ބެންޒެމާގެ ޖާދުލުން ރެއާލް ކުއާޓާ ފައިނަލަށް

ޔުއެފާ ޗެމްޕިއަންސް ލީގުގައި ރެއާލް މެޑްރިޑާއި ޕީއެސްޖީ ބައްދަލުކުރި ގަދަ 16 ގެ ދެވަނަ ލެގުގައި ރެއާލް މެޑްރިޑްގެ ކެޕްޓަން ކަރިމް ބެންޒެމާގެ ހެޓްރިކާއެކު އެޓީމު މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

ރެއާލްގެ ސެންޓިއާގޯ ބާނަބޭއު ސްޓޭޑިއަމްގައި ކުޅުނު މި މެޗު ރެއާލްއިން ކާމިޔާބު ކުރީ 3-1 ގެ ނަތީޖާއަކުންނެވެ. ފުރަތަމަ ހާފުގައި ކައުންޓަ އެޓޭކެއްގެ ބޭނުން ހިފާ ޕީއެސްޖީއަށް ލީޑު ނަގައިދިނީ އެމްބާޕޭއެވެ. އޭގެ ކުރިންވެސް އެމްބާޕޭ ލަނޑެއް ޖެހި ނަމަވެސް ވީއޭއާރު ބެލުމަށްފަހު ރެފްރީ ވަނީ އެއީ އޮފްސައިޑު ލަނޑެއް ކަމަށް ނިންމާފައެވެ.

ވަރުގަދަ ކުޅުމަކާއެކު ދެވަނަ ހާފަށް ނުކުމެ ރެއާލްއަށް ނަތީޖާ ހަމަހަމަ ކޮށްދިނީ އެޓީމުގެ ކެޕްޓަން ކަރިމް ބެންޒެމާއެވެ. ފުރަތަމަ ލަނޑަކީ މި މެޗުގައި ގިިނަ ސޭވްތަކެއް ކުރި ޕީއެސްޖީގެ ކީޕަރު ޑޮނަރޫމާއަށް ހެދުނު ގޯހެއްގެ ބޭނުން ހިފައިގެން ބެންޒެމާ ކާމިޔާބު ކުރި ލަނޑެކެވެ. ބެންޒެމާ ޖެހި ދެވަނަ ލަނޑަކީ ވިނީޝިއަސް ޖޫނިއަރ އުފެއްދި ކައުންޓާ އެޓޭކެއްގައި ލިބުނު ހަނި ފުރުސަތަކުން ކާމިޔާބު ކުރި ލަނޑެކެވެ. ރެއާލްއިން މުބާރާތުގެ އޮއެވަރު އަނބުރާލީ ކައިރި ކައިރީގައި ބެންޒެމާ ޖެހި ތިން ގޯލުންނެވެ.

މި މެޗުން 3-2 ގެ ނަތީޖާއަކުން ބަލިވުމާއެކު ޕީއެސްޖީ މިވަނީ މުބާރާތާއި އަލްވަދާއު ކިޔަން ޖެހިފައެވެ.

ގަދަ 16 ގެ ފުރަތަމަ ލެގުގައި މި ދެޓީމު ބައްދަލުކުރި މެޗުން ޕީއެސްޖީ މޮޅުވީ 1-0 ގެ ނަތީޖާއަކުންނެވެ. މުބާރާތުގެ ކުއާޓާ ފައިނަލަށް ރެއާލް ދަތުރު ކުރީ ދެ މެޗުގެ އެގްރިގޭޓުން އެއްލަނޑުގެ ފަރަގާއެކުއެވެ. ދެ މެޗުގެ އެގްރިގޭޓުން ރެއާލް ކުރި ހޯދީ 3-2 އިންނެވެ.

ބެންޒެމާގެ ހެޓްރިކަށްފަހުވެސް ނަތީޖާ ބަދަލުކޮށްލުމަށް ޕީއެސްޖީއަށް ފުރުސަތު ލިބުނެވެ. ނަމަވެސް އެމްބާޕޭ އުފެެއްދި ހަމަލާތައް ކާމިޔާބު ނުވިއިރު، މެސީ ފޮނުވާލި ބާރު ހިލޭ ޖެހުން ދިޔައީ ގޯލުގެ ހުރަސް ދަނޑި މަތިން ބޭރަށެވެ.

ޗެމްޕިއަންސް ލީގުގައި ބުދަ ދުވަހުގެރޭ މެންޗެސްޓަރ ސިޓީވެސް ވަނީ ކުއާޓާ ފައިނަލަށް ދަތުރުކޮށްފައެވެ. ސިޓީން ކުއާޓާ ފައިނަލުގެ ޖާގަ ހޯދީ ގަދަ 16 ގެ ފުރަތަމަ ލެގުގައި ސްޕޯޓިންގ ލިޒްބަންގެ މައްޗަށް ހޯދި ބޮޑު މޮޅުންނެވެ. ފުރަތަމަ ލެގުގައި ސިޓީ މޮޅުވީ 5-0 ގެ ތަފާތު ބޮޑު ނަތީޖާ އަކުންނެވެ. ބުދަ ދުވަހުގެރޭ މި ދެޓީމު ކުޅުނު ދެވަނަ ލެގުގެ މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. މިއީ ސިޓީން ކުއާޓާ ފައިނަލަށް ވިދިވިދިގެން ދަތުރުކުރި ފަސްވަނަ ފަހަރެވެ.