ޑްރަގް އެތެރެކުރި މީހަކު ބަންދުކުރުމަށް ހައިކޯޓުން ނިންމި ނިންމުން މެޖިސްޓްރޭޓް ކޯޓުން ބާތިލުކުރީ ޤާނޫނާއި ޚިލާފަށް
ރުޝާން އަޙްމަދު ދީދީގެ މައްޗަށް އުފުލާފައިވަނީ މަސްތުވާތަކެތި ޓްރެފިކްކުރުމުގެ ކުށުގެ ދައުވާ
ހައިކޯޓު- ހައިކޯޓުގައި ބުދަ ދުވަހު މިމައްސަލަ ނިންމަވާފައިވަނީ ފަނޑިޔާރު އަލީ ސަމީރާއި، ފަނޑިޔާރު ހުސައިން ޝަހީދާއި، ފަނޑިޔާރު ޙަސަން ޝަފީއުގެ އިއްތިފާޤުން
ރާއްޖެއަށް 98 ކިލޯގެ ޑްރަގް އެތެރެކުރުމުގައި ބައިވެރިވިކަމަށް ތުހުމަތު ކުރެވޭ މީހަކު އައްޑޫ ސިޓީ ހިތަދޫ މެޖިސްޓްރޭޓް ކޯޓުން ދޫކޮށްލުމަށް ނިންމި ނިންމުން ހައިކޯޓުން ބާތިލުކޮށްފިއެވެ.
މިމައްސަލައިގައި ސ.ހިތަދޫ މަންދޫބުގެ ރުޝާން އަޙްމަދު ދީދީގެ މައްޗަށް އުފުލާފައިވަނީ މަސްތުވާތަކެތި ޓްރެފިކްކުރުމުގެ ކުށުގެ ދައުވާއެވެ.
މިމައްސަލައިގައި އޭނާ އާއި އެމައްސަލަ އާއި ގުޅުން ހުރި އެއްވެސް ހެއްކެއް އަދި ޤަރީނާއެއް ފުލުހުންގެ ފަރާތުން ހުށަހަޅާފައި ނުވާކަމަށް ބުނެ މެޖިސްޓްރޭޓް ކޯޓުން ނިންމުމުން، ދައުލަތުން އެ ނިންމުން ހައިކޯޓުގައި މީގެ ކުރިން ވަނީ އިސްތިއުނާފުކޮށްފައެވެ. އެގޮތުން އޭގެ ކުރިން ހަމަ އެ މެޖިސްޓްރޭޓް ކޯޓުން ނެރުއްވާފައިވާ ކޯޓު އަމުރުގައި އެމައްސަލަ އާއި ގުޅިގެން ރުޝާން އަޙްމަދު ދީދީގެ މައްޗަށް ތުހުމަތު ކުރެވޭ މިންވަރުގެ ހެއްކާއި ޤަރީނާ ލިބިފައިވާކަމަށް ކަނޑައަޅާފައިވާކަންވެސް ދައުލަތުން ފާހަގަކުރެއެވެ.
މިމައްސަލަ އޭރު ބެއްލެވި ދިވެހިރާއްޖޭގެ ހައިކޯޓުގެ ފަނޑިޔާރުންގެ އަޢުލަބިއްޔަތުން ވަނީ ދަށު ކޯޓުގެ ނިންމުން ބާތިލުކޮށް، އޭނާ ޝަރީއަތް ނިމެންދެން ބަންދު ކުރުމަށް ނިންމާފައެވެ.
އެހެންނަމަވެސް ހައިކޯޓުގެ ޙުކުމް އެހެން އޮއްވައި މެޖިސްޓްރޭޓް ކޯޓުން ކުރި ޙުކުމުގައި ވަނީ ރުޝާން އަހްމަދު ދީދީ ޝަރީއަތް ނިމެންދެން ބަންދުކުރުމަށް ދިވެހިރާއްޖޭގެ ހައިކޯޓުން ނިންމާފައިވާ ނިންމުން، 90 ދުވަހަށް ސަސްޕެންޑް ކުރާ ކަމަށެވެ. އަދި އެ މުއްދަތަށް ބޭސްފަރުވާގެ ބޭނުމަށް އޭނާ ދޫކޮށްފައި ބެހެއްޓުމަށް ވަނީ އަމުރު ކުރައްވާފައެވެ.
ހިތަދޫ މެޖިސްޓްރޭޓް ކޯޓުގައި އެ އަމުރު ނެރުއްވީ މެޖިސްޓްރޭޓް ރަފީއުދީން އަހްމަދުއެވެ. އެ ނިންމުން ދައުލަތުން އަނެއްކާވެސް ހައިކޯޓުގައި އިސްތިއުނާފު ކުރުމުން ބުދަ ދުވަހު ހައިކޯޓުން ވަނީ އެނިންމުން ބާތިލުކޮށްފައެވެ.
ހައިކޯޓުން ކުރި ޙުކުމުގައި ބުނެފައިވަނީ ބަންދުގައި ހުންނަ މިފަދަ މީހެއްގެ ސިއްޙީ ޙާލަތުގެ މައްޗަށް ރިޢާޔަތްކޮށް ބަންދުން ދޫކޮށްލެވޭނީ ވަރަށް އިސްތިސްނާ ޙާލަތްތަކެއްގައި އެމީހެއްގެ ފުރާނައަށް ނުރައްކާވާފަދަ ބައްޔެއް ހުރެގެން ހަމައެކަނި ޟަރޫރަތް ހުއްދަ ކުރާ މިންވަރެއްގެ މައްޗަށްކަމަށެވެ.
މި މައްސަލައިގައި ކަން ހިނގާފައިވާ ގޮތުގެ މައްޗަށް ބަލާއިރު، ރުޝާން އަޙުމަދުދީދީ ބަންދުން ދޫކޮށްލެވިފައިވަނީ އެގޮތަށްކަން މެޖިސްޓްރޭޓް ކޯޓުގެ ނިންމުމަށް ބެލުމުން އެނގޭކަށް ނެތްކަން ޙުކުމުގައި ފާހަގަކޮށްފައިވެއެވެ. އަދި އެފަދަ ޟަރޫރީ ޙާލަތެއް ހިނދުން ހިނދަށް އޮތްކަން ރުޝާން އަޙުމަދުދީދީއަށް ހައިކޯޓުގައި ބުނެދެވިފައިވެސް ނުވާކަމަށް ޙުކުމުގައި ބަޔާންކޮށްފައިވެއެވެ.
ހައިކޯޓުގައި ބުދަ ދުވަހު މިމައްސަލަ ނިންމަވާފައިވަނީ ފަނޑިޔާރު އަލީ ސަމީރާއި، ފަނޑިޔާރު ހުސައިން ޝަހީދާއި، ފަނޑިޔާރު ޙަސަން ޝަފީއުގެ އިއްތިފާޤުންނެވެ.
މިކަމާއި ގުޅިގެން ޕްރޮސެކިއުޓަރ ޖެނެރަލް ހުސައިން ޝަމީމްވެސް ވަނީ ހައިކޯޓުގެ ޙުކުމެއް ދިރި އޮއްވައި އެހުކުމް ސަސްޕެންޑުކުރުމަކީ ދަށުކޯޓަކުން މެޖިސްޓްރޭޓަކު ކުރައްވާ ޒާތުގެ ކަމެއް ނޫންކަމަށް ވިދާޅުވެ އެ ނިންމެވުމަށް ފާޑުވިދާޅުވެފައެވެ. އަދި މީހަކު ދޫކޮށްލަން ބޭނުންފުޅުވި ނަމަވެސް، ރަނގަޅު ސަބަބެއް ދައްކަވާންވާނެކަން ފާހަގަކުރައްވައި، ޖޭއެސްސީއަށް އެމައްސަލަ ހުށައަޅުއްވާނެކަމަށް ޝަމީމް އޭރު ވަނީ ވިދާޅުވެފައެވެ.
ޖޭއެސްސީން މިހާރު ވަނީ މެޖިސްޓްރޭޓް ރަފީއުދީންގެ މައްސަލަ ބެލުމަށްވެސް ނިންމާފައެވެ.
