ރާއްޖެ އައި ފަތުރުވެރިންގެ އަދަދު 321،000 އަށްވުރެ މައްޗަށް އަރައިފި
މާޗް މަހުގެ މިހާތަނަށް 40،532 ފަތުރުވެރިން ވަނީ ރާއްޖެ އައިސްފައި
ރާއްޖެ އައި ފަތުރުވެރިންނަށް މަރުހަބާ ކިޔުން
މިއަހަރުގެ މިހާތަނަށް 321،304 ފަތުރުވެރިން ރާއްޖެ އައިސްފައިވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މި ހިނގާ މާޗް މަހުގެ 1 ވަނަ ދުވަހުން 8 ވަނަ ދުވަހުގެ ނިޔަލަށް 40،532 ފަތުރުވެރިން ވަނީ ރާއްޖެ އައިސްފައެވެ. ނިމިދިޔަ ފެބްރުއަރީ މަހު 149،008 ފަތުރުވެރިން އައިސްފައިވާއިރު، ޖެނުއަރީ މަހު ރާއްޖެ އައި 131،764 ފަތުރުވެރިންނާއެކު މިއަހަރުގެ މިހާތަނަށް ރާއްޖެ އައި ފަތުރުވެރިންގެ ޖުމްލަ ވަނީ 321،304 އަށް އަރާފައެވެ.
މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިޔާއިންނެވެ. އެގޮތުން މިއަހަރު ރާއްޖެ އައި ފަތުރުވެރިންގެ 15 އިންސައްތަ ހިއްސާކުރަނީ ރަޝިޔާ ފަތުރުވެރިންނެވެ. ދެވަނައަށް އެންމެ ގިނަ ފަތުރުވެރިން އިނގިރޭސިވިލާތުން އައިސްފައިވާއިރު، އެ ސަރަހައްދުން އައި ފަތުރުވެރިންގެ ހިއްސާ 11.3 އިންސައްތައަށް އަރައެވެ. އަދި ތިންވަނައިގައި އިންޑިޔާ ވާއިރު މިހާތަނަށް އައި ފަތުރުވެރިންގެ 9.5 އިންސައްތަ ހިއްސާކުރަނީ އިންޑިޔާގެ ފަތުރުވެރިންނެވެ. މި ގައުމުތަކުގެ އިތުރުން މިއަހަރު އެންމެ ގިނައިން ފަތުރުވެރިން އައިސްފައިވާ 10 މާކެޓުގެ ތެރޭގައި ހިމެނެނީ ޖަރުމަނު، އިޓަލީ، ފްރާންސް، އެމެރިކާ، ޔޫކްރެއިން، ސްވިޒަރލޭންޑް އަދި އޮސްޓްރިއާއެވެ.
މިވަގުތު ޓޫރިސްޓު އެކޮމޮޑޭޝަން ފެސިލިޓީތަކުގެ ގޮތުގައި 1،172 ފެސިލިޓީއެއް އެބަހުރި ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ. އޭގެތެރޭގައި 168 ރިސޯޓާއި، 839 ގެސްޓްހައުސް، 1 ހޯމްސްޓޭ، 152 ސަފާރީއެއްގެ އިތުރުން 12 ހޮޓެލްއެއް ހިމެނެއެވެ. މިތަންތަނުގައި 60،047 ބެޑް ކެޕޭސިޓީ އެބަހުރި ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ. 1،172 ޓޫރިސްޓު ފެސިލިޓީގެ ތެރެއިން މިވަގުތު ޚިދުމަތް ދެމުންދަނީ 963 ތަނަކުން ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ. އަދި 60،047 ބެޑް ކެޕޭސިޓީގެ ތެރެއިން 54،340 އެނދެއްގެ ޚިދުމަތް ދެމުންދާކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ.
މިއަހަރު ނިމުމުގެ ކުރިން 2 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. މި އަމާޒަށް ވާސިލްވެވޭނެ ކަމުގެ އުންމީދު އެބައޮތްކަމަށް ޓޫރިޒަމް މިނިސްޓަރު ހާމަކުރައްވާފައިވާއިރު، މިދިޔަ 2021 ވަނަ އަހަރަށް ސަރުކާރުން ކަނޑައެޅި އަމާޒުވެސް ވަނީ ކާމިޔާބުކޮށްފައެވެ. އެގޮތުން މިދިޔަ 2021 ވަނަ އަހަރު 1.3 މިލިއަން ފަތުރުވެރިން ގެނައުމަށް އަމާޒު ހިފިއިރު، އަހަރު ނިންމާލާފައިވަނީ 1.32 މިލިއަން ފަތުރުވެރިންނާއެކުއެވެ.
