އެސްޓީއޯގެ ބޯޑަށް ކުރިމަތިލުމަށް ހުޅުވާލައިފި

ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ)ގެ ބޯޑުގައި އާންމު ހިއްސާދާރުންގެ ފަރާތުން ތަމްސީލުކުރާނެ ޑިރެކްޓަރު ކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.

އެ މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ މި މަހުގެ ނިޔަލަށެވެ. އެސްޓީއޯއިން ބުނީ ފޯމް ހުށަހަޅާ ފަރާތްތަކާއި ކުންފުނީގެ ނޮމިނޭޝަން އެންޑް ރެމިއުނަރޭޝަން ކޮމިޓީއިން އިންޓަވިއު ކުރާނެ ކަމަށެވެ. އަދި އިންޓަވިއުކޮށް، ޝޯޓް ލިސްޓުކުރާ ކެނޑިޑޭޓުންގެ ތެރެއިން މި މަގާމަށް އިންތިހާބު ކުރުމަށްޓަކައި އަހަރީ އާންމު ޖަލްސާއަށް ނަން ހުށަހަޅާނެ ފަރާތްތައް ކަނޑައަޅާނީ ޑިރެކްޓަރުންގެ ބޯޑުން ކަމަށް އެސްޓީއޯ އިން ބުނެއެވެ.

އެސްޓީއޯ އިން ބުނީ ސަރުކާރު ތަމްސީލް ކުރާ ޑިރެކްޓަރުންނަށް ބަދަލެއް ގެންނަން ބޭނުންވާނަމަ މާރޗް މަހުގެ 31 ވަނަ ދުވަހުގެ ކުރިން ކުންފުންޏަށް އެކަން އަންގައި ދިނުމަށް އެދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑަށް ވެސް ހުށަހަޅާފައިވާނެ ކަމަށެވެ.

އެސްޓީއޯގެ ބޯޑު އެކުލެވިގެން ވަނީ ސަރުކާރުން ކަނޑައަޅާ ހަ ޑިރެކްޓަރުންނާއި، އާންމު ހިއްސާދާރުން އިންތިޚާބު ކުރާ އެއް ޑިރެކްޓަރުގެ މައްޗަށެވެ.