ދުވަހުގެ އަޑުއެހުމަށް ކޯޓަށް ހާޒިރު ވުމަށް ވަކީލަށް އަމުރު ފޮނުވީ މިދިޔަ އާދިއްތަ ދުވަހު ކަމަށް ކޯޓުން ބުނެފައިވެއެވެ.
ކޯޓުން މިމައްސަލައިގައި ގާޟީ އަބްދުއްނާސިރު ޝަފީގު ސޮއި ކުރައްވާ ނެރުނު ހުކުމުގައި ބުނެފައިވަނީ، ކޯޓަށް ވަކީލު ހާޒިރު ނުވީ، މަގުބޫލު އުޒުރެއްނެތި ވަކީލު ކޯޓަށް ހާޒިރުވުމަށް ކުރި އަމުރު އޭނާ އަށް ރައްދު ކުރެވިފައިވަނިކޮށް ކަމުގައެވެ.
ސިވިލް ކޯޓުން ބުނީ، މައްސަލަ ކޯޓުން ބޭރުކުރަން ނިންމީ ކޯޓަށް މީހުން ހާޒިރުކުރުމުގައި އަމަލު ކުރާ ގޮތުގެ ގަވައިދުގެ 20 ވަނަ މާއްދާގެ ދަށުން ކަމުގައެވެ. މަގްބޫލު އުޒުރެއްނެތި ކޯޓަށް ހާޒިރުނުވުމަކީ ދައުވާ ބޭރުކޮށްލެވޭ ސަބަބެކެވެ.
"މި މައްސަލައިގެ ދައުވާ ފޯމު ބާތިލު ކޮށް މި ގަޟިއްޔާ ނިންމީއެވެ." ޝަރީއަތް ނިމުނުގޮތުގެ ލިޔުމުގައި ވެއެވެ.
"އިންޑިއާ އައުޓް" ކެމްޕޭން ހުއްޓުވަން ރައީސް އިބްރާހިމް މުހައްމަދު ސޯލިހު ނެރުއްވާފައިވާ ރިޔާސީ ގަރާރު ބާތިލުކުރަން ޕީޕީއެމް/ޕީއެންސީން ހުށަހެޅި މައްސަލަ އެއް ސިވިލް ކޯޓުން މީގެ ކުރިންވެސް ވަނީ ބޭރުކޮށްފައެވެ. 28 ޖޫން 2022 ގައި އެ މައްސަލަ ކޯޓުން ބޭރު ކުރީވެސް ޕީޕީއެމްގެ ވަކީލުންނަށް ހާޒިރުވާން ކޯޓުން އެންގުމުން ވެސް މައްސަލައިގެ އަޑުއެހުންތަކަށް ވަކީލުން ހާޒިރު ނުވުމުންނެވެ.
