ލޮލުގެ ފެނުމުން މަހުރޫމްވެފައިވާ މީހެއްގެ ގޮތުގައި އުފަންވުމަކީ އޭނާގެ ނަސީބު ކަމަށް ސީރިއާގެ ޓީވީ ޕްރެޒެންޓަރު ސަހާރް މަލަސް ގަބޫލުކުރެއެވެ. އޭނާ ބުނީ އެއީ އެކަމާއެކު ހުރިހާ ކަމަކަށް ހޭނެން ކުޑައިރުއްސުރެ ފަސޭހަވުމުންނެވެ.
އުމުރުން 39 އަހަރުގެ މަލަސް މަތީ ތައުލީމު ހާސިލްކުރީ، އަރަބި ލިޓްރޭޗަރގެ ދާއިރާއިންނެވެ. ތައުލީމީ ހަޔާތުގައި، ރަހުމަތްތެރިންގެ އެހީތެރިކަމާއެކު ފިލާވަޅުތައް އޯޑިއޯއަށް ބަދަލުކުރާ ކަމަށް މަލަސް ބުންޏެވެ.
އެންމެ ކުޑައިރުވެސް ލޮލުގެ ފެނުުމުން މަހުރޫމްވި ނަަމަވެސް މަލަސް ބޭނުންވީ އާންމު މީހުންނާއި އެކަހެރި ނުވެ، ދިރިއުޅުމަށެވެ. އޭގެ ނަތީޖާ ވަރަށްވެސް ފުުރިހަމައެވެ. މިއަދު މަލަސްއަކީ ސީރިއާގެ ޓީވީ ޕްރެޒެންޓަރެކެވެ.
މީގެ ދެ އަހަރު ކުރިން "ޤަދުރުން" ގެ ނަމުގައި ނުކުޅެދުންތެރިކަން ހުންނަ މީހުންނަށް ޚާއްސަކޮށްގެން ސީރިއާގެ ޓީވީ ޗެނަލެއް ކަަމަށްވާ "އެޚްބަރިޔާ" ޓީވީއަށް އަމިއްލަ ޕްރޮގްރާމެއް އުފައްދައި ޕްރެޒެންޓް ކުރަން ފެށިއެވެ.
މިހާރު މަލަސް އަކީ އެ ޗެނަލްގެ ޕްރޫފް ރީޑަރވެސްމެއެވެ.
މަލަސް ބުނީ މިހާރު އޭނާއަށް ފުރިހަމަ މީހެއްގެ އިހުސާސް ކުރެވޭ ކަމަށެވެ.
"ބައެއްފަަހަރު މީހުންގެ ފަރާތުން ވަރަށް ނެގެޓިވް ކޮމެންޓް އާދޭ. އެކަމަކު އޭގެ ސަބަބުން މާބޮޑު އަސަރެއް ނުކުރޭ. ހުރިހާ ކަމަކީ ތަފްސީލްކޮށް ކިޔައިދޭން ޖެހޭ ކަންތައް ކަމަށް ގަބޫލް ނުކުރަން. އަހަރެން ގަބޫލު ކުރަނީ މުޖުތަމައަށް އަހަރެންގެ އިހުސާސްތައް ނޭނގުނަސް އެމީހުންގެ އިހުސާސްތައް އަހަންނަށް އެނގެން ޖެހޭނެ ކަމަށް." މަލަސް ބުންޏެވެ.
ލޮލުގެ ފެނުމުން މަހުރޫމުވުން ފިޔަވައި މަލަސްގެ އިތުރު އުނިކަމެއް ނެތެވެ. އާންމުކޮށް އެކުގައި އުޅޭ މީހުންނާއި، ގޮސް އުޅޭތަންތަނަށް ވަރަށް ފަރިތައެވެ. ނަަމަވެސް އައު މީހުން ދެނެގަތުމާއި، އައު ތަންތަން ދެނެގަތުމަށް ވަގުތުކޮޅެއް ބޭނުންވާ ކަމަށް މަލަސް ބުންޏެވެ.
