މެމްބަރު ޣަނީގެ ގޮނޑި ގެއްލޭނީ ޙުކުމާއި އެއްގޮތަށް ފައިސާ ނުދައްކައިފިނަމަ

ރައްޔިތުންގެ މަޖިލީހުގެ ކުރެންދޫ ދާއިރާގެ އެމްޑީޕީގެ މެމްބަރު އަބްދުލްޣަނީ އަބްދުލް ހަކީމްގެ މައްޗަށް ދަށު ކޯޓުން ކުރި ސާބިތު ދަރަނީގެ ހުކުމް ހައިކޯޓުން ދަމަހައްޓާފައިވާއިރު، އެއީ މެމްބަރު ޣަނީގެ ގޮނޑި ގެއްލޭނެ ސަބަބެއް ނޫންކަމަށް ޤާނޫނީ ވަކީލުން ވިދާޅުވެއްޖެއެވެ.

ސާބިތު ދަރަނީގެ ހުކުމް ހައިކޯޓުން ދެމެހެއްޓުމާއި ގުޅިގެން މެމްބަރު ޣަނީގެ ގޮނޑި ގެއްލޭނެކަމަށް ބައެއް ފަރާތްތަކުން ދަނީ ބުނަމުންނެވެ. އެހެންނަމަވެސް އެކަމާއި ގުޅޭ ގޮތުން ރާއްޖެއެމްވީން ސުވާލުކުރުމުން ޤާނޫނީ ވަކީލު އިބްރާހިމް ހާފިޒް ވިދާޅުވީ، މެމްބަރު ޣަނީގެ ގޮނޑި ގެއްލޭނީ އޭނާ ޙުކުމާއި އެއްގޮތަށް ފައިސާ ނުދެއްކުމުން ކަމަށެވެ. އަދި ހައިކޯޓުގެ ޙުކުމަކީ މަތީ މަރުޙަލާގެ ކޯޓުގައި އިސްތިއުނާފު ކުރުމުގެ ފުރުސަތުވެސް އޮތް ޙުކުމެއްކަން އޭނާ ފާހަގަކުރެއްވިއެވެ.

ޤާނޫނީ ވަކީލު ހާފިޒަކީ އިލެކްޝަންސް ކޮމިޝަންގެ ލީގަލް ޑިރެކްޓަރުކަމުގެ މަޤާމުވެސް ފުުރުއްވަމުން ގެންދަވާ ފަރާތެވެ.

ޤާނޫނު އަސާސީގެ 73 ވަނަ މާއްދާގެ ނ ގައިވެސް ވަނީ މެމްބަރެއްގެ ގޮނޑި ގެއްލިދާނެ ޙާލަތްތައް ބަޔާންކޮށްފައެވެ. އެގޮތުންއަދާކުރަންޖެހޭ ސާބިތު ދަރަންޏެއް އޮތް މީހެއް ނަމަ، ޙުކުމާ އެއްގޮތަށް އެ ދަރަނި އަދާކުރަމުން ނުދާނަމަ އޭނާގެ މެމްބަރުކަން ގެއްލޭނެކަމަށް އެ މާއްދާގައި ބަޔާންކޮށްފައިވެއެވެ.

މި މައްސަލައަކީ އެލިއާ އިންވެސްޓްމަންޓްސްއަށް ލޮގްވުޑް މޯލްޑިވްސް ޕްރައިވެޓް ލިމިޓެޑްއިން ދައްކަންޖެހޭ ފައިސާ އާއި ގުޅޭ މައްސަލައެކެވެ. އެގޮތުން ސިވިލް ކޯޓުން ކޮށްފައިވާ ޙުކުމުގައި ބުނެފައިވަނީ އެ ފައިސާއަކީ އެއްބަސްވުމެއްގެ ގެރެންޓީ ދީފައިވާ ފަރާތުގެ ހައިސިއްޔަތުން ޢަބްދުލްޣަނީ ޢަބްދުލްޙަކީމް ދައްކަންޖެހޭ ފައިސާކަން ޝަރީޢަތަށް ސާބިތުވާކަމަށެވެ. އެއީ 523،673 ރުފިޔާއެވެ.

ޣަނީއަކީ ލޮގްވުޑް މޯލްޑިވްސްގެ މެނޭޖިންގ ޑިރެކްޓަރެވެ.

އެހެންނަމަވެސް، އެ އެއްބަސްވުމަކީ އެލިއާ އިންވެސްޓްމަންޓްސް އާއި ލޮގްވުޑް މޯލްޑްވިސް އާއި ދެމެދުގައި ދަރަނި އަދާކުރުމާއި ބެހޭގޮތުން ވެވުނު އެއްބަސްވުމެއްކަމާއި، އެއެއްބަސްވުމުގައި ލޮގްވުޑްގެ ފަރާތުން އެކުންފުނީގެ މެނޭޖިންގ ޑިރެކްޓަރުގެ ޙައިސިއްޔަތުން ޣަނީ ސޮއިކުރެއްވީ އަމިއްލަ ޝަޚްސީ އަދި ޒާތީ ހައިސިއްޔަތަކުން ނޫން ކަމަށް ބަޔާންކޮށް ޣަނީގެ ފަރާތުން މިމައްސަލަ ހައިކޯޓުގައި އިސްތިއުނާފު ކުރިއެވެ.

މީގެއިތުރުން، އެއެއްބަސްވުމަކީ ދެ ކުންފުންޏެއްގެ ދެމެދު ވެފައިވާ އެއްބަސްވުމެއްކަމާއި، ގެރެންޓީ ދީފައިވާ ފަރާތް ފައިސާ ދައްކަން ފަރުދީ ގޮތުން އެއްބަސްވާކަން ދަލީލުކޮށްދޭ އެއްވެސް ޢިބާރާތެއްވެސް އެއްބަސްވުމުގައި ހިމެނިފައިނުވާކަން ފާހަގަކޮށްފައިވެއެވެ.

މިމައްސަލައިގައި ހައިކޯޓުން ކުރި ޙުކުމުގައި ބުނެފައިވަނީ އާންމު އުޞޫލުން ކުންފުންޏަކީ، އެ ކުންފުނީގެ މެންބަރުންނާއި ވަކިން އުފެދިފައިވާ ޤާނޫނީ ޝަޚްސެއް ކަމަށެވެ. އެހެންކަމުން ކުންފުންޏެއްގެ ޑިރެކްޓަރުންނަކީ އޭނާގެ ކުންފުނީގެ ދަރަންޏަށް ފަރުދީ ގޮތުން ޒިންމާވާންޖެހޭ ފަރާތެއް ނޫނެވެ.

އެހެންނަމަވެސް މިމައްސަލައިގައި ހުށަހެޅިފައިވާ ލިޔުންތަކަށް ބަލާއިރު، ޚުސޫމާތު އުފެދިގެން އުޅޭ އެއްބަސްވުމުގައި އިސްތިއުނާފު ކުރާ ފަރާތުން އެއްބަސްވުމުގައި ބައިވެރިވެފައިވަނީ ކުންފުނީގެ ޑިރެކްޓަރެއްގެ ހައިސިއްޔަތަކުން ނޫން ކަން ވަރަށްވެސް ސާފުކޮށް އެނގޭކަމަށް ބަޔާންކޮށްފައިވެއެވެ.

މީގެއިތުރުން، ޣަނީގެ ފަރާތުން އެއްބަސްވުމުގެ ދަށުން ދައްކަންޖެހޭ ފައިސާއަށް ގެރެންޓީ ދީފައިވަނީ ފަރުދީ ގޮތުން އެ ފައިސާއަށް ޒިންމާވާނޭ ކަމަށް ޔަޤީންކަން ދީ އެފަދައިން އެއްބަސްވެގެންކަން އެނގެން އޮތްކަން ބަޔާންކޮށް ހައިކޯޓުން ވަނީ އެފައިސާ ދެއްކުމަށް އަމުރުކޮށްފައެވެ.